અંધેરી પોલીસે ૩૧ વર્ષની મૉડલની ધરપકડ કરી : બનાવટી કંપનીમાં જૉબ પર રાખેલી યુવતીને ઘેનયુક્ત ડ્રિન્ક પીડાવીને બે પુરુષો દ્વારા તેના પર બળાત્કાર કરાવ્યો અને પછી ફોટો-વિડિયો લઈને તેને દેખાડ્યા : જોકે યુવતી છૂટીને ભાગી નીકળી
પ્રતીકાત્મક તસવીર
અંધેરી પોલીસે બાવીસ વર્ષની યુવતીને છેતરીને તેને ડ્રગ આપવા બદલ, બ્લૅકમેઇલ કરવા બદલ, તેના અશ્લીલ ફોટો અને વિડિયો પાડી લેવા બદલ ફેક કંપની ચલાવતી ૩૧ વર્ષની મહિલા મૉડલની ધરપકડ કરી છે. તપાસમાં જણાઈ આવ્યું હતું કે મૉડલે મસાલા વેચવાના ઓઠા હેઠળ તે યુવતીને નોકરી પર રાખી હતી.
આરોપી મહિલા મૉડલે છેલ્લા થોડા દિવસથી જે. બી. નગરની એક લૉજમાં રૂમ ભાડે રાખી ત્યાં ફેક કંપની ચાલુ કરી હતી. આ કેસની પીડિત યુવતીએ મસાલા વેચવા યુવતીઓ જોઈએ છે એવી ઑનલાઇન જાહેરાત જોઈને સર્વિસ માટે અપ્લાય કર્યું હતું.
ADVERTISEMENT
આ સંદર્ભે માહિતી આપતાં અંધેરી પોલીસ-સ્ટેશનના ઑફિસરે કહ્યું હતું કે ‘ઉપરોક્ત ઘટના યુવતીએ સર્વિસ જૉઇન કર્યાના કેટલાક દિવસો પછી બની હતી. એ ઑફિસમાં આરોપી મૉડલ અને આ નવી જોડાયેલી યુવતી એમ બે જ જણ કામ કરી રહ્યાં હતાં. યુવતીને કેટલાક દિવસ જૉબ કર્યા પછી આરોપી મૉડલે તેને સૉફ્ટ ડ્રિન્ક પીવા આપ્યું હતું જેમાં ઘેનની દવા મેળવેલી હતી. એ પીધા પછી યુવતી બેહોશ થઈ ગઈ હતી. એ પછી આરોપી મૉડલે બે પુરુષોને એ રૂમ પર બોલાવ્યા હતા. એવું લાગી રહ્યું છે કે તે બન્ને પુરુષોએ યુવતી પર જાતીય અત્યાચાર ગુજાર્યો હોઈ શકે. જ્યારે યુવતીને હોશ આવ્યો ત્યારે તેણે જોયું કે તેની બાજુમાં બે પુરુષો બેઠા હતા. આરોપી મૉડલે ત્યાર બાદ તેના અશ્લીલ ફોટો અને તે બન્ને પુરુષો તેના પર અત્યાચાર કરી રહ્યા હતા ત્યારે લીધેલો વિડિયો તેને ફોનમાં બતાવ્યો હતો. જોકે જેમતેમ કરીને યુવતી તેમની ચુંગાલમાંથી ભાગી નીકળી હતી. એ પછી તેણે અમારો સંપર્ક કર્યો હતો અને આરોપી મૉડલ અને તે બે પુરુષો સામે ફરિયાદ લખાવી હતી.’
અંધેરી પોલીસે આરોપી મૉડલને ઝડપી લીધી છે અને બન્ને આરોપી પુરુષોની શોધ ચાલુ કરી છે. ડેપ્યુટી કમિશનર ઑફ પોલીસ દત્તા નલાવડેએ કહ્યું હતું કે ‘અમે આરોપી મહિલા મૉડલની ધરપકડ કરી તેની સામે તેની કર્મચારીને ડ્રગ આપવા બદલ અને અત્યાચાર ગુજારવા બદલ ગુનો નોંધ્યો છે. અમે અન્ય બે આરોપીઓની શોધ ચલાવી રહ્યા છીએ.’
