ખરાબ થઈ ગયેલા પાકના વીમાની રકમ ન મળતાં ખેડૂતે ખેતરમાં ૫૦૦ રૂપિયાની નોટ વાવી

ખેડૂતોને થતી મુશ્કેલીઓ પ્રત્યે ધ્યાન ખેંચવા માટે દેવરિયા જાટાન ગામના મલ્લારામ બાવરી નામના ભાઈએ આ ગતકડું કર્યું હતું

ખેતરમાં થોડા-થોડા અંતરે નોટોને જમીનમાં ખોસીને એની વાવણી કરતો વિડિયો સોશ્યલ મીડિયા પર મૂક્યો હતો

રાજસ્થાનના નાગોર જિલ્લાના એક ખેડૂતે પાકના વીમાની રકમ ન મળતાં વિરોધ-પ્રદર્શન માટે પોતાના ખેતરમાં ૫૦૦-૫૦૦ રૂપિયાની નોટો વાવી હતી. તેણે ખેતરમાં થોડા-થોડા અંતરે નોટોને જમીનમાં ખોસીને એની વાવણી કરતો વિડિયો સોશ્યલ મીડિયા પર મૂક્યો હતો. કુદરતી આપદાઓમાં પાક તૈયાર થઈ ગયા પછી નાશ પામે ત્યારે ખેડૂતોને ખૂબ નુકસાન થતું હોય છે. ખેડૂતોને થતી મુશ્કેલીઓ પ્રત્યે ધ્યાન ખેંચવા માટે દેવરિયા જાટાન ગામના મલ્લારામ બાવરી નામના ભાઈએ આ ગતકડું કર્યું હતું. તેમણે ખેતરમાં કપાસ ઉગાડવા માટે બૅન્કમાંથી એક લાખ રૂપિયાની લોન લીધી હતી, પરંતુ કમોસમી વરસાદમાં ખેતરમાં પાણી ભરાઈ ગયાં અને પાક બરબાદ થઈ ગયો. તેમના ખેતરમાંથી જે પાક મળ્યો એમાંથી માત્ર ૪૦૦૦ રૂપિયા મળ્યા હતા. તેમણે વીમા-કંપનીમાં વળતર માટે દાવો કર્યો હતો, પણ કોઈ અધિકારી નુકસાનનો અંદાજ લગાવવા ખેતરમાં આવ્યો જ નહીં. આખરે તેમણે જે રૂપિયા મળ્યા હતા એને જ માટીમાં રોપવાનો સ્ટન્ટ કર્યો અને લોકોનું ધ્યાન તેમની તરફ ખેંચાયું.