ઇન્વેસ્ટિગેશન માટેની ટીમ આગ લાગવાનું કારણ શોધી રહી છે
બિલ્ડિંગની સફાઈ કરવાની સાથે મૃત્યુઆંક હજી વધુ વધી શકે એવી સંભાવના છે
હૉન્ગકૉન્ગના તાઈ પો વિસ્તારમાં વાંગ ફુક કોર્ટ કૉમ્પ્લેક્સનાં ૮ બિલ્ડિંગોમાં બુધવારે લાગેલી આગ લગભગ ૨૭ કલાકે ઠરી હતી. એ પછી ૩૨ માળનાં આઠેય બિલ્ડિંગોમાં ફાયર-ફાઇટર્સની ટીમ કોઈ બચ્યું હોય તો એની તપાસમાં લાગી છે. ઇન્વેસ્ટિગેશન માટેની ટીમ આગ લાગવાનું કારણ શોધી રહી છે. તપાસ-સમિતિના પ્રાથમિક અવલોકનમાં જાણવા મળ્યું હતું કે આગ જેટલી ઝડપથી ફેલાઈ એટલી ઝડપથી અંદરના રહેવાસીઓને અલર્ટ કરવામાં નહોતા આવ્યા. આઠેય બિલ્ડિંગોમાં ફાયર-અલાર્મ સિસ્ટમ ચાલતી ન હોવાથી અનેક લોકો બિલ્ડિંગમાં ફસાઈ ગયા હતા. રિપેરિંગ કરવા માટે બારીઓને બ્લૉક કરવા માટે જે ફોમ બોર્ડ લગાવવામાં આવેલું એ ઝડપથી આગ પકડી લે એવું હોવાથી ગણતરીની મિનિટોમાં આગ ફેલાઈ ગઈ હતી.
ગઈ કાલે સાંજ સુધીમાં જીવ ગુમાવનારા લોકોની સંખ્યા ૧૨૮ થઈ ગઈ હતી અને હજી ૨૫૦ લોકો મિસિંગ છે અને બિલ્ડિંગની સફાઈ કરવાની સાથે મૃત્યુઆંક હજી વધુ વધી શકે એવી સંભાવના છે.
છેલ્લે હૉન્ગકૉન્ગમાં ૧૯૪૮માં એક ગોદામમાં ભીષણ આગ લાગી હતી જેમાં ૧૭૬ લોકો મૃત્યુ પામ્યા હતા. વિશ્વની અત્યાર સુધીની સૌથી ભયાનક આગ ચીનના ફાઇનૅન્શ્યલ હબમાં ૧૯૮૦માં લાગી હતી.
