અમારા સંસદસભ્યો સંસદમાં જોરથી વન્દે માતરમ્ બોલશે, જો BJPમાં હિંમત હોય તો તેમને બહાર કાઢીને બતાવે : ઉદ્ધવ ઠાકરે

અમારા સંસદસભ્યો સંસદમાં જોરથી વન્દે માતરમ્ બોલશે, જો BJPમાં હિંમત હોય તો તેમને બહાર કાઢીને બતાવે : ઉદ્ધવ ઠાકરે

રાજ્યસભામાં વન્દે માતરમ્ બોલવા પર મૂકવામાં આવેલી પાબંદી પર ગઈ કાલે પત્રકારોને સંબોધી રહેલા શિવસેના (UBT)ના વડા ઉદ્ધવ ઠાકરે (તસવીર : સૈયદ સમીર અબેદી)

સંસદનું શિયાળુ સત્ર પહેલી ડિસેમ્બરથી ચાલુ થઈ રહ્યું છે ત્યારે એ પહેલાં રાજ્યસભાના સભ્યોને આપવામાં આવેલી હૅન્ડબુકમાં એવું કહેવામાં આવ્યું છે કે ‘વન્દે માતરમ્’ અને ‘જય હિન્દ’નો રાજ્યસભામાં કે સભાની બહાર નારાબાજીમાં ઉપયોગ કરી શકાશે નહીં, એ સંસદીય રીતભાતની ખિલાફ ગણાશે. આ બાબતને લઈને ગઈ કાલે શિવસેના (UBT)ના વડા ઉદ્ધવ ઠાકરેએ પ્રેસ-કૉન્ફરન્સ લીધી હતી અને કહ્યું હતું કે ‘અમારા સંસદસભ્યો જોરથી ‘વન્દે માતરમ્’ બોલશે, જો BJPમાં હિંમત હોય તો તેમને બહાર કાઢીને બતાવે. અમારી BJP સાથે યુતિ હતી ત્યારે તેમણે કહ્યું હતું કે જે લોકોએ આ દેશમાં રહેવું હોય તેમણે ‘વન્દે માતરમ્’ બોલવું પડશે. રાજ્યસભાના સેક્રેટરિયેટમાંથી જેણે આ સૂચના મોકલાવી છે તેને પાકિસ્તાન મોકલી દેવો જોઈએ. રાજ્યસભાના સેક્રેટરિયેટે કાઢેલા આ સર્ક્યુલરને કારણે BJPનો હિન્દુત્વનો બુરખો ફાટી ગયો છે.’

રાજ્યસભાના સેક્રેટરિયેટનાં સૂત્રોના જણાવ્યા અનુસાર આવી સૂચના ઇશ્યુ કરાઈ હોવાનું આ પહેલી વાર નથી બન્યું. આ પહેલાં નવેમ્બર ૨૦૦૫માં જ્યારે UPAની સરકાર હતી ત્યારે પણ આ સૂચના ઇશ્યુ કરવામાં આવી હતી.