કેરલામાં સ્કાય-ડાઇનિંગનું ટેબલ ૧૫૦ ફુટ ઊંચે હવામાં જ અટકી ગયું

ક્રેનમાં ખામી આવતાં ચાર ટૂરિસ્ટો અને સ્ટાફ-મેમ્બર્સને દોરડાથી રેસ્ક્યુ કરવા પડ્યા

ટૂરિસ્ટો અને સ્ટાફ-મેમ્બર્સ બે કલાક સુધી હવામાં અધ્ધર રહ્યા હતા

કેરલાના મુન્નારમાં આવેલી એક સ્કાય-ડાઇનિંગ રેસ્ટોરાંમાં ગઈ કાલે બપોરે ખરાબી આવતાં ટૂરિસ્ટો અને સ્ટાફનો જીવ અધ્ધર થઈ ગયો હતો. બપારે દોઢ વાગ્યે ડાઇનિંગ ટેબલને ક્રેન વડે હવામાં ઊંચે ઉઠાવવામાં આવ્યું હતું અને લગભગ ૧૨૦થી ૧૫૦ ફુટ ઊંચે લઈ જવાયું હતું. જોકે ડાઇનિંગ એક્સ્પીરિયન્સ પછી એને નીચે ઉતારવા જતાં હાઇડ્રોલિક ક્રેન ખરાબ થઈ જતાં ટૂરિસ્ટો અને સ્ટાફ-મેમ્બર્સ બે કલાક સુધી હવામાં અધ્ધર રહ્યા હતા. ફાયર અને રેસ્ક્યુ ટીમે છેક ૪ વાગ્યે રેસ્ક્યુ ઑપરેશન શરૂ કર્યું હતું. રાહતકર્મીઓએ રસ્સીના સહારે ઉપર ચડીને વારાફરતી ફસાયેલા લોકોને દોરડાની મદદથી સેફ ઉતાર્યા હતા.