તેના વિરુદ્ધ સોશ્યલ મીડિયા પર જે કન્ટેન્ટ ચાલી રહી છે એના વિરુદ્ધ તેણે કેસ કર્યો છે
શિલ્પા શેટ્ટી
રાજ કુંદ્રાના પૉર્નોગ્રાફી કેસમાં શિલ્પા શેટ્ટી કુંદ્રાને લઈને જે પણ કન્ટેન્ટ સોશ્યલ મીડિયામાં વાઇરલ થાય છે એને જોતાં તેણે કોર્ટમાં કેસ દાખલ કર્યો છે. પૉર્નોગ્રાફીના મામલામાં રાજની ૧૯ જુલાઈએ ધરપકડ કરવામાં આવી છે. તે હજી પણ જેલમાં જ છે. સાથે જ જુહુમાં આવેલા તેમના બંગલો પર પણ દરોડા પાડીને રાજ અને શિલ્પાની ગહન પૂછપરછ કરવામાં આવી હતી. પૉર્નોગ્રાફી કેસ જ્યારથી પ્રકાશમાં આવ્યો છે ત્યારથી રાજ અને શિલ્પાની ચારેય બાજુ નિંદા થઈ રહી છે. એથી સોશ્યલ મીડિયામાં સતત તેને લઈને અપમાનજનક કન્ટેન્ટ આવતાં શિલ્પાએ હાઈ કોર્ટમાં વિવિધ મીડિયા હાઉસ વિરુદ્ધ માનહાનિનો દાવો કર્યો છે. સાથે જ તેણે ફેસબુક અને ઇન્સ્ટાગ્રામ વિરુદ્ધ પણ કેસ કર્યો છે. ફરિયાદ કરવાની સાથે જ તેણે કેટલાક મીડિયા હાઉસને તેના વિશેની તમામ કન્ટેન્ટ ડિલીટ કરવાની સાથે જ ૨૫ કરોડ રૂપિયા વળતર પેટે પણ માગ્યા છે. તેનું કહેવું છે કે આવી કન્ટેન્ટને કારણે તેના ફૅન્સ, ફૉલોઅર્સ, બ્રૅન્ડ-એન્ડોર્સમેન્ટ કંપનીઓ, બિઝનેસ અસોસિએટ્સ અને ફ્રેન્ડ્સની વચ્ચે તેની છબી ખરડાઈ છે. સાથે જ તેનાં બાળકો, તેનાં વૃદ્ધ મા-બાપ અને સગાંસંબંધીઓને પણ લોકોની અવમાનનાનો સામનો કરવો પડે છે અને તેના બિઝનેસ અને પ્રોફેશનલ સ્તરે માઠી અસર પડી છે.