ઉત્તર પ્રદેશમાં મિર્ઝાપુર જિલ્લાનું નામ બદલીને વિંધ્યાચલધામ કરવાની માગણી

વેબસિરીઝ ‘મિર્ઝાપુર’ પછી એનું નામ કલંકિત થવાને પગલે મિર્ઝાપુરનું નામ બદલવાની માગણી ઝડપથી વધી રહી છે

ફાઇલ તસવીર

ઉત્તર પ્રદેશમાં યોગી આદિત્યનાથ સરકારે ફૈઝાબાદનું નામ અયોધ્યા અને અલાહાબાદનું નામ પ્રયાગરાજ કર્યા બાદ હવે મિર્ઝાપુરનું પણ નામ બદલીને વિંધ્યાચલધામ કરવાની માગણી થઈ છે. વેબસિરીઝ ‘મિર્ઝાપુર’ પછી એનું નામ કલંકિત થવાને પગલે મિર્ઝાપુરનું નામ બદલવાની માગણી ઝડપથી વધી રહી છે. ગુરુવારે મિર્ઝાપુર જિલ્લા વહીવટી સંકલન સમિતિની બેઠકમાં મિર્ઝાપુર જિલ્લાનું નામ બદલવા પર સર્વસંમતિ થઈ હતી. આ બેઠકમાં યોગી સરકારના કૅબિનેટપ્રધાન નંદ ગોપાલ નંદીએ જિલ્લા વહીવટી તંત્રને પ્રસ્તાવ રજૂ કરવાનો નિર્દેશ આપ્યો હતો. નોંધનીય છે કે મિર્ઝાપુર જિલ્લામાં વિંધ્યાચલ રેલવે-સ્ટેશનનું નામ બદલીને હવે વિંધ્યાચલધામ રેલવે-સ્ટેશન તરીકે ઓળખાય છે. સ્ટેશનનું નામ બદલાયા બાદ લોકો જિલ્લાનું નામ પણ બદલવાની માગણી કરી રહ્યા છે. લોકોનું કહેવું છે કે મિર્ઝાપુર જિલ્લો અન્ય રાજ્યોમાં વિંધ્યાચલધામ નામથી ઓળખાય છે તેથી જિલ્લાનું નામ વિંધ્યાચલના નામ પરથી રાખવું જોઈએ.

મિર્ઝાપુર મોગલ યુગનું નામ છે જેનું નામ શાસક મીરજાફરના નામ પરથી રાખવામાં આવ્યું છે. હકીકતમાં આ શહેર દેવી વિંધ્યાચલવાસિનીનું શહેર હોવાથી નામ બદલવાથી વિંધ્યાચલધામની પ્રતિષ્ઠામાં વધારો થશે. મિર્ઝાપુર જિલ્લાનું જૂનું નામ ગિરજાપુર હતું. લોકોનું કહેવું છે કે જો ફૈઝાબાદનું નામ બદલીને અયોધ્યા કરી શકાય છે તો મિર્ઝાપુરનું નામ પણ વિંધ્યાચલધામ રાખવું જોઈએ.