સાવધાન થઈ જાય બિલ્ડરો

તમારી કન્સ્ટ્રક્શન-સાઇટ પર ગમે ત્યારે આવી શકે છે બૉમ્બે હાઈ કોર્ટે બનાવેલી પાંચ આૅફિસરોની કમિટી : હવાની કથળતી જતી ગુણવત્તાને મામલે યોજાયેલી સુનાવણીમાં મુંબઈમાં ચાલી રહેલાં બાંધકામો નિશાન પર

ફાઇલ તસવીર

મુંબઈમાં હવાની ગુણવત્તાને દર્શાવતો ઍર ક્વૉલિટી ઇન્ડેક્સ (AQI) પુઅર અને જોખમી કૅટેગરીમાં નોંધાઈ રહ્યો હોવાથી આ સંદર્ભે દાખલ કરાયેલી અનેક અરજીઓ પર એકસાથે સુનાવણી કરતાં બૉમ્બે હાઈ કોર્ટે કહ્યું હતું કે મુંબઈની હવાની ગુણવત્તાને સુધરતાં વાર લાગશે એ ખરું, પણ કન્સ્ટ્રક્શનને કારણે જે ઍર પૉલ્યુશન ફેલાય છે એને જો રોકવું હોય તો ઍર પૉલ્યુશનને લગતી ગાઇડલાઇન બરાબર ફૉલો કરાવવી જોઈશે.

બૉમ્બે હાઈ કોર્ટના જસ્ટિસ ચંદ્રશેખર અને જસ્ટિસ ગૌતમ અણખડે આ બાબતે પાંચ અધિકારીઓની સ્વતંત્ર કમિટી બનાવી હતી. એમાં બૃહન્મુંબઈ મ્યુનિસિપલ કૉર્પોરેશન (BMC), મહારાષ્ટ્ર પૉલ્યુશન કન્ટ્રોલ બોર્ડ (MPCB) અને સ્ટેટ ગવર્નમેન્ટના હેલ્થ ડિપાર્ટમેન્ટના અધિકારીઓનો સમાવેશ કરવામાં આવ્યો છે. આ કમિટી મુંબઈની કન્સ્ટ્રક્શન-સાઇટ્સની મુલાકાત લેશે અને ચકાસશે કે ગાઇડલાઇનનું બરાબર પાલન કરવામાં આવે છે કે નહીં.

આ ઉપરાંત કોર્ટે BMC અને MPCBને ગયા વર્ષે આ બદલ તેમના દ્વારા કયાં પગલાં લેવામાં આવ્યાં હતાં એનો રિપોર્ટ ૧૫ ડિસેમ્બર સુધી આપવા જણાવ્યું છે. અરજદારના વકીલ દ્વારા રજૂઆત કરતાં કહેવાયું હતું કે મુંબઈમાં AQI ૨૦૨૩થી ખરાબ થઈ રહ્યો છે. જસ્ટિસ ચંદ્રશેખરે કહ્યું હતું કે ‘આ સમસ્યાનો ઉકેલ લાવવામાં થોડો સમય લાગશે. દિલ્હી છેલ્લાં ૧૫ વર્ષથી આ માટે પ્રયાસ કરી રહ્યું છે. મુંબઈને જોકે કેટલાક બેનિફિટ્સ છે. મુંબઈમાં એ થઈ શકે એમ છે.’

કોર્ટે BMC અને MPCB દ્વારા આ સંદર્ભે ગયા વર્ષે કયાં પગલાં લેવાયાં એની વિગતો મગાવી છે. એમાં સ્પેશ્યલ સ્ક્વૉડ દ્વારા કેટલી જગ્યાએ વિઝિટ કરાઈ, કેટલી જગ્યાએ CCTV કૅમેરા લગાવવામાં આવ્યા, BMCએ કેટલી કન્સ્ટ્રક્શન-સાઇટ પર AQI માપવા સેન્સર ધરાવતાં મૉનિટર બેસાડવાની પરવાનગી આપી એની વિગતોની સ્ક્રૂટિની કરવામાં આવે. કન્સ્ટ્રક્શન-સાઇટ પર એકાદ-બે અઠવાડિયાંમાં ધૂળ અને ઍર પૉલ્યુશન પર અંકુશ મેળવી શકાશે જેને કારણે થોડો ફરક પડી શકશે.

કોર્ટે નીમેલા સિનિયર ઍડ્વોકેટ દરાયસ ખંભાતાએ ગઈ કાલે કોર્ટમાં રજૂઆત કરતાં કહ્યું હતું કે ‘૨૦૨૪માં કોર્ટ દ્વારા કન્સ્ટ્રક્શન-સાઇટ માટેની ગાઇડલાઇન્સ અનુસાર કન્સ્ટ્રક્શન-સાઇટ પર CCTV કૅમેરા, સેન્સરબેઝ્ડ ઍર પૉલ્યુશન મૉનિટર અને પાણી છાંટવાનું પાલન નથી થતું. આ ઉપરાંત વાહનોને કારણે થતા પ્રદૂષણમાં પણ ધરખમ વધારો થયો છે.’

જોકે કોર્ટે એ સંદર્ભે કહ્યું હતું કે ‘એને પછી પણ ટૅકલ કરી શકાશે. આ સંદર્ભે હાલ અમે કોઈ ચુકાદો નથી આપવા માગતા. ઑથોરિટી ચલાન ઇશ્યુ કરવા મંડી પડશે. અમે લોકોને હેરાન કરવા નથી માગતા.’    

કોલાબામાં ફેલાતા ઍર પૉલ્યુશન બદલ BMCએ નેવીને નોટિસ મોકલી  

કોલાબાના નેવીગરમાં નેવી ૪ ઇમારતો બનાવી રહી છે. એ ઇમારતોનું બાંધકામ ચાલી રહ્યું છે. BMCએ નેવીને પણ એ કન્સ્ટ્રક્શન-સાઇટ પર ગાઇડલાઇન ફૉલો થતી ન હોવાનું કહીને એ બદલ નોટિસ મોકલી છે.