ઘાટકોપરમાં જેમની હત્યા થઈ એ શહનાઝ કાઝી એટલે લતા ઠક્કર

૬૫ વર્ષનાં આ મહિલાનું મર્ડર સાવકી વહુએ પ્રૉપર્ટી માટે કર્યું : વર્ષો પહેલાં લવ-મૅરેજ કરીને ઇસ્લામ અંગીકાર કર્યો હતો

જીવ ગુમાવનાર શહનાઝ કાઝી (ડાબે), પોલીસ સાથે આરોપી મહિલા

ઘાટકોપર-વેસ્ટની એક સોસાયટીમાં રહેતાં ૬૫ વર્ષની શહનાઝ કાઝીની હત્યા કરવાના આરોપસર ઘાટકોપર પોલીસે ગુરુવારે રાતે ૫૦ વર્ષની મુમતાઝ ઇરફાન ખાનની ધરપકડ કરી હતી. આરોપી મહિલા મરનાર વૃદ્ધ મહિલાની સાવકી વહુ છે. બુધવારે સાંજે પોલીસને શહનાઝની ડેડ-બૉડી તેના ઘરમાંથી લોહીલુહાણ હાલતમાં મળી હતી. એ પછીથી પોસ્ટમૉર્ટમ-રિપોર્ટમાં માથામાં ગંભીર ઈજાને કારણે શહનાઝનું મૃત્યુ થયું હોવાનું જાણ્યા બાદ ઘાટકોપર પોલીસે હત્યાનો ગુનો નોંધીને તપાસ આદરી હતી. ઘટનાની ગંભીરતાને ધ્યાનમાં રાખીને પોલીસે શહનાઝની હત્યાનો ભેદ ઉકેલવા માટે ૧૦ ટીમ બનાવી હતી. એ ટીમે એટલા વિસ્તારના CCTV કૅમેરાનાં ફુટેજ તપાસીને બુરખો પહેરીને હત્યા કરવા આવેલી મુમતાઝને ઓળખીને તેની ધરપકડ કરી હતી.

શું હતી ઘટના?

ઘાટકોપરના એક સિનિયર પોલીસ-અધિકારીએ ‘મિડ-ડે’ને કહ્યું હતું કે ‘બુધવારે સાંજે શહનાઝની બહેન તેને ફોન કરી રહી હતી, પરંતુ ફોન રિસીવ થયો નહોતો એટલે તેની બહેને બાજુમાં રહેતી સાયકા અન્સારીને ફોન કરીને શહનાઝ સાથે વાત કરાવવાનું કહ્યું ત્યારે સાયકાએ શહનાઝના ઘરે જઈને દરવાજો ખખડાવ્યો હતો, પરંતુ અંદરથી ઘણા સમય સુધી કોઈ જવાબ આવ્યો નહોતો. ત્યાર બાદ શહનાઝના ઘરની બીજી ચાવીથી ઘર ખોલવામાં આવતાં શહનાઝ લોહીથી લથપથ હાલતમાં પડેલી જોવા મળી હતી. સોસાયટીના સભ્યોએ તાત્કાલિક ઘાટકોપર પોલીસને જાણ કરી હતી. પોલીસે ઘટનાસ્થળે જઈને મૃતદેહનો કબજો લીધો હતો.’

સાવકી વહુએ હત્યા કરી

ઘાટકોપર પોલીસ-સ્ટેશનના ઇન્સ્પેક્ટર સતીશ જાવીરે ‘મિડ-ડે’ને કહ્યું હતું કે ‘બુધવારે ઘટના બની એ સમયે અમે આસપાસ રહેતા લોકોનાં સ્ટેટમેન્ટ નોંધ્યાં હતાં જેમાં શહનાઝના પરિવારજનોના કોઈ સભ્યનું ઇન્વૉલ્વમેન્ટ હોય એવી અમને શંકા હતી. એના આધારે અમે તપાસ કરતા હતા. તપાસના ભાગરૂપે શહનાઝના બિલ્ડિંગની આસપાસના CCTV કૅમેરાનાં ફુટેજ સ્કૅન કરતાં એક શંકાસ્પદ મહિલા અમને જોવા મળી હતી. પછીથી એ મહિલા શહનાઝની સાવકી વહુ હોવાનું જાણવા મળ્યું હતું. આરોપી મહિલાની ધરપકડ કરીને અમે વધુ તપાસ હાથ ધરી છે. શહનાઝના પતિ અનીસે બે લગ્ન કર્યાં હતાં. અનીસે પહેલાં લગ્ન આઇશા નામની મહિલા સાથે કર્યાં હતાં. તેના ચાર પુત્રો છે અને એમાં ચોથા પુત્ર ઇરફાનની પત્ની મુમતાઝ છે.’

હત્યા પાછળનું કારણ પ્રૉપર્ટી

ઘાટકોપરના એક સિનિયર પોલીસ-અધિકારીએ કહ્યું હતું કે ‘મુમતાઝની ધરપકડ કરીને તેની પૂછપરછ કરવામાં આવતાં તેણે પ્રૉપર્ટી માટે સાવકી સાસુની હત્યા કરી હોવાનું સ્વીકાર્યું હતું. શહનાઝના ઘાટકોપર અને કુર્લામાં બે ફ્લૅટ છે. એ  ઉપરાંત તેની ઘણી બૅન્ક-બૅલૅન્સ તથા દાગીના પણ છે. તેને કોઈ સંતાન ન હોવાથી એ તમામ વસ્તુઓ પચાવી પાડવા માટે શહનાઝની હત્યા કરી હોવાનું પ્રાથમિક તપાસમાં જાણવા મળ્યું છે.’

શહનાઝ મૂળ ગુજરાતી

ઘાટકોપરના એક સિનિયર પોલીસ-અધિકારીએ કહ્યું હતું કે ‘મૃત્યુ પામેલી શહનાઝ ગુજરાતી હતી અને તેનું મૂળ નામ લતા ઠક્કર હતું. તે હાલાઈ લોહાણા જ્ઞાતિની હતી. તેણે વર્ષો પહેલાં મુસ્લિમ યુવક સાથે લવ-મૅરેજ કરીને મુસ્લિમ ધર્મ સ્વીકાર્યો હતો.’