29 November, 2025 01:35 PM IST | Mumbai | Gujarati Mid-day Correspondent
લૉરા વૉલ્વાર્ટ
દિલ્હી કૅપિટલ્સના માલિક પાર્થ જિન્દલે દિલ્હી કૅપિટલ્સના કૅપ્ટનપદ વિશે મોટી સ્પષ્ટતા કરી છે. ૩ વખત ફાઇનલમાં પહોંચાડનાર કૅપ્ટન મેગ લૅનિંગને દિલ્હી કૅપિટલ્સ ઑક્શનમાં ખરીદવામાં નિષ્ફળ રહ્યું હતું. મેગ લૅનિંગને યુપી વૉરિયર્સે ૧.૯ કરોડ રૂપિયામાં ખરીદી છે.
સાઉથ આફ્રિકાની કૅપ્ટન લૉરા વૉલ્વાર્ટને ૧.૧ કરોડ રૂપિયામાં ખરીદીને દિલ્હીએ અનુભવી વિદેશી બૅટરની જગ્યા ભરી દીધી હતી. જોકે સાઉથ આફ્રિકાને વન-ડે વિમેન્સ વર્લ્ડ કપની ફાઇનલ સુધી પહોંચાડનાર વૉલ્વાર્ટને કૅપ્ટન્સી મળશે નહીં.
દિલ્હી કૅપિટલ્સના માલિક પાર્થ જિન્દલે કહ્યું હતું કે ‘મને લાગે છે કે અમે એક ભારતીય કૅપ્ટન રાખવા માગીએ છીએ. અમે પહેલાંથી જ અમારું મન બનાવી લીધું છે, પરંતુ અમે જોઈશું કે આગળ શું થાય છે. લૉરા વૉલ્વાર્ટ ડ્રેસિંગ રૂમમાં ઘણું નેતૃત્વ લાવશે, પરંતુ અમે સ્પષ્ટ છીએ કે અમે એક ભારતીય કૅપ્ટન સાથે જવા માગીએ છીએ.’
વૉલ્વાર્ટ પહેલી ત્રણ સીઝનમાં ગુજરાત જાયન્ટ્સનો ભાગ હતી. આ ટીમમાં જેમિમા રૉડ્રિગ્સ, શફાલી વર્મા, નિકી પ્રસાદ, શ્રી ચારણી અને સ્નેહ રાણા જેવા સ્ટાર ભારતીય પ્લેયર છે.