૧૩થી ૧૫ ડિસેમ્બર દરમ્યાન થનારા આ ભવ્ય ઉત્સવમાં અનુષ્ઠાન, પૂજન, આરાધના અને સંધ્યાભક્તિ સહિતનાં આયોજનો થશે
પ્રતીકાત્મક તસવીર
બોરીવલી-વેસ્ટના શ્રી ગીતાંજલિ જૈન સંઘના ઉપક્રમે આચાર્ય ભગવંત શ્રી જયશેખરસૂરીશ્વરજી મ.સા.ની નિશ્રા અને પ્રેરણામાં માગશર સુદ નોમ, દશમ અને અગિયારસ એટલે કે ૧૩થી ૧૫ ડિસેમ્બરે શ્રી પાર્શ્વનાથ પ્રભુના જન્મકલ્યાણ નિમિત્તે એકસાથે ૧૦,૦૦૦ અઠ્ઠમનું આયોજન કરવામાં આવ્યું છે.
આ કાર્યક્રમમાં પ્રથમ દિવસે શ્રી વર્ધમાન શક્રસ્તવનું અનુષ્ઠાન કરવામાં આવશે અને બીજા દિવસે કોરા કેન્દ્રમાં ૧૦૦૮ શ્રી પાર્શ્વનાથ પૂજન અને ત્રીજા દિવસે ૧૦૦૮ કમળથી પરમાત્માની દિવ્ય આરાધના કરવામાં આવશે. ત્રણેય દિવસે રાત્રિ સંધ્યાભક્તિ જિનાલયમાં રાખવામાં આવી છે. પોતાના ઘરે રહેલા શ્રી પાર્શ્વનાથ પ્રભુને સાથે અભિષેકમાં લઈને પધારવા સંઘે આમંત્રણ આપ્યું છે.
ગોડીજી દાદાની ૨૦૦મી સાલગિરહ નિમિત્તે માતુશ્રી ગજરાબેન ગિરધરલાલ શાહ પરિવારે બદામ, કસાટા અને સકળ શ્રી સંઘનું સ્વામીવાત્સલ્યનું અદ્ભુત આયોજન કર્યું હતું. એ જ પ્રમાણે આ ગોડીજી દાદાના આલંબને અત્તર પારણાં, પારણાં અને બહુમાન પ્રભાવનાનો લાભ પાર્શ્વ પરિવારને આપવા સકળ સંઘોને વિનંતી કરવામાં આવી છે. સંઘોએ બોરીવલી ગીતાંજલિ સંઘના દિલીપભાઈ (ફોન : ૯૮૨૦૫ ૦૧૫૬૦) અથવા બિપિનમામા (ફોન : ૯૩૨૨૫ ૨૪૭૭૧)ના નંબર પર સંપર્ક કરીને પોતાના સંઘના અઠ્ઠમનાં નામો લખાવી દેવાં તેમ જ અત્તર પારણાં અને પારણાંના સમગ્ર ખર્ચનો લાભ શ્રી ગીતાંજલિ સંઘને આપવા નમ્ર વિનંતી કરી છે.
