લોકોને બચાવવા પોલીસ સળગતી બસમાં ચડી, ૧૦ કિલોમીટર ટ્રાફિક જૅમ
પોલીસો ઘટનાસ્થળેથી લગભગ અડધો ડઝન ફસાયેલા મુસાફરોને પોતાના હાથમાં લઈને સલામત સ્થળે લઈ ગયા હતા
ઉત્તર પ્રદેશના કાનપુરમાં નૅશનલ હાઇવે ૧૯ પર ગઈ કાલે સવારે ૧૦.૪૫ વાગ્યે દિલ્હીથી વારાણસી જઈ રહેલી પલક ટ્રાવેલ્સની એક લક્ઝરી ડબલ-ડેકર સ્લીપર બસમાં અચાનક આગ લાગી હતી અને એ સમયે લગભગ ૪૦ જેટલા મુસાફરો પોતાની સીટ પર સૂઈ રહ્યા હતા અથવા આરામ કરી રહ્યા હતા. બસના ઉપરના ડેક પર રાખેલા સામાનમાંથી ધુમાડો નીકળતો જોઈને ડ્રાઇવર અને કન્ડક્ટરે બસને બાજુ પર લઈ જવાનો પ્રયાસ કર્યો હતો, પરંતુ ત્યાં સુધીમાં આગ ફેલાઈ ગઈ હતી. ઘણા લોકો ચાલતી બસમાંથી બારીઓ અને દરવાજા દ્વારા રસ્તા પર કૂદી પડ્યા હતા. આગને કારણે હાઇવે પર ૧૦ કિલોમીટર લાંબો ટ્રાફિક જૅમ થયો હતો.
બે ટ્રાફિક-કૉસ્ટેબલો સળગતી બસ જોઈને એક ક્ષણનો પણ વિલંબ કર્યા વિના સળગતી બસમાં પ્રવેશ્યા હતા અને ચીસો પાડીને મુસાફરોને બહાર કાઢ્યા હતા. પોલીસો ઘટનાસ્થળેથી લગભગ અડધો ડઝન ફસાયેલા મુસાફરોને પોતાના હાથમાં લઈને સલામત સ્થળે લઈ ગયા હતા. સદનસીબે આગ પહેલાં બસની છત પર રાખેલા સામાનમાં લાગી હોવાથી મુસાફરોને બહાર નીકળવાનો ચાન્સ મળી ગયો હતો.
