સૂકી ઉધરસ પાછળ કયાં-કયાં કારણો હોઈ શકે છે એ જાણો

સૂકી ઉધરસમાં ઉધરસ ખાઈએ ત્યારે ખૂબ જ ઓછો અથવા બિલકુલ જ કફ હોતો નથી

પ્રતીકાત્મક તસવીર

ઉધરસ એક એટલી સામાન્ય તકલીફ છે જેને આપણે હંમેશાં જ અતિ સામાન્ય ગણીને અવગણતા હોઈએ છીએ. વળી એના મુખ્ય બે પ્રકાર છે. એક કફવાળી અને બીજી સૂકી. કફવાળી ઉધરસ હોય તો હંમેશાં ગળફા થૂંક્યા કરવાનો કંટાળો આવે એટલે વ્યક્તિ ઇચ્છતી હોય કે ઇલાજ સમય પર કરાવી લે, પરંતુ સૂકી ઉધરસને મોટા ભાગના લોકો અવગણતા હોય છે. ગાઇડલાઇન્સ મુજબ બે અઠવાડિયાંથી વધુ સમય સુધી જો તમને ઉધરસ આવે તો તમારે ચેસ્ટનો એક્સરે કરાવવો જ જોઈએ.

સૂકી ઉધરસમાં ઉધરસ ખાઈએ ત્યારે ખૂબ જ ઓછો અથવા બિલકુલ જ કફ હોતો નથી. આ પ્રકારની તકલીફ મોટા ભાગે ઘરની બહાર નીકળીએ, ટ્રાફિકના પ્રદૂષણ વચ્ચે ગરમ અને સૂકી હવા હોય ત્યારે થાય છે. એકદમ જ શ્વાસમાં ઇરિટન્ટ આવી જાય અને ઉધરસ ચાલુ થઈ જાય છે. આ સિવાય સામાન્ય વાઇરલ ઇન્ફેક્શનમાં, સીઝન બદલે ત્યારે કે કોઈ પણ પ્રકારના ફ્લુમાં જોવા મળતું આ અત્યંત સામાન્ય લક્ષણ છે. આ સિવાય ઘણી વખત સ્મોકિંગને કારણે પણ સૂકી ઉધરસની તકલીફ જોવા મળે છે. મોટા ભાગે આ કફ રાત્રે ઊંઘમાં તકલીફ આપતો હોય છે. વાઇરલ ઇન્ફેક્શનમાં ઉદ્ભવતું આ લક્ષણ ઇન્ફેક્શન જતું રહે પછી પણ ક્યારેક રહી જાય છે અને ધીમે-ધીમે જાય છે. કોઈ જાતની ઍલર્જી હોય તો પણ સૂકી ખાંસી થઈ શકે છે. ઘાસની કે પરાગરજ કે પ્રાણીની રૂંવાટીની ઍલર્જીથી પણ સૂકી ખાંસી થાય છે. ઍસિડ જ્યારે શરીરમાં વધી જાય ત્યારે એ ઉપરની તરફ આવે છે અને શ્વસનમાર્ગને અસર પહોંચાડે છે, જેને લીધે ઉધરસ આવે છે. આવું મોટા ભાગે ત્યારે થાય જ્યારે તમે સૂઈ જાઓ.

ADVERTISEMENT

આ સિવાયનાં બીજાં અમુક કારણો છે જે સામાન્ય નથી પરંતુ એ રોગોનું મહત્ત્વનું લક્ષણ સૂકી ઉધરસ છે. બ્લડપ્રેશરની અમુક દવાઓ એવી હોય છે જેને લીધે સૂકી ઉધરસની તકલીફ વ્યક્તિને શરૂ થઈ જાય છે. આ એ દવાની આડઅસર છે. આ સિવાય એક પ્રકારનો અસ્થમા જેને કફ વેરિઅન્ટ અસ્થમા કહે છે એમાં વ્યક્તિને શરૂઆતનાં ૫-૧૦ વર્ષ શ્વાસની તકલીફ થતી નથી પરંતુ ફક્ત સૂકી ખાંસી જ થાય છે. આ ઉપરાંત અમુક પ્રકારના હાર્ટના પ્રૉબ્લેમ હોય જેમાં પમ્પિંગ નબળું થઈ ગયું હોય એને કારણે ફેફસાંમાં પાણી ભરાતું હોય તો પણ એના લક્ષણરૂપે સૂકી ઉધરસ જ થાય છે. આ ઉપરાંત ફેફસાંમાં કોઈ પણ પ્રકારની ગાંઠ હોય, ટીબી હોય કે કૅન્સર હોય તો પણ એનું મૂળ લક્ષણ સૂકી ઉધરસ હોય છે. ગળફા વગરનો કફ હોય તો પણ ટીબી હોઈ શકે છે એ બાબત જાણવી જરૂરી છે. ખાસ કરીને આપણા દેશમાં, જ્યાં ટીબીનો વ્યાપ વધારે છે.