કલ્યાણમાં ગેરકાયદે ચાલતા ગેમઝોન પર પોલીસે શટર પાડ્યું

ગેમઝોનમાં ફાયર-સેફ્ટી કે વેન્ટિલેશન જેવી સુરક્ષાની કોઈ વ્યવસ્થા પણ નહોતી

પ્રતીકાત્મક તસવીર

કલ્યાણના ચિંચપાડા વિસ્તારમાં ચાલી રહેલા એક ગેમઝોન પર પોલીસે મંગળવારે ચકાસણી હાથ ધરી હતી. એ દરમ્યાન સુરક્ષાની પૂરતી વ્યવસ્થા ન હોવાથી એ ગેમઝોન બંધ કરાવ્યો હતો.
ડેપ્યુટી પોલીસ-કમિશનર (ઝોન-૩) અતુલ ઝેંડેએ આ બાબતે માહિતી આપતાં કહ્યું હતું કે ‘આ ગેમઝોનમાં ઘણાંબધાં ટીનેજ છોકરા-છોકરીઓ ૮ કમ્પ્યુટર પર ગેમ રમી રહ્યાં હતાં. પોલીસે નોંધ્યું હતું કે એક બંધ રૂમમાં ગેમઝોન ચાલતો હતો જ્યાં પ્રૉપર લાઇટિંગ નહોતી, વેન્ટિલેશન નહોતું, ફાયર-સેફ્ટીનાં ઇક્વિપમેન્ટ્સ પણ નહોતાં અને ક્લોઝ્ડ-સર્કિટ ટેલિવિઝન (CCTV) કૅમેરા પણ ઇન્સ્ટૉલ કરવામાં આવ્યા નહોતા. પોલીસની કાર્યવાહી અંતર્ગત ગેમઝોનના માલિક અને તેના બે ઑપરેટર સામે પણ ગુનો નોંધવામાં આવ્યો હતો. પોલીસતપાસમાં એ પણ જણાઈ આવ્યું હતું કે ગેમઝોન ગેરકાયદે ચલાવવામાં આવતો હતો.