આજની રેસિપી: હેલ્ધી ચૉકલેટ બ્રાઉની

હેલ્ધી ચૉકલેટ બ્રાઉની

સામગ્રી : એક કપ ઘઉંનો લોટ, 1/4 કપ કોકો પાઉડર, એક કપ ગોળનો પાઉડર (માર્કેટમાં સહેલાઈથી મળી જાય છે) અથવા 1/3 કપ સાકરનો પાઉડર (બૂરું સાકર), એક ચમચી બેકિંગ પાઉડર, 1/4 કપ તેલ, બે ચમચી ચોકો ચિપ્સ, બે ચમચી અખરોટના ટુકડા અને ચપટી મીઠું

રીત : એક બાઉલમાં લોટ, કોકો પાઉડર, બેકિંગ પાઉડર, મીઠું બધું સાથે ચાળી લો. પછી બીજા બાઉલમાં તેલ, ગોળ અથવા સાકરનો પાઉડર અને એક કપ પાણી ઉમેરીને એને મિક્સ કરી લો. પછી એમાં ડ્રાય સામગ્રી (લોટ, કોકો પાઉડર, બેકિંગ પાઉડર) ઉમેરીને મિક્સ કરો.

એક બેકિંગ ટ્રેમાં બટર પેપર મૂકી એના પર તેલવાળો હાથ લગાવીને તૈયાર કરો અને બ્રાઉનીનું મિશ્રણ એમાં ભરી લો. એના પર અખરોટના ટુકડા અને ચોકો ચિપ્સ નાખો. જો તમે એને ગૅસ પર બનાવવા માગતા હો તો એક મોટી કડાઈમાં મીઠું પાથરી એને ૧૦ મિનિટ માટે ગરમ કરી એના પર બ્રાઉનીની ટ્રે મૂકી કડાઈને ઢાંકી ૧૦ મિનિટ ફાસ્ટ અને પછી ૨૦ મિનિટ સુધી સ્લો ગૅસ પર બેક કરો. જો તમે અવનમાં બનાવો તો ૧૮૦ ડિગ્રી પર વીસથી પચીસ મિનિટ સુધી બેક કરી લો અને જો માઇક્રોવેવમાં બનાવો તો એને પાંચ મિનિટ માઇક્રો કરીને રેડી કરી શકો છો. છેલ્લે એમાં ટૂથપિક ભરાવીને ચેક કરવું કે બ્રાઉની તૈયાર છે કે નહીં. જો ટૂથપિક સાફ નીકળે તો સમજવું કે બ્રાઉની તૈયાર છે અને એના પર બ્રાઉનીનું મિશ્રણ ચોંટે તો સમજવું કે હજી વાર છે અને એને બેથી પાંચ મિનિટ વધુ કુક કરવાની જરૂર છે.  બ્રાઉની ઠંડી પડે એટલે એના ટુકડા કરીને સર્વ કરો અથવા એને વૅનિલા આઇસક્રીમ સાથે સર્વ કરો.

- કાજલ ડોડિયા

 
(તમે પણ મોકલી શકો છો રેસિપી : સાથે વાનગીનો ફોટો હોવો જરૂરી. તમારા નામ, ફોટો અને ફોન-નંબર સાથે gujmid@gmail.com પર ઈમેઇલ કરો. સિલેક્ટેડ રેસિપી પ્રકાશિત થશે)