મહેસાણા જિલ્લાના સુદાસણા ગામે શિક્ષક દિનેશ રાવળ રાત્રે કામ કરી રહ્યા હતા ત્યારે હાર્ટ-અટૅક આવ્યો
પ્રતીકાત્મક તસવીર
ગુજરાતમાં ચાલી રહેલી મતદારયાદી માટેની સ્પેશ્યલ ઇન્ટેન્સિવ રિવિઝન (SIR)ની કામગીરી દરમ્યાન વધુ એક શિક્ષકનું મોત થયું છે. ઉત્તર ગુજરાતના મહેસાણા જિલ્લાના સતલાસણા તાલુકામાં આવેલા સુદાસણા ગામની પ્રાથમિક કન્યાશાળાના શિક્ષક અને બૂથ લેવલ ઑફિસર (BLO)ની કામગીરીમાં જોડાયેલા દિનેશ રાવળને ગુરુવારે મોડી રાતે હાર્ટ-અટૅક આવતાં તેમનું મોત થયું હતું. વધુ એક શિક્ષકના મૃત્યુથી શિક્ષણજગતમાં શોક ફેલાઈ ગયો છે અને કામના દબાણ સામે રોષ ફેલાયો છે. આ શિક્ષકના મૃત્યુ સાથે ગુજરાતમાં SIRની કામગીરીમાં જોડાયેલા કુલ પાંચ લોકોનાં મૃત્યુ થયાં છે.
સુદાસણા ગામની શાળામાં કામ કરતા શિક્ષક દિનેશ રાવળ SIRની કામગીરીમાં જોડાયા હતા. ગુરુવારે રાતે તેઓ આ કામગીરી કરી રહ્યા હતા ત્યારે તેમને છાતીમાં દુખાવો ઊપડતાં સારવાર માટે વડનગરની હૉસ્પિટલમાં લઈ જવામાં આવ્યા હતા, પરંતુ તેમનું મોત થયું હતું. તેમના મૃત્યુથી શાળા તેમ જ ગામમાં સોપો પડી ગયો હતો.
ADVERTISEMENT
કૉન્ગ્રેસનો આક્ષેપ
ગુજરાત કૉન્ગ્રેસના પ્રવક્તા ડૉ. મનીષ દોશીએ આક્ષેપ કરતાં કહ્યું હતું કે ‘ગુજરાતમાં અત્યાર સુધીમાં SIRની કામગીરી કરી રહેલા પાંચ જણનાં નિધન થયાં છે. એક BLOએ મરણચિઠ્ઠી લખીને આપઘાત કર્યો હતો. કામનું અતિશય ભારણ, મૌખિક સૂચના, નેટ ચાલે નહીં અને પારાવાર તકલીફો અંગેની હકીકતોની જાણ છતાં તંત્ર દ્વારા ગંભીર મૌન અને કામ માટે દબાણને કારણે લોકો જીવ ગુમાવી રહ્યા છે. સરકાર અને ચૂંટણીતંત્ર જાગે અને આવા બનાવ ન બને એ માટે વ્યવસ્થા કરવાની અમે માગણી કરીએ છીએ.’
