ડેટિંગ ઍપ્સ પર પુરુષોને ફસાવીને લૂંટનારી બે યુવતીની ધરપકડ

પુરુષોને લૉજ પર બોલાવીને ઊંઘની દવા આપીને દાગીના અને રોકડ લૂંટતી હતી

પ્રતીકાત્મક તસવીર

ડેટિંગ ઍપ્સ દ્વારા પુરુષોને ફસાવીને તેમની પાસેથી પૈસા પડાવતી ૨૦ વર્ષની બે યુવતીઓની પોલીસે ધરપકડ કરી છે. તેમની પાસેથી ૪ લાખ રૂપિયાની માલમતા જપ્ત કરવામાં આવી છે.
પાલઘરની માંડવી પોલીસે આપેલી માહિતી મુજબ આરોપી યુવતીઓ ઑનલાઇન ડેટિંગ ઍપ્સ દ્વારા પુરુષોનો સંપર્ક કરતી હતી. તેઓ પુરુષોને મળીને તેમને લલચાવીને ઊંઘની ગોળીઓ આપ્યા બાદ તેમનાં ઘરેણાં અને રોકડ રકમની ચોરી કરતી હતી. આ કેસની ફરિયાદ વિરાર-વેસ્ટના ૩૧ વર્ષના પુરુષે કરી હતી. ફરિયાદ કરનાર પુરુષને એક યુવતીએ બાવીસમી નવેમ્બરે એક લૉજમાં બોલાવ્યો હતો અને ઊંઘની દવા આપીને તેને લૂંટવામાં આવ્યો હતો. તેણે પહેરેલી ૨૦ ગ્રામની સોનાની ચેઇન, એક મોબાઇલ ફોન અને એક સ્માર્ટ ઘડિયાળ લૂંટવામાં આવ્યાં હતાં જેની કુલ કિંમત ૧.૮૩ લાખ રૂપિયા હોવાનું તેણે જણાવ્યું હતું.

પકડાઈ ન જાય એટલે આરોપી યુવતીઓ તેમની ડેટિંગ ઍપ પ્રોફાઇલ ડિલીટ કરતી હતી. લૉજ પર પણ બનાવટી આઇડેન્ટિટી કાર્ડ અને ખોટા ફોન-નંબર આપતા હતા તેમ જ ઑનલાઇન ચુકવણી કરવાનું પણ ટાળતા હતા એમ પોલીસ અધિકારીએ જણાવ્યું હતું. આરોપીઓમાંથી એક માલવણીની રહેવાસી છે, જ્યારે બીજી મહિલા મૂળ હિમાચલ પ્રદેશની છે.