વૉશિંગ્ટનમાં ગોળીબાર કરાવ્યો પાકિસ્તાને અને નામ અફઘાનિસ્તાનનું : તાલિબાન

વાઇટ હાઉસ નજીક થયેલા ગોળીબારના સંદર્ભમાં તાલિબાન પ્રવક્તા સુહેલ શાહીને પાકિસ્તાનની ગુપ્તચર એજન્સી ISI પર હુમલાનો આરોપ લગાવ્યો હતો

ફાઇલ તસવીર

અમેરિકામાં વાઇટ હાઉસ નજીક થયેલા ગોળીબારના સંદર્ભમાં તાલિબાન પ્રવક્તા સુહેલ શાહીને પાકિસ્તાનની ગુપ્તચર એજન્સી ઇન્ટર-સર્વિસિસ ઇન્ટેલિજન્સ (ISI) પર હુમલાનો આરોપ લગાવ્યો હતો અને દાવો કર્યો હતો કે ISI અફઘાનિસ્તાનની સરકારને ફસાવીને એની પ્રતિષ્ઠાને નુકસાન પહોંચાડે છે. તેમણે જણાવ્યું હતું કે અમે ભારત સહિત વિશ્વની નજીક જઈ રહ્યા છીએ ત્યારે ISI તાલિબાનને ફસાવવા માટે આ બધું કરી રહ્યું છે.

વૉશિંગ્ટન હુમલા કેસમાં ૨૯ વર્ષના રહેમાનુલ્લાહ લકનવાલની ધરપકડ કરવામાં આવી છે. ૨૦૨૧માં તેણે અમેરિકામાં પ્રવેશ કર્યો હતો અને તે અફઘાન નાગરિક છે.

આ ઘટના પર અફઘાનિસ્તાનમાં તાલિબાન સરકારે તીખી પ્રતિક્રિયા આપતાં કહ્યું હતું કે અમેરિકા આ ​​મામલામાં બિનજરૂરી રીતે અફઘાનિસ્તાનનું નામ આપી રહ્યું છે. તાલિબાન પ્રવક્તા ઝબીઉલ્લાહ મુજાહિદે દાવો કર્યો હતો કે ‘રહેમાનુલ્લાહ લકનવાલનો અફઘાનિસ્તાન સાથે કોઈ સીધો કે પરોક્ષ સંબંધ નથી અને તેને ISI દ્વારા તાલીમ આપવામાં આવી હતી. તે ઇસ્લામાબાદ થઈને અમેરિકા ગયો હતો. આ ઘટના સાથે અફઘાનિસ્તાનને જોડવું સંપૂર્ણપણે ખોટું છે.’