મીરા-ભાઈંદર ડ્રગ્સ કેસમાં મુંબઈ ક્રાઇમ બ્રાન્ચનો સપાટો, અનેક રાજ્યોમાં પાડી રેઇડ

ડ્રગ્સનું નેટવર્ક પકડવામાં મળી મોટી સફળતા : ગુજરાત અને તામિલનાડુમાં ડ્રગ્સ બનાવતી લૅબોરેટરી પકડી પાડી

પ્રતીકાત્મક તસવીર

મીરા રોડમાં ગયા મહિને ફિરદોસ અરબાઝ કુરેશીના ઘરેથી ૧.૩૨૪ કિલો મેફેડ્રોન (MD) જપ્ત કર્યા બાદ વધુ પૂછપરછ અને તપાસ કરતાં ડ્રગ્સના ગોરખધંધામાં સંડોવાયેલા અન્ય ૧૫ જણની ધરપકડ કરવામાં આવી હતી અને કુલ ૬.૭૭૩ કિલો MD જપ્ત કરવામાં આવ્યું હતું. ઊંડાણપૂર્વક તપાસ કરતાં ડ્રગ્સનું આ નેટવર્ક વિવિધ રાજ્યોમાં ફેલાયેલું હોવાનું અને ત્યાંથી મુંબઈ લાવવામાં આવતું હોવાનું પોલીસને જણાયું હતું. ઝીણવટપૂર્વક તપાસ કર્યા બાદ વિગતો મેળવીને મુંબઈ ક્રાઇમ બ્રાન્ચે મુંબઈ ઉપરાંત થાણે, ગુજરાત, તામિલનાડુમાં જ્યાં આ ડ્રગ્સ બનાવાય છે એ લૅબોરેટરીઓમાં રેઇડ પાડી હતી અને ડ્રગ્સનું નેટવર્ક ઉઘાડું પાડ્યું હતું. ક્રાઇમ બ્રાન્ચે આ મામલે મુંબઈ ઉપરાંત અન્ય રાજ્યોથી આરોપીઓની ધરપકડ કરી વધુ તપાસ શરૂ કરી છે. 

મુંબઈમાં પકડાયેલા આરોપીઓએ વટાણા વેર્યા
મુંબઈમાં આગ્રીપાડા, જોગેશ્વરી, માલવણી ઉપરાંત મનોરીમાં પકડાયેલા આરોપીઓએ રાજકોટ, તામિલનાડુના ગોબીચેટ્ટી પલયમ સહિતનાં ઠેકાણાંઓનાં નામ આપ્યાં હતાં, જ્યાં ડ્રગ્સ બનાવવામાં આવતું હતું તેમ જ મુંબઈમાં ડ્રગ્સ બનાવવા માટે કાચો માલ પૂરો પડાતો હતો.

ચીન સુધી પહોંચ્યા છે છેડા
ક્રાઇમ બ્રાન્ચે કરેલી તપાસ અનુસાર ડ્રગ્સ બનાવવા માટે વપરાતો કાચો માલ ચીનથી લાવવામાં આવતો હતો. મનોરીમાં અત્યંત ગુપ્ત સ્થળે ચલાવવામાં આવતી લૅબોરેટરી ઉપરાંત અન્ય રાજ્યોમાં ચાલતી ડ્રગ્સ બનાવવાની ફૅક્ટરી-લૅબોરેટરીમાં ચીનથી માલ પહોંચાડાતો હતો, જેનું પેમેન્ટ ક્રિપ્ટોકરન્સીથી થતું હતું.