ડાન્સ ફ્લોર પર મૃતદેહો પડ્યા હતા: ગોવા નાઈટ ક્લબની આગ, ઓછામાં ઓછા 25 લોકોના મોત

મોટાભાગના મૃત્યુ શ્વાસ રૂંધાવાને કારણે થયા હતા, કારણ કે પીડિતો ગ્રાઉન્ડ ફ્લોર પરના બેસમેન્ટમાં ફસાયેલા હતા. કુલ 25 મૃત્યુ નોંધાયા છે, જેમાંથી 23 મૃત્યુ શ્વાસ રૂંધાવાને કારણે અને બે દાઝી જવાને કારણે થયા હતા. ઘટનાસ્થળે મુખ્ય પ્રધાન પણ પહોંચ્યા છે.

વાયરલ વીડિયોમાંથી સ્ક્રીન શૉટ (તસવીર: સોશિયલ મીડિયા)

ગોવાના નાઈટક્લબમાં લાગેલી આગમાં મૃત્યુએ કેવી રીતે તબાહી મચાવી તેની માહિતી હવે સામે આવી છે. નાઈટક્લબના પ્રત્યક્ષદર્શીઓએ જણાવ્યું છે કે કેવી રીતે અચાનક જ નાઈટક્લબમાં મૃતદેહો ફ્લોર પર પડ્યા હતા. ઉત્તર ગોવાના અરપોરા વિસ્તારમાં એક નાઈટક્લબમાં આગ લાગી ત્યારે ઓછામાં ઓછા 100 લોકો ડાન્સ ફ્લોર પર હાજર હતા. એક પ્રત્યક્ષદર્શીના જણાવ્યા અનુસાર, તેમાંથી કેટલાક નીચે રસોડામાં ભાગી ગયા, જ્યાં તેઓ સ્ટાફ સાથે ફસાઈ ગયા. ગોવા પોલીસે જણાવ્યું હતું કે નાઈટક્લબમાં આગ શનિવારે મધ્યરાત્રિ પછી સિલિન્ડર વિસ્ફોટને કારણે લાગી હતી, જ્યારે કેટલાક પ્રત્યક્ષદર્શીઓએ દાવો કર્યો હતો કે ક્લબના પહેલા માળે આગ લાગી હતી, જ્યાં પ્રવાસીઓ ડાન્સ કરી રહ્યા હતા. પોલીસે અહેવાલ આપ્યો હતો કે રાજધાની પાટનગર પણજીથી 25 કિલોમીટર દૂર અરપોરામૅ એક લોકપ્રિય પાર્ટી સ્થળ, બિર્ચ બાય રોમિયો લેનમાં લાગેલી આગમાં ઓછામાં ઓછા 25 લોકો માર્યા ગયા છે.

મુખ્ય પ્રધાન પ્રમોદ સાવંતે જણાવ્યું હતું કે મોટાભાગના મૃતકો ક્લબમાં રસોડાના કામદારો હતા, જેમાં ત્રણ મહિલાઓનો સમાવેશ થાય છે. તેમણે વધુમાં જણાવ્યું હતું કે મૃતકોમાં ત્રણથી ચાર પ્રવાસીઓ પણ હતા. હૈદરાબાદના પ્રવાસી ફાતિમા શેખે રવિવારે જણાવ્યું હતું કે, "આગ લાગતાની સાથે જ અચાનક હોબાળો મચી ગયો. અમે ક્લબમાંથી બહાર દોડી ગયા અને જોયું કે આખું માળખું આગમાં લપેટાયેલું છે." તેમણે કહ્યું કે કારણ કે તે વીક એન્ડને લીધે નાઈટક્લબમાં ભીડ હતી, અને ઓછામાં ઓછા 100 લોકો ડાન્સ ફ્લોર પર હતા. શેખે કહ્યું કે આગ ફાટી નીકળ્યા પછી, કેટલાક પ્રવાસીઓ નીચે દોડી ગયા અને નાસભાગમાં, તેઓ ગ્રાઉન્ડ ફ્લોર પર રસોડામાં ગયા. તેમણે ઉમેર્યું, "લોકો અન્ય સ્ટાફ સાથે ત્યાં ફસાઈ ગયા. ઘણા લોકો ભાગી જવામાં સફળ રહ્યા." થોડી જ વારમાં, આખું ક્લબ આગની લપેટમાં આવી ગયું. તેમણે કહ્યું, "અહીં તાડના પાંદડાઓથી બનેલું એક કામચલાઉ માળખું હતું, જેમાં સરળતાથી આગ લાગી ગઈ." નાઈટક્લબ અરપોરા નદીના બેકવોટર ખાતે સ્થિત છે, અને તેના પ્રવેશ અને બહાર નીકળવાના રસ્તાઓ સાંકડા છે. સાંકડી ગલીઓને કારણે, ફાયર બ્રિગેડ ક્લબ સુધી પહોંચી શક્યું ન હતું, અને તેમના ટેન્કરો લગભગ 400 મીટર દૂર પાર્ક કરવા પડ્યા હતા. ફાયર અને ઇમરજન્સી સર્વિસના એક વરિષ્ઠ અધિકારીએ જણાવ્યું હતું કે રસ્તો સાંકડો હોવાથી સ્થળ પર પહોંચવું મુશ્કેલ બન્યું હતું, જેના કારણે આગ પર કાબુ મેળવવો મુશ્કેલ બન્યું હતું.

મોટાભાગના મૃત્યુ શ્વાસ રૂંધાવાને કારણે થયા હતા.

તેમણે કહ્યું કે મોટાભાગના મૃત્યુ શ્વાસ રૂંધાવાને કારણે થયા હતા, કારણ કે પીડિતો ગ્રાઉન્ડ ફ્લોર પરના બેસમેન્ટમાં ફસાયેલા હતા. કુલ 25 મૃત્યુ નોંધાયા છે, જેમાંથી 23 મૃત્યુ શ્વાસ રૂંધાવાને કારણે અને બે દાઝી જવાને કારણે થયા હતા. ઘટના બાદ ઘટનાસ્થળે પહોંચેલા મુખ્ય પ્રધાન સાવંતે પત્રકારોને જણાવ્યું હતું કે નાઇટક્લબે ફાયર સેફ્ટીના ધોરણોનું પાલન કર્યું નથી. સાવંતે કહ્યું કે તેઓ ઘટનાની તપાસનો આદેશ આપશે, અને ક્લબ મૅનેજમેન્ટ અને ક્લબને ચલાવવાની મંજૂરી આપનારા અધિકારીઓ સામે કાર્યવાહી શરૂ કરવામાં આવશે.

નાઇટક્લબ કોણ ચલાવતું હતું?

અરપોરા-નાગોઆ પંચાયતના સરપંચ રોશન રેડકરે કહ્યું કે ક્લબ સૌરવ લુથરા દ્વારા ચલાવવામાં આવતું હતું, જેનો તેના પાર્ટનર સાથે વિવાદ હતો. તેમણે કહ્યું, "તેમનો વિવાદ થયો હતો અને તેમણે પંચાયતમાં એકબીજા સામે ફરિયાદ નોંધાવી હતી. અમે સ્થળનું નિરીક્ષણ કર્યું અને જાણવા મળ્યું કે તેમની પાસે ક્લબ બનાવવાની પરવાનગી નહોતી." રેડકરે કહ્યું કે પંચાયતે તોડી પાડવાની નોટિસ જાહેર કરી હતી, જેને પંચાયત નિયામકમંડળના અધિકારીઓએ રોકી દીધી હતી. તેમણે કહ્યું કે સ્થળના મૂળ માલિકે લુથરાને જગ્યા સબલેપટે આપી હતી. તેમણે કહ્યું, "આગની ઘટના દુર્ભાગ્યપૂર્ણ હતી. અમે એવા સ્થળોને નોટિસ જાહેર કરી રહ્યા છીએ જે નિયમોનું ઉલ્લંઘન કરતી જોવા મળી છે. હવે, આપણે વધુ સતર્ક રહેવું પડશે." કેલાંગુટના ભાજપના ધારાસભ્ય માઈકલ લોબોએ ઘટના બાદ સ્થળની મુલાકાત લીધી હતી. તેમણે કહ્યું કે સ્થાનિક પંચાયતો આવી ઘટનાઓ ફરી ન બને તે માટે તમામ નાઈટ ક્લબનું ફાયર સેફ્ટી ઓડિટ કરશે. તેમણે કહ્યું કે કેલાંગુટ પંચાયત સોમવારે તમામ નાઈટ ક્લબને નોટિસ જારી કરશે, જેમાં તેમને ફાયર સેફ્ટી પરવાનગી આપવાનું કહેવામાં આવશે.