આજે રાતે મુંબઈ સેન્ટ્રલ અને માહિમ વચ્ચે ૪ કલાકનો બ્લૉક

ફાઇલ તસવીર

વેસ્ટર્ન રેલવેમાં શનિવાર અને રવિવાર વચ્ચેની રાતે મુંબઈ સેન્ટ્રલ અને માહિમ સ્ટેશન વચ્ચે અપ અને ડાઉન ફાસ્ટ લાઇન પર ૪ કલાકનો જમ્બો બ્લૉક રહેશે. મધરાતે ૧૨.૧૫ વાગ્યાથી પરોઢિયે ૦૪:૧૫ વાગ્યા સુધી બ્લૉક રહેતાં ફાસ્ટ લાઇનની ટ્રેનો સાંતાક્રુઝ અને ચર્ચગેટ સ્ટેશન વચ્ચે સ્લો લાઇન પર દોડશે. રવિવારે દિવસના સમયે કોઈ બ્લૉક રહેશે નહીં.

સેન્ટ્રલ રેલવેમાં રવિવારે સવારે ૧૦.૫૫થી બપોરે ૩.૫૫ વાગ્યા સુધી છત્રપતિ શિવાજી મહારાજ ટર્મિનસ (CSMT) અને વિદ્યાવિહાર વચ્ચે અપ અને ડાઉન સ્લો લાઇન પર બ્લૉક રહેશે. દરમ્યાન CSMT અને વિદ્યાવિહાર સ્ટેશન વચ્ચે અપ અને ડાઉન સ્લો લાઇનની ટ્રેનો ફાસ્ટ લાઇન પર દોડાવાશે જે ભાયખલા, પરેલ, દાદર, માટુંગા, સાયન અને કુર્લા સ્ટેશન પર પણ રોકાશે.
સવારે ૧૦થી બપોરે ૪ વાગ્યા સુધી CSMT-પનવેલ/બેલાપુર હાર્બર લાઇનની અપ-ડાઉન ટ્રેનો રદ રહેશે.

ટ્રાન્સહાર્બર લાઇનમાં રવિવારે સવારે ૧૦થી બપોરે ૪ વાગ્યા સુધી પનવેલ-થાણે લાઇનની ટ્રેનો રદ રહેશે. દરમ્યાન થાણે-વાશી/નેરુળ સ્ટેશનો પર ટ્રેનો ઉપલબ્ધ રહેશે.

વિક્રોલી મેટ્રો સ્ટેશનને કાંજુરમાર્ગ રેલવે-સ્ટેશન સાથે જોડતો બ્રિજ બનશે

મેટ્રો 4ના વિક્રોલી મેટ્રો સ્ટેશનને લોકલ રેલવે નેટવર્ક પર કાંજુરમાર્ગ રેલવે-સ્ટેશન સાથે જોડતો એક નવો પેડેસ્ટેરિયન બ્રિજ બનાવવાનો પ્લાન મુંબઈ મેટ્રોપૉલિટન રીજન ડેવલપમેન્ટ ઑથોરિટી (MMRDA) દ્વારા જાહેર કરવામાં આવ્યો છે. આ બ્રિજની કામગીરી માટે માટે ટેન્ડર પણ બહાર પાડી દેવામાં આવ્યું છે. પ્રપોઝલની માહિતી પ્રમાણે ૯૩ કરોડ રૂપિયાના ખર્ચે તૈયાર થનારો આ બ્રિજ ૭૪૦ મીટર લાંબો હશે. કામગીરી શરૂ થયા પછી ૧૮ મહિનામાં બ્રિજ તૈયાર થઈ જશે.