અશોક ચક્ર વિજેતા શહીદ મેજર મોહિત શર્માનાં માતા-પિતાએ અપીલ કરીને કહ્યું છે કે આ ફિલ્મ તેમના પુત્રના જીવન પરથી પ્રેરિત લાગે છે અને એ માટે ફિલ્મમેકર્સે સત્તાવાર પરવાનગી લીધી નથી
રણવીર સિંહની આગામી ફિલ્મ ‘ધુરંધર’
રણવીર સિંહી આગામી ફિલ્મ ‘ધુરંધર’ પાંચમી ડિસેમ્બરે રિલીઝ થવાની છે પણ હવે આ ફિલ્મ રિલીઝ પહેલાં વિવાદમાં ફસાઈ છે. તાજેતરમાં અશોક ચક્ર વિજેતા શહીદ મેજર મોહિત શર્માનાં માતા-પિતાએ દિલ્હી હાઈ કોર્ટમાં અરજી દાખલ કરીને ફિલ્મની રિલીઝ અટકાવવાની માગણી કરી છે. તેમની અરજીમાં દાવો કરવામાં આવ્યો છે કે ‘ધુરંધર’ તેમના પુત્રના જીવન પરથી પ્રેરિત લાગે છે અને એ માટે ફિલ્મમેકર્સે કોઈ પણ પ્રકારની સત્તાવાર પરવાનગી લીધી નથી. આ અરજીમાં માહિતી અને પ્રસારણ મંત્રાલય, સેન્ટ્રલ બોર્ડ ઑફ ફિલ્મ સર્ટિફિકેશન, ભારતીય સેનાથી લઈને ફિલ્મના દિગ્દર્શક અને નિર્માતાઓને પક્ષકાર બનાવવામાં આવ્યા છે.
આ પહેલાં મેજર મોહિત શર્માના ભાઈ મધુર શર્માએ સોશ્યલ મીડિયા પર ડિરેક્ટર આદિત્ય ધરને ટૅગ કરીને પૂછ્યું હતું કે ફિલ્મ કોઈ અન્ડરકવર જાસૂસ પર આધારિત છે કે નહીં. એના જવાબમાં આદિત્ય ધરે સ્પષ્ટતા કરી હતી કે ‘ધુરંધર’ મેજર મોહિત શર્માના જીવન પર આધારિત નથી અને આ તેમની સત્તાવાર સ્પષ્ટતા છે. આદિત્ય ધરે વધુમાં જણાવ્યું હતું કે જો ભવિષ્યમાં તેમની બાયોપિક બનાવવામાં આવશે તો પરિવાર સાથે સંપૂર્ણ ચર્ચા કર્યા બાદ જ બનાવવામાં આવશે જેથી રાષ્ટ્ર માટે તેમના બલિદાન અને તેમના અમૂલ્ય વારસાને યોગ્ય સન્માન આપી શકાય.
