જોકે કારનો ડ્રાઇવર તરત જ કારમાંથી બહાર નીકળી ગયો હતો એટલે કોઈ જાનહાનિ થઈ નહોતી.
વાયરલ વીડિયોમાંથી સ્ક્રીન શૉટ
બાંદરા-વરલી સી-લિન્ક પર બુધવારે રાતે એક કાર વરલીથી બાંદરા જતી વખતે બૅરિયર સાથે જોશભેર અથડાઈને સળગી ઊઠી હતી. જોકે કારનો ડ્રાઇવર તરત જ કારમાંથી બહાર નીકળી ગયો હતો એટલે કોઈ જાનહાનિ થઈ નહોતી. અકસ્માતને કારણે સી-લિન્ક પર ટ્રાફિક જૅમ સર્જાયો હતો. ફાયર-બ્રિગેડે સ્પૉટ પર ધસી જઈને આગ ઓલવી દીધી હતી. આ આગમાં કોઈના ઈજાગ્રસ્ત થવાના અહેવાલ નથી. આ ઘટનાનો વિડિયો પણ સોશ્યલ મીડિયા પર વાઇરલ થયો હતો, જેમાં કાર આખી બળીને ખાખ થતી જોવા મળે છે. કારમાં લાગેલી આગને કારણે બહુ ધુમાડો થયો હતો એથી સી-લિન્ક પરથી પસાર થનારા મોટરિસ્ટોમાં પણ ગભરાટ ફેલાયો હતો. આગ લાગ્યા બાદ એ લેનનાં વાહનો તો થંભી જ ગયાં હતાં, પણ સામેની લેનમાંથી પસાર થતાં વાહનો પણ સ્પીડ ઘટાડીને સાવચેતીથી જઈ રહ્યાં હતાં. એવુ કહેવાઈ રહ્યું છે કે કારની બ્રેક ફેલ થવાને કારણે આ અકસ્માત થયો હોવો જોઈએ. તપાસ અધિકારીઓ આગનું ચોક્કસ કારણ જાણવા માટે કારના કાટમાળની ઝીણવટભરી તપાસ કરી રહ્યા છે.
વિરારના તળાવમાં ડૂબી જવાથી ૧૧ વર્ષના છોકરાનું મૃત્યુ
ADVERTISEMENT
વિરાર-ઈસ્ટના ફૂલપાડા વિસ્તારમાં આવેલા ખડગ્યા તળાવમાં મંગળવારે સાંજે ૬ વાગ્યે ૧૧ વર્ષનો સાર્થક મોરે નામનો છોકરો ડૂબી ગયો હતો. આ તળાવનું રિનોવેશન ચાલી રહ્યું હોવાથી એની આજુબાજુ સેફ્ટી નેટ લગાવવાનું કામ ચાલી રહ્યું હતું. જોકે એ હજી અડધા ભાગમાં જ લગાવવામાં આવી હતી. સ્થાનિક લોકોએ એવો આરોપ કર્યો હતો કે આ કામના કૉન્ટ્રૅક્ટરની બેદરકારીને લીધે છોકરાનું મૃત્યુ થયું છે. તેમનું કહેવું હતું કે કૉન્ટ્રૅક્ટરે તેનું કામ જો સમયસર પૂરું કર્યું હોત તો આ દુર્ઘટના ન ઘટી હોત. એટલું જ નહીં, તેમના દ્વારા આક્ષેપ કરવામાં આવ્યો હતો કે તળાવ પર કોઈ ચેતવણીનું બોર્ડ પણ મૂકવામાં આવ્યું નથી અને કોઈ સિક્યૉરિટી ગાર્ડ પણ નહોતો.
ઍરપોર્ટ પર વિમાનને આગ કેમ લગાડવામાં આવી?
મુંબઈના છત્રપતિ શિવાજી મહારાજ ઇન્ટરનૅશનલ ઍરપોર્ટ પર ગઈ કાલે ફાયર-ડ્રિલ યોજાઈ હતી. જો કોઈ કટોકટી સર્જાય કે કોઈ વિમાનને આગ લાગે તો ફાયર-બ્રિગેડ કેટલી સતર્ક છે, કેટલા સમયમાં તેઓ સ્પૉટ પર પહોંચે છે, શું પ્રોસીજર ફૉલો કરવામાં આવે છે, આગ કેટલા સમયમાં ઓલવી દેવામાં આવે છે વગેરે બાબતોની ચકાસણી કરવા માટે આ ફાયર-ડ્રિલ યોજાઈ હતી. એમાં એક ડમી વિમાનને આગ લગાડવામાં આવી હતી. એ પછી ફાયર-બ્રિગેડના જવાનોએ કેવું કો-ઑર્ડિનેશન બતાવ્યું અને એ આગ કેટલા સમયમાં ઓલવી એની નોંધ કરવામાં આવી હતી. પહેલી વાર આવી કોઈ ડ્રિલમાં ઇન્ડિયન ઍરફોર્સની મદદ પણ લેવામાં આવી હતી. ડ્રિલની બચાવ-કામગીરીના ભાગરૂપે એક પૅસેન્જરને ઍરલિફ્ટ કરવામાં આવ્યો હતો. તસવીરો : રાણે આશિષ
કેન્દ્ર સરકારે બદલાપુર-કર્જત વચ્ચે ત્રીજી અને ચોથી લાઇનને મંજૂરી આપી
કેન્દ્ર સરકારની આર્થિક બાબતોની કૅબિનેટ કમિટીએ વડા પ્રધાન નરેન્દ્ર મોદીની અધ્યક્ષતામાં બુધવારે મુંબઈ સબર્બન કૉરિડોરમાં બદલાપુર અને કર્જત વચ્ચે ત્રીજી અને ચોથી લાઇન માટે મંજૂરી આપી હતી. આ પ્રોજેક્ટ પૂરો થશે એ પછી કર્જત સુધીની ટ્રેનો માટે વધુ બે ડેડિકેટેડ ટ્રૅક મળી રહેશે, જેને કારણે કલ્યાણ-કર્જત રૂટ પર પ્રેશર ઓછું થશે. અત્યારે આ રૂટ પર બે જ લાઇનો પર મેલ અને એક્સપ્રેસ ટ્રેનો તથા ફ્રેઇટ ટ્રેનો દોડે છે અને એ જ લાઇન પર લોકલ ટ્રેનો પણ ચાલે છે. આ પ્રોજેક્ટ મુંબઈ રેલવે વિકાસ કૉર્પોરેશન (MRVC) દ્વારા અમલમાં મૂકવામાં આવશે. આ વિશે રેલવે-ઑફિસરે આપેલી માહિતી પ્રમાણે કલ્યાણ-બદલાપુર સેક્શન વચ્ચેની કામગીરીનું લગભગ ૩૦ ટકા કામ થઈ ચૂક્યું છે અને બાકીનું કામ ડિસેમ્બર ૨૦૨૬ સુધીમાં પૂરું કરવાનો ટાર્ગેટ છે.
મુંબઈ-અમદાવાદ નૅશનલ હાઇવે પર માઇક્રો-સર્ફેસિંગનું કામ શરૂ થશે
મુંબઈ-અમદાવાદ નૅશનલ હાઇવે પર ચાલી રહેલા વાઇટ-ટૉપિંગ પ્રોજેક્ટને આખરી ઓપ અપાઈ રહ્યો છે. હવે આ રોડ પર માઇક્રો-સર્ફેસિંગનું કામ શરૂ કરવામાં આવશે. નૅશનલ હાઇવે ઑથોરિટી ઑફ ઇન્ડિયા (NHAI)એ આપેલી માહિતી મુજબ માઇક્રો-સર્ફેસિંગને લીધે ખાડા, ટાયરનાં નિશાન અને તિરાડો જેવી સમસ્યાઓ દૂર થશે. ફરીથી કૉન્ક્રીટ પર બિટ્યુમિનસ લેયર નાખવામાં આવી રહ્યું છે એવું જાહેર કરીને લોકોને ગેરમાર્ગે દોરવામાં આવે છે, પરંતુ રોડની ગુણવત્તા સુધારવા માટે માઇક્રો-સર્ફેસિંગ કરવામાં આવી રહ્યું છે એવી સ્પષ્ટતા NHAIના અધિકારીઓએ આપવી પડી હતી.
ડૉક્ટરે પાડેલા ફોટોને વખાણવા પહોંચ્યો ઍક્ટર
ઍક્ટર સુનીલ ગ્રોવર ગઈ કાલે જહાંગીર આર્ટ ગૅલરીની મુલાકાતે ગયો હતો. આ ગૅલરીમાં વિખ્યાત કાર્ડિઍક સર્જ્યન ડૉ. રમાકાંત પાંડાએ પાડેલા વાઇલ્ડલાઇફ ફોટોગ્રાફ્સનું એક્ઝિબિશન યોજાયું હતું. આ એક્ઝિબિશનમાં પ્રદર્શનમાં મૂકવામાં આવેલાં વન્ય પ્રાણીઓ અને વન્યજીવનની તસવીરોને સુનીલ ગ્રોવરે વખાણી હતી. હકીકતમાં ડૉ. પાંડાએ ૨૦૨૨માં સુનીલ ગ્રોવરનું ઑપરેશન કર્યું હતું. ડૉ. પાંડાનું વાઇલ્ડલાઇફ ફોટોગ્રાફીનું આ ત્રીજું એક્ઝિબિશન છે. તસવીર: શાદાબ ખાન
નવી મુંબઈના શ્રી અંજનેય સ્વામી મંદિરના ત્રીજા જીર્ણોદ્ધાર નિમિત્તે થયો વિશિષ્ટ મહાકુંભ અભિષેકમ
ગઈ કાલે નવી મુંબઈમાં આવેલા સાઉથ ઇન્ડિયન એજ્યુકેશન સોસાયટીના કૉમ્પ્લેક્સમાં આવેલા શ્રી અંજનેય સ્વામી ટેમ્પલના ત્રીજા જીર્ણોદ્ધાર નિમિત્તે ખાસ અષ્ટબંધન મહાકુંભ અભિષેક કરવામાં આવ્યો હતો. આ વિશિષ્ટ અભિષેકવિધિ કાંચીના કામકોટિ પીઠના ૭૦મા પૂજારી જગદ્ગુરુ શ્રી શંકરાચાર્ય વિજયેન્દ્ર સરસ્વતીએ કરાવી હતી. ભગવાન હનુમાનની મૂર્તિ પર દૂધનો અભિષેક કરવામાં આવ્યો હતો.
ચંદ્રપુરમાં હાઇવેની વચ્ચોવચ લંબાવી દીધું વાઘે, અડધો કલાક વાહનો અટવાયાં
મહારાષ્ટ્રના ચંદ્રપુર જિલ્લામાં નૅશનલ હાઇવે પર આ વિસ્તારમાં ફેમસ ‘મામા’ના નામે ઓળખાતો મેલ ટાઇગર દેખાઈ આવ્યો હતો. આ વનવિસ્તારમાં પોતાની માલિકીની ઘોષણા કરતો હોય એમ આ વાઘ ટેસથી હાઇવેની વચ્ચોવચ લંબાવીને બેસી ગયો હતો. વાઘે કરેલા આ અણધાર્યા રસ્તાજૅમને લીધે લગભગ અડધા કલાક માટે હાઇવે પર વાહનવ્યવહાર ઠપ થઈ ગયો હતો.
શહેરનાં કેટલાંક પ્લેગ્રાઉન્ડ અને પાર્કનું ૨૬ કરોડ રૂપિયાના ખર્ચે થશે રિનોવેશન
બૃહન્મુંબઈ મ્યુનિસિપલ કૉર્પોરેશન (BMC)એ મુંબઈનાં કેટલાંક પ્લેગ્રાઉન્ડ અને પાર્કને રિનોવેટ કરવાનો નિર્ણય લીધો છે અને એ માટે કુલ ૨૬ કરોડનાં ટેન્ડર બહાર પાડ્યાં છે. મલાડ-ઈસ્ટના માસાહેબ મીનાતાઈ ઠાકરે પ્લેગ્રાઉન્ડના રિનોવેશન માટે ૪.૨૨ કરોડ રૂપિયા નક્કી કર્યા છે અને રિનોવેશન ૧૧ મહિનામાં પૂરું કરવા જણાવ્યું છે. એ જ રીતે કાંદિવલી-ઈસ્ટના અણ્ણાભાઉ સાઠે ઉદ્યાનના રિનોવેશન માટે ૧૪.૭૮ કરોડ ફાળવવામાં આવ્યા છે. માટુંગા સેન્ટ્રલના મહેશ્વરી ઉદ્યાન માટે ૩.૯૯ કરોડ અને પરેલના દાદાસાહેબ ફાળકે ઉદ્યાન તથા નરે પાર્કનું પણ રિનોવેશન કરવામાં આવશે.
ભિવંડીમાં મશીનમાં ફસાઈ જવાથી કારીગરનું મૃત્યુ
ભિવંડીની એક ટેક્સટાઇલ મિલમાં બુધવારે કપડાને ડાય કરવા માટે વપરાતા જિગર મશીનમાં એક કારીગરનું ફસાઈ જવાથી કરુણ મોત નીપજ્યું હતું. મૂળ બિહારનો ૫૧ વર્ષનો રમેશ યાદવ બુધવારે રાતે ૯ વાગ્યે મશીનમાં ફસાયેલો મળી આવ્યો હતો. તેના સાથી કારીગરે તેને ફસાયેલો જોઈને અન્ય લોકોને જાણ કરી હતી અને એ પછી તેને મશીનમાંથી બહાર કાઢીને નજીકની હૉસ્પિટલમાં લઈ જવાયો હતો. જોકે ત્યાં ડૉક્ટરે તેને તપાસીને મૃત જાહેર કર્યો હતો. એ પછી તેના મૃતદેહને સરકારી હૉસ્પિટલમાં પોસ્ટમૉર્ટમ માટે મોકલવામાં આવ્યો હતો. સ્થાનિક પોલીસે આ ઘટનાના સંદર્ભે ઍક્સિડેન્ટલ ડેથ રિપોર્ટ (ADR) નોંધીને તપાસ માટે વધુ કાર્યવાહી હાથ ધરી હતી.
