ઉત્તરાખંડના આદિ કૈલાશમાં ૧૪,૫૦૦ ફુટની ઊંચાઈએ BROએ ૬ દિવસમાં પુલ બનાવ્યો

૩૦ લોકોની દિવસ-રાતની મહેનત

આ બ્રિજ આશરે ૧.૨ કરોડ રૂપિયાના ખર્ચે બાંધવામાં આવ્યો છે

આદિ કૈલાશમાં ૧૪,૫૦૦ ફુટની ઊંચાઈ પર બૉર્ડર રોડ ઑર્ગેનાઇઝેશન (BRO)એ છ દિવસમાં ૧૦૦ ફુટ લાંબો બેઇલી બ્રિજ બનાવીને નોંધપાત્ર સિદ્ધિ હાંસલ કરી છે. આ બ્રિજ આશરે ૧.૨ કરોડ રૂપિયાના ખર્ચે બાંધવામાં આવ્યો છે અને ૪૦ ટનનો લોડ-બેરિંગ બ્રિજ શિવ-પાર્વતી મંદિર નજીક પાર્વતી કુંડમાંથી નીકળતા વિંચીતી નાળા પર મુશ્કેલ ભૌગોલિક પરિસ્થિતિઓમાં ૩૦ મજૂરો દ્વારા બનાવવામાં આવ્યો હતો. આ પુલના નિર્માણથી સુરક્ષા-કર્મચારીઓ અને સ્થાનિક ગ્રામજનોને રાહત મળશે. વાહનોને હવે નાળામાંથી પસાર થવું પડશે નહીં.

BROએ બે વર્ષ પહેલાં ગુંજીથી કુટી-જ્યોલિંગકાંગ સુધીના ૩૬ કિલોમીટરના ડામરવાળા રસ્તાનું બાંધકામ પૂરું કર્યું હતું. આ રસ્તાને કારણે આદિ કૈલાશ સુધીની મુસાફરી સરળ બની છે. પાર્વતી કુંડમાંથી નીકળતા નાળા પર પુલના અભાવે અગાઉ મુશ્કેલીઓ ઊભી થઈ હતી, પરિસ્થિતિનાં જોખમો વચ્ચે વાહનોને નાળામાંથી પસાર થવું પડતું હતું.

કુટી ગામના વડા નાગેન્દ્ર સિંહ કુટિયાલે કેન્દ્ર સરકાર અને BROનો આભાર વ્યક્ત કરીને કહ્યું હતું કે અગાઉ કુટીના ગ્રામજનોને આદિ કૈલાશ પહોંચવામાં પાંચથી છ કલાક લાગતા હતા, પણ હવે રસ્તાના નિર્માણ સાથે આ સમય ઘટીને માત્ર અડધો કલાક થઈ ગયો છે.