કૅનેડામાં કપિલ શર્માની કૅફે પર ગોળીબાર કેસમાં મુખ્ય કાવતરાખોરની દિલ્હીમાં ધરપકડ

બંધુ માન સિંહ સેખોં

કૅનેડાના સરેમાં આવેલી કપિલ શર્માની કૅપ્સ કૅફેમાં થયેલા ગોળીબારના ૩ કેસમાં સંડોવાયેલા મુખ્ય કાવતરાખોરની દિલ્હી પોલીસની ક્રાઇમ બ્રાન્ચે ધરપકડ કરી છે. ક્રાઇમ બ્રાન્ચની ટીમે ગોલ્ડી ઢિલ્લોં ગૅન્ગના મુખ્ય મેમ્બર બંધુ માન સિંહ સેખોંને પકડી લીધો હતો અને તેની પાસેથી ચાઇનીઝ PX-3 પિસ્તોલ જપ્ત કરવામાં આવી હતી. આ કૅફેમાં જુલાઈ, ઑગસ્ટ અને ઑક્ટોબર એમ ૩ વાર ગોળીબારની ઘટના બની હતી. ઑક્ટોબરમાં થયેલી ગોળીબારની ઘટના અગાઉના બે ગોળીબાર પછી કૅફે ફરી ખૂલ્યાનાં માંડ બે અઠવાડિયાં પછી બની હતી.

છેલ્લી ઘટના પછી કૅફેની બહાર સુરક્ષા માટે પોલીસ-વાહન તહેનાત કરવામાં આવ્યું હતું, મોબાઇલ ક્લોઝ્ડ સર્કિટ ટેલિવિઝન (CCTV) સ્ટેશન મૂકવામાં આવ્યું હતું અને સરે પોલીસે સુરક્ષાનું વચન આપ્યું હતું.

આ ગોળીબારનો દાવો લૉરેન્સ બિશ્નોઈ ગૅન્ગના ગોલ્ડી ઢિલ્લોં અને કુલવીર સિદ્ધુએ કર્યો હતો. આ ગૅન્ગે ગોળીબારનો એક વિડિયો પણ બહાર પાડ્યો હતો, જેમાં તેઓ ઑટોમૅટિક પિસ્તોલનો ઉપયોગ કરીને કારની અંદરથી અનેક ગોળીબાર કરતા જોવા મળ્યા હતા.