ધર્મેન્દ્રની યાદમાં ગુરુવારે બાંદરાસ્થિત તાજ લૅન્ડ્સ એન્ડ હોટેલમાં એક પ્રાર્થનાસભાનું આયોજન કરવામાં આવ્યું હતું. આ પ્રાર્થનાસભામાં સની દેઓલ અને બૉબી દેઓલ સહિત પરિવારના સભ્યો જોવા મળ્યા હતા.
ધર્મેન્દ્રની પ્રાર્થનાસભામાં હેમા માલિની અને તેમની દીકરીઓ ગેરહાજ,ઘરે રાખ્યાં ભજન
ધર્મેન્દ્રની યાદમાં ગુરુવારે બાંદરાસ્થિત તાજ લૅન્ડ્સ એન્ડ હોટેલમાં એક પ્રાર્થનાસભાનું આયોજન કરવામાં આવ્યું હતું. આ પ્રાર્થનાસભામાં સની દેઓલ અને બૉબી દેઓલ સહિત પરિવારના સભ્યો જોવા મળ્યા હતા. આ પ્રાર્થનાસભામાં ધર્મેન્દ્રને શ્રદ્ધાંજલિ આપવા માટે બૉલીવુડના અનેક સ્ટાર્સ પહોંચ્યા હતા. જોકે અહીં ધર્મેન્દ્રનાં બીજાં પત્ની હેમા માલિની તેમ જ દીકરીઓ એશા દેઓલ અને આહના દેઓલ જોવા મળ્યાં નહોતાં. પ્રાર્થનાસભામાં હેમા માલિની અને તેમની દીકરીઓની ગેરહાજરી ચર્ચાનો મુદ્દો બની હતી.
રિપોર્ટ પ્રમાણે હેમા માલિનીએ જુહુના પોતાના ઘરે ધર્મેન્દ્ર માટે અલગથી ભજન અને ગીતાપાઠ રાખ્યાં હતાં. ગોવિંદાની પત્ની સુનીતા આહુજા, મધુ શાહ અને એશા દેઓલના ભૂતપૂર્વ પતિ ભરત તખ્તાણીએ આ કાર્યક્રમમાં હાજરી આપી હતી. સુનીતાએ આ દુખદ પળો વિશે જણાવ્યું હતું કે ‘હેમાજીએ ગીતાપાઠ અને ભજનનું આયોજન કરાવ્યું હતું. બધાં ભજન સાંભળીને હું હેમાજી સામે રડતી જ રહી, મારી આંખમાંથી આંસુ અટકતાં જ નહોતાં.’
જોકે હેમા માલિની દ્વારા અલગથી પ્રાર્થનાસભાનું આયોજન કરવા વિશે કોઈ ઔપચારિક આમંત્રણ કે સત્તાવાર માહિતી સામે આવી નથી.
ધર્મેન્દ્રને શ્રદ્ધાંજલિ આપવા માટે જ બનશે અપને 2
ધર્મેન્દ્રના નિધન પછી ‘અપને’ના ડિરેક્ટર અનિલ શર્માએ જાહેર કર્યું હતું કે ધર્મેન્દ્ર વગર હવે ‘અપને 2’ નહીં બનાવવામાં આવે, પણ લેટેસ્ટ રિપોર્ટ પ્રમાણે ફિલ્મના પ્રોડ્યુસર દીપક મુકુટે સ્પષ્ટતા કરી છે કે ધર્મેન્દ્રને શ્રદ્ધાંજલિ આપવા માટે ‘અપને 2’ બનાવવામાં આવશે. પ્રોડ્યુસર દીપક મુકુટે સત્તાવાર નિવેદન આપતાં કહ્યું હતું કે ‘લોકોએ ‘અપને 2’ વિશે અફવા ફેલાવવાનું બંધ કરવું જોઈએ. ‘અપને 2’ બંધ નથી થઈ. એના પર સતત કામ ચાલી રહ્યું છે અને ખૂબ મહેનતથી તૈયારીઓ ચાલી રહી છે. આ પ્રોજેક્ટને બંધ કરવાનો કોઈ સવાલ જ નથી. આ માત્ર એક ફિલ્મ નથી, અમારી એક ભાવનાત્મક સફર છે, જેને અટકાવી ન શકાય. ‘અપને’નું જોડાણ ધર્મેન્દ્રજી સાથે છે. તેમના આશીર્વાદ, તેમની હાજરી અને તેમનો આત્મીય સ્પર્શ હજી પણ અમારી સાથે છે. ‘અપને 2’ મારા દિલની ખૂબ નજીક છે અને અમે આ સીક્વલને સંપૂર્ણ રીતે એન્જૉય કરવા માગીએ છીએ.’
