ચહેરાના વાળને દૂર કરવા એને હાઇલાઇટ કરતા હેર આઇડેન્ટિફાયર સ્પ્રે વિશે જાણો છો?

આ સ્પ્રે બ્યુટી- કૉન્શિયસ લોકોમાં પ્રિય થઈ રહ્યો છે ત્યારે એનાં પ્લસ-માઇનસ જાણી લો

પ્રતીકાત્મક તસવીર

ઇન્ટરનેટ પર છેલ્લાં કેટલાંક અઠવાડિયાંથી એક અદ્ભુત બ્યુટી-હૅક ચર્ચામાં છે, એવો નુસખો જેને જોઈને લોકો આશ્ચર્યમાં પડે છે કે ‘અરે, આ પણ શક્ય છે?’ નવી જનરેશન હવે મેકઅપ અથવા ફિલ્ટર નહીં પણ એક સ્પ્રેનો સહારો લઈ રહી છે. એવો સ્પ્રે જે હકીકતમાં વાળ છુપાવતો નથી પરંતુ એને વધુ દેખાડે છે! ‘હેર આઇડેન્ટિફાયર સ્પ્રે’નું નામ સાંભળતાં જ ઘણા લોકો ચોંકી જાય છે પરંતુ સોશ્યલ મીડિયા એને એક એવા ટ્રેન્ડ તરીકે રજૂ કરે છે જે પર્ફેક્ટ ફેશ્યલ શેવિંગના સીક્રેટ તરીકે વાઇરલ થઈ રહ્યો છે. ૬ લાખ કરતાં વધારે ફૉલોઅર ધરાવતી સોશ્યલ મીડિયા ઇન્ફ્લુએન્સર પ્રબલીન કૌર બોમરાહનો હેર-આઇન્ડેન્ટિફાયરનો વિડિયો લાખો લોકો જોઈ ચૂક્યા છે અને શક્યતઃ લોકો આ પ્રોડક્ટનો ઉપયોગ પણ કરી રહ્યા હશે. રોજિંદી સ્કિન-કૅરમાં આવી નવી ટેક્નિકો બહુ ઝડપથી ઘૂસી જતી હોય છે. એનો ઉપયોગ કર્યા બાદ યુવાનો ક્રાઇસિસ મૅનેજમેન્ટનાં સાધનો શોધતા હોય છે. ચહેરા પરના લગભગ ન દેખાતા વાળને હાઇલાઇટ કરીને એને દૂર કરવાની ખરેખર જરૂર છે? જો દૂર કરવાની જરૂર હોય તો શું આ સ્પ્રે મદદરૂપ છે? આવી પ્રોડક્ટ જે રાતોરાત વાઇરલ થઈ જાય છે એની વિશ્વસનીયતા કેટલી? આ બધા સવાલોના જવાબ નિષ્ણાત પાસેથી જાણીએ.

યુઝફુલ કૉસ્મેટિક ટૂલ

ADVERTISEMENT

માટુંગામાં ૧૫ કરતાં વધારે વર્ષથી ભોજાણી ક્લિનિકમાં પ્રૅક્ટિસ કરતાં ડર્મેટોલૉજિસ્ટ ડૉ. રેશમ ભોજાણી કહે છે, ‘હેર આઇડેન્ટિફાયર સ્પ્રે એક બહુ જ સરળ કૉસ્મેટિક ટૂલ કહી શકાય જે વેલસ હેર અથવા તો પીચ ફઝ તરીકે ઓળખાતા ચહેરા પરના બારીક વાળને હાઇલાઇટ કરે છે. એમાં પિગમેન્ટ્સ હોય છે જે ટેમ્પરરી આ નાના વાળને હાઇલાઇટ કરે છે. એનો ઉપયોગ એકદમ ક્લીન શેવિંગ કરવા માટે કરી શકાય છે. તેમ જ ડર્માપ્લાનિંગમાં પણ મદદરૂપ થાય છે. આ એક ખૂબ લોકપ્રિય સ્કિન-ટ્રીટમેન્ટ છે જેમાં એક સ્ટરાઇલ, મેડિકલ-ગ્રેડ બ્લેડની મદદથી ચહેરાની ઉપરની મૃત ત્વચાના લેયર અને નાજુક વેલસ હેર ધીમેથી સ્ક્રૅપ કરવામાં આવે છે. આ પ્રક્રિયા સંપૂર્ણપણે પેઇનલેસ, ઝડપી અને નીડલ-ફ્રી છે.’

તો શું આ સુરક્ષિત છે?

આ સ્પ્રેનો સાચી રીતે ઉપયોગ કરવા માટે ત્વચા એકદમ સાફ અને સૂકી હોવી જોઈએ. ત્યાર બાદ સ્પ્રેને ૧૦થી ૧૫ સેન્ટિમીટર દૂર રાખીને ઉપયોગ કરવો. ચહેરા પરના વાળ દેખાતા થાય એટલી જ માત્રામાં ઉપયોગ કરવો. વાળને બ્લેડ વડે દૂર કર્યા બાદ પિગમેન્ટને ધોઈ નાખવો. સામાન્ય માન્યતા એવી હોય છે કે ચહેરા પરના વાળને બ્લેડથી કાઢવામાં આવે તો વધારે જાડા વાળ ઊગે. એ માન્યતા દૂર કરતાં ડૉ. રેશમ કહે છે, ‘આ સ્પ્રેની મદદથી શેવિંગ કરવામાં આવે તો પણ એ વાળને મૂળથી દૂર નથી કરતું. એટલે વાળની થિકનેસ, ગ્રોથ કે ટેક્સ્ચરને આ સ્પ્રેથી કોઈ ફરક નથી પડતો. સ્પ્રેનાં તત્ત્વો માત્ર વાળની સપાટી પર બેસે છે અને ત્વચા કે હેર ફૉલિકલની બાયોલૉજીને અસર કરતાં નથી. ઘણા લોકો આ સ્પ્રેને બહુ જ ઉપયોગી માને છે કારણ કે એ શેવિંગની પ્રોસેસને સરળ અને એકસરખી બનાવે છે. એટલે કે ચહેરા પર કોઈ વાળ રહી ગયા હોય તો એને પણ દૂર કરવામાં મદદ કરે છે. અમુક લોકો આ સ્પ્રેની મદદથી ચહેરાના વાળ પર વધારે ધ્યાન આપી શકે છે, પરંતુ કોઈને એની આદત જ પડી જાય એવું નથી.

સ્પ્રેની આડઅસર

હેલ્ધી સ્કિન ધરાવતા લોકોને કદાચ આ સ્પ્રેની આડઅસર ન થાય, પરંતુ અમુક લોકોને આ સ્પ્રેની આડઅસર થઈ શકે છે એમ જણાવતાં ડૉ. રેશમ કહે છે, ‘આલ્કોહોલ-બેઝ્ડ કે સુગંધ ધરાવતા સ્પ્રેનાં અમુક તત્ત્વો સંવેદનશીલ ત્વચાને નુકસાન પહોંચાડી શકે છે. આવા સ્પ્રેમાં સામાન્ય રીતે ત્વચામાં ઍલર્જી પેદા ન કરે એવાં તત્ત્વો હોય છે. જોકે સુગંધ, પ્રિઝર્વેટિવના કારણે ત્વચામાં બળતરા કે ઍલર્જિક રીઍક્શન થઈ શકે છે જે ડર્મેટાઇટિસ કરી શકે છે. ડર્મેટાઇટિસમાં ત્વચાનું લાલ થઈ જવું, ખંજવાળ આવવી, એકદમ સૂકી થઈ જવી કાં તો છાલાં પડી જવાં જેવી સમસ્યાનો સમાવેશ થાય છે. જો સ્પ્રે ભૂલથી આંખમાં જતો રહે તો આંખોમાં બળતરા અને લાલાશ આવી શકે છે.’