શાંતિ અને સંહાર બન્નેની શિક્ષા આપે છે ગીતા

કર્ણાટકના ઉડુપીમાં એક લાખ લોકો સાથે ગીતાપઠન કર્યા પછી નરેન્દ્ર મોદીએ કહ્યું, `શાંતિ અને સંહાર બન્નેની શિક્ષા આપે છે ગીતા` : ગોવામાં ભગવાન શ્રી રામની વિશ્વની સૌથી ઊંચી ૭૭ ફુટની મૂર્તિનું થયું અનાવરણ

શ્રીકૃષ્ણના રંગે રંગાયેલા મોરપિંચ્છની પાઘડી સાથે નરેન્દ્ર મોદી

વડા પ્રધાન નરેન્દ્ર મોદી ગઈ કાલે કર્ણાટકના ઉડુપીમાં શ્રીકૃષ્ણ મઠની મુલાકાતે ગયા હતા. ત્રણ કિલોમીટર લાંબો રોડ-શો કર્યા પછી તેઓ શ્રીકૃષ્ણ મઠમાં પહોંચ્યા હતા. ત્યાં પૂજા-અર્ચના કરી સુવર્ણ તીર્થ મંડપનું ઉદ્ઘાટન કરીને સોનાનો કળશ ચડાવ્યો હતો. એ પછી લક્ષ કંઠા ગીતા પારાયણનો ભવ્ય અને દિવ્ય કાર્યક્રમ થયો. એમાં એક લાખ લોકોએ એકસાથે શ્રીમદ ભગવદ્ગીતાના પાઠનું પઠન કરતાં વાતાવરણમાં અલૌકિક દિવ્યતા છવાઈ ગઈ હતી.

ઉડુપીમાં નરેન્દ્ર મોદી એકદમ શ્રીકૃષ્ણના રંગે રંગાયેલા હતા. તેમણે મોરપીંછથી સજાવેલી પાઘડી માથે પહેરી હતી અને પછી જનતાને સંબોધન કરતાં કહ્યું હતું કે ‘જ્યારે એક લાખ કંઠ એક જ સ્વરે આ  શ્લોકોનું ઉચ્ચારણ કરે છે ત્યારે એક-એક દૈવીય શબ્દ એકસાથે ગુંજે છે અને એવી ઊર્જા પેદા થાય છે જે આપણા મન અને મસ્તિષ્કને નવાં સ્પંદનો અને નવી શક્તિ આપે છે.’

લક્ષ કંઠ ગીતા પારાયણમાં શ્રીકૃષ્ણના જીવનની વાતો

શ્રીકૃષ્ણ મઠમાં લક્ષ કંઠા ગીતા પારાયણમાં સામૂહિક શ્રીમદ ભગવદ્ગીતાનો પાઠ કરી રહેલા નરેન્દ્ર મોદી

કરતાં-કરતાં નરેન્દ્ર મોદીએ દેશની સુરક્ષાની નીતિઓ વિશે વાત કરતાં કહ્યું હતું કે ‘ગીતા આપણને શાંતિ અને સત્ય માટે પ્રયાસ કરવાની અને અત્યાચાર કરનારાઓને કચડી નાખવાની શિક્ષા આપે છે. આપણે વસુધૈવ કુટુમ્બકમમાં વિશ્વાસ કરીએ છીએ તો સાથે ‘ધર્મો રક્ષતિ રક્ષિતઃ’નો મંત્ર પણ જપીએ છીએ. ગીતા શાંતિ જાળવવાની, પરંતુ ખરાબ તત્ત્વોનો સંહાર કરવાની શિક્ષા આપે છે. લાલ કિલ્લા પરથી કૃષ્ણના કરુણાના સંદેશનો પ્રચાર અને મિશન સુદર્શન ચક્રની ઘોષણા બન્ને કરી ચૂક્યા છીએ.’

ગોવામાં શ્રીરામની મૂર્તિનું અનાવરણ

ગોવાના શ્રી સંસ્થાન ગોકર્ણ જીવોત્તમ મઠમાં ગઈ કાલે ૭૭ ફુટની શ્રીરામની મૂર્તિના અનાવરણ સમયે નરેન્દ્ર મોદી અને ગોવાના મુખ્ય પ્રધાન પ્રમોદ સાવંત

ગઈ કાલે સાંજે ૪ વાગ્યે ગોવાના કૅનાકોનામાં શ્રી સંસ્થાન ગોકર્ણ જીવોત્તમ મઠમાં પૂજા કરીને નરેન્દ્ર મોદીએ ભગવાન શ્રી રામની ૭૭ ફુટ ઊંચી કાંસ્યની પ્રતિમાનું અનાવરણ કર્યું હતું. શ્રી રામ ભગવાનની આ મૂર્તિ દુનિયાની સૌથી ઊંચી છે. આ મૂર્તિ એ જ કલાકાર રામ સુતારે બનાવી છે જે વડોદરા પાસેના સ્ટૅચ્યુ ઑફ યુનિટીના પણ ડિઝાઇનર છે. તેમણે મઠમાં બનેલા રામાયણ થીમના પાર્કનું પણ ઉદ્ઘાટન કર્યું હતું.