ચેન્નઈની રિયલ એસ્ટેટ કંપની વાર્ષિક રિવૉર્ડ તરીકે ૧૦૦૦ કર્મચારીઓને લંડન ફરવા લઈ જશે

ચેન્નઈની રિયલ એસ્ટેટ કંપની વાર્ષિક રિવૉર્ડ તરીકે ૧૦૦૦ કર્મચારીઓને લંડન ફરવા લઈ જશે

લંડનની એક વીકની સ્પૉન્સર્ડ ટ્રિપ પર વેકેશન માણશે કર્મચારીઓ

દર વર્ષે સારું કામ કરતા કર્મચારીઓને પ્રોત્સાહન આપવા માટે દરેક કંપની કંઈક ને કંઈક કરતી હોય છે. જોકે ચેન્નઈની કાસાગ્રૅન્ડ નામની રિયલ એસ્ટેટ કંપની વાર્ષિક રિવૉર્ડ તરીકે ૧૦૦૦ કર્મચારીઓને લંડનની એક વીકની સ્પૉન્સર્ડ ટ્રિપ પર વેકેશન માણવા લઈ જવાની છે. કંપનીનું કહેવું છે કે પ્રૉફિટ-શૅરિંગ બોનાન્ઝાની પહેલ તરીકે તેમની કંપનીના ૬૦૦૦થી વધુ ટીમ-મેમ્બર્સ અત્યાર સુધીમાં સિંગાપોર, થાઇલૅન્ડ, મલેશિયા, દુબઈ, સ્પેન અને અન્ય ઘણી જગ્યાઓએ ફરી ચૂક્યા છે. આ એવો અનુભવ હોય છે જેને ઘણા લોકો જિંદગી બદલનારો અને યાદગાર ગણાવે છે. છેલ્લાં કેટલાંક વર્ષોથી વાર્ષિક રિવૉર્ડની પરંપરા વધુ ને વધુ મોટી થતી જઈ રહી છે. આનાથી કંપનીમાં કર્મચારીઓનો પરસ્પર વિશ્વાસ મજબૂત થાય છે અને તેઓ કંપનીની સફળતા માટે પૂરું યોગદાન આપે છે. આ વખતે યાદગાર અનુભવ આપવા માટે લંડનની ટ્રિપની તૈયારી કરવામાં આવી છે. ભારત અને દુબઈની ઑફિસના કર્મચારીઓને એકસાથે લંડન લઈ જવાનો અનુભવ ખાસ કારણોસર યોજાયો છે. આ માટે અલગ-અલગ બૅચમાં કુલ ૧૦૦૦ કર્મચારીઓને લંડન શહેરનાં હિસ્ટોરિકલ, કલ્ચરલ અને અટ્રૅક્ટિવ પાસાંઓની ટૂર કરાવવામાં આવશે જે સંપૂર્ણપણે કંપની દ્વારા સ્પૉન્સર્ડ હશે. લંડનનાં તમામ આકર્ષણોની મુલાકાત પછી છેલ્લે થેમ્સ રિવરની ક્રૂઝ પર ટૂર ખતમ થશે.