જ્યાં ૫૦ ટકા કરતાં વધુ અનામત છે ત્યાં પણ અત્યારે તો ચૂંટણી યોજાવાની સુપ્રીમ કોર્ટની મંજૂરી, પણ ૨૧ જાન્યુઆરીએ ૩ જજની બેન્ચ જે નિર્ણય લેશે એ માનવો પડશે
ફાઇલ તસવીર
સ્થાનિક સ્વરાજ સંસ્થાઓની ચૂંટણીમાં ૫૦ ટકા કરતાં વધુના અનામતના મુદ્દે ગઈ કાલે સુપ્રીમ કોર્ટે વચગાળાનો આદેશ આપતાં કહ્યું હતું કે ‘ચૂંટણી યોજવાની જે પ્રક્રિયા ચાલુ છે એને એ જ રીતે ચાલુ રાખો, એમાં કોઈ ફેરફાર કરાતો નથી. આ પ્રકરણની સુનાવણી હવે ૨૦૨૬ની ૨૧ જાન્યુઆરીએ ૩ જજની બેન્ચ સામે થશે અને તેઓ જે નિર્ણય લેશે એ આ ચૂંટણીમાં જ્યાં અનામત ૫૦ ટકા કરતાં વધુ હશે એમને લાગુ પડશે.’
કોર્ટના આ નિર્ણયને કારણે જિલ્લાપરિષદો, નગરપાલિકા અને મહાનગરપાલિકાની ચૂંટણીનાં પરિણામો પછી પણ કોર્ટના એ નિર્ણયની અસર થશે એથી જીતી આવેલા ઉમેદવારો પર કોર્ટના આ નિર્ણયની તલવાર લટકતી રહેશે.
ADVERTISEMENT
ઇલેક્શન કમિશનના વકીલ બલવીર સિંહે કહ્યું હતું કે ‘કેટલીક જગ્યાએ ૫૦ ટકા અનામતની લિમિટ ક્રૉસ થઈ છે. ૪૦ નગરપરિષદ અને ૧૭ નગરપંચાયતમાં અનામત ૫૦ ટકા કરતાં વધુ છે જેનું પ્રમાણ બાવીસ ટકા છે. એ સિવાય ૩૨ જિલ્લાપરિષદ અને ૨૯ મહાનગરપાલિકા, ૩૩૨ પંચાયતસમિતિમાં ચૂંટણી હજી જાહેર કરવામાં આવી નથી.’
જાણીતા ઍડ્વોકેટ દેવદત્ત પાલોદકરે આ બાબતે કહ્યું હતું કે ‘સુપ્રીમ કોર્ટના આદેશ પછી નગર પંચાયતની જે ચૂંટણીઓ બાકી છે ત્યાં ૫૦ ટકા અનામતની લિમિટની અંદર જ રહીને એ ચૂંટણીઓ કરવી. અપવાદાત્મક પ્રકરણમાં જો એ લિમિટ ક્રૉસ થઈ હશે તો પણ એ ચૂંટણીઓ તો લઈ જ શકાશે. જે ૫૭ જગ્યાએ હાલ ૫૦ ટકા કરતાં વધુ અનામત છે એમને ૨૧ જાન્યુઆરીએ લેવાનારો નિર્ણય લાગુ પડશે અને જો એ નિર્ણય જીતેલા ઉમેદવારોની વિરુદ્ધમાં જશે તો તેમણે એ પદ ગુમાવવું પડશે.’
બીજી ડિસેમ્બરે મતદાન માટે કર્મચારીઓને રજા મળશે
મહારાષ્ટ્ર સરકારે બીજી ડિસેમ્બરે સ્થાનિક સ્વરાજની ચૂંટણીઓનું મતદાન હોવાથી વિવિધ સંસ્થાઓ, બિઝનેસિસ અને ઑફિસોના કર્મચારીઓ માટે પગાર સાથેની રજા આપવાની જાહેરાત કરી છે, જેથી એ કર્મચારીઓ નગરપરિષદો અને નગરપંચાયતોની ચૂંટણીમાં મતદાન કરી શકે. ગઈ કાલે જાહેર કરવામાં આવેલા ગવર્નમેન્ટ રેઝોલ્યુશન (GR)માં જણાવ્યું હતું કે મંગળવારે બીજી ડિસેમ્બરે જે-જે જિલ્લાઓમાં મતદાન થશે ત્યાંના કર્મચારીઓ તેમના મતાધિકારનો ઉપયોગ કરી શકે એ માટે તેઓ પેઇડ લીવના હકદાર છે.
મહારાષ્ટ્રમાં ૨૪૬ નગરપરિષદો અને ૪૨ નગરપંચાયતોની ચૂંટણીઓ માટે બીજી ડિસેમ્બરે મતદાન થવાનું છે.
