એવા વિદેશી નાગરિકોનો દેશનિકાલ કરીશ જેઓ જાહેર બોજ છે, સુરક્ષા માટે જોખમી છે

વાઇટ હાઉસ નજીક ગોળીબારની ઘટના બાદ ટ્રમ્પ થર્ડ વર્લ્ડ દેશોમાંથી અમેરિકામાં થતા સ્થળાંતરને સંપૂર્ણપણે બંધ કરશે

ડોનલ્ડ ટ્રમ્પની ફાઇલ તસવીર

અમેરિકામાં વાઇટ હાઉસ નજીક ગોળીબાર થયા બાદ પ્રેસિડન્ટ ડોનલ્ડ ટ્રમ્પે અફઘાન વીઝા પર પ્રતિબંધ મૂક્યા પછી શુક્રવારે તેમણે જાહેરાત કરી હતી કે તેઓ ત્રીજા વિશ્વના તમામ દેશોના ઇમિગ્રેશનને કાયમી ધોરણે બંધ કરશે. તેઓ ગેરકાયદે પ્રવેશને સંપૂર્ણપણે નાબૂદ કરવા માગે છે. બુધવારે વૉશિંગ્ટનમાં એક અફઘાન નાગરિકે બે નૅશનલ ગાર્ડ સર્વિસના સભ્યોને ગોળી મારી દીધી હતી જેમાં એક નૅશનલ ગાર્ડ સૈનિકે જીવ ગુમાવ્યો હતો, જ્યારે બીજો ગંભીર રીતે ઘાયલ થયો હતો.

ટ્રમ્પે તેમના સોશ્યલ મીડિયા પરની પોસ્ટમાં લખ્યું હતું કે ‘હું અમેરિકન સિસ્ટમને સંપૂર્ણપણે પુનઃ સ્થાપિત કરવા માટે, (અગાઉના પ્રેસિડન્ટ) જો બાઇડન દ્વારા સુવિધા આપવામાં આવેલી લાખો ગેરકાયદે એન્ટ્રીઓનો અંત લાવવા માટે ત્રીજા વિશ્વના તમામ દેશોમાંથી ઇમિગ્રેશન કાયમી ધોરણે બંધ કરીશ અને એવા બધા લોકોને દૂર કરીશ જેઓ અમેરિકા માટે ઍસેટ નથી અથવા આપણા દેશને પ્રેમ કરી શકતા નથી. હું બિનનાગરિકો માટે તમામ ફેડરલ લાભો અને સબસિડી નાબૂદ કરીશ, ઘરેલુ શાંતિને નુકસાન પહોંચાડનારા ઇમિગ્રન્ટ્સની નાગરિકતા રદ કરીશ અને એવા વિદેશી નાગરિકોનો દેશનિકાલ કરીશ જેઓ જાહેર બોજ છે, સુરક્ષા માટે જોખમી છે અથવા પશ્ચિમી સંસ્કૃતિ સાથે અસંગત છે.’

ADVERTISEMENT

આ ૧૯ દેશોના પ્રવાસીઓની ફેરતપાસણી કરવામાં આવશે

યુનાઇટેડ સ્ટેટ્સ સિટિઝનશિપ ઍન્ડ ઇમિગ્રેશન સર્વિસિસ (USCIS) સંસ્થાએ ૨૦૨૫ના જૂન મહિનામાં ૧૯ દેશોની યાદી જાહેર કરી હતી જેમને ‘ચિંતાજનક રીતે જોખમી’ કૅટેગરીના ગણાવ્યા હતા. વાઇટ હાઉસ પાસે થયેલા ગોળીબાર પછી USCIS સંસ્થા જે ૧૯ દેશોના શરણાર્થીઓની ચકાસણી ફરીથી ચાલુ કરશે એ દેશો છે : હૈતી, ઈરાન, તુર્કમેનિસ્તાન, લીબિયા, ચાડ, સિએરા, અફઘાનિસ્તાન, મ્યાનમાર, લાઓસ, યમન, સોમાલિયા, સુદાન, ક્યુબા, ટોગો, બુરુન્ડી, કૉન્ગો રિપબ્લિક, ઇક્વેટોરિયલ ગિની, વેનેઝુએલા.

થર્ડ વર્લ્ડ શબ્દ કઈ રીતે આવ્યો?

‌વિશ્વમાં ૩ પ્રકારના દેશોની વિભાવના કોલ્ડ વૉરના સમયે પેદા થઈ હતી. એ વખતે અમેરિકાના નેતૃત્વવાળા પશ્ચિમી દેશોનું એક જૂથ હતું જેને ફર્સ્ટ વર્લ્ડ કહેવાતું હતું. સામ્યવાદી દેશોના જૂથને સેકન્ડ વર્લ્ડ કહેવાતું હતું અને જે દેશો કોઈ જૂથમાં નહોતા એને થર્ડ વર્લ્ડ કહેવાતા હતા. સમયાંતરે આ એવા દેશો રહી ગયા જે આર્થિક રીતે અવિકસિત અને આઉટડેટેડ મનાતા હતા.