વ્લાદિમીર પુતિન ૨૩મા ભારત-રશિયા વાર્ષિક શિખર સંમેલન માટે ૪ અને પાંચ ડિસેમ્બરે ભારતની મુલાકાત લેશે
પુતિન-મોદીની ફાઇલ તસવીર
રશિયાના પ્રેસિડન્ટ વ્લાદિમીર પુતિન ૨૩મા ભારત-રશિયા વાર્ષિક શિખર સંમેલન માટે ૪ ડિસેમ્બરે બે દિવસની ભારતની મુલાકાતે આવવાના છે. તેમની આ મુલાકાત વખતે પુતિન અને વડા પ્રધાન નરેન્દ્ર મોદી વચ્ચે દ્વિપક્ષીય વાટાઘાટોનું આયોજન કરવામાં આવ્યું છે.
આ સંદર્ભમાં વિદેશ મંત્રાલયે એક નિવેદનમાં જણાવ્યું હતું કે ‘વડા પ્રધાન નરેન્દ્ર મોદીના આમંત્રણ પર રશિયન ફેડરેશનના પ્રેસિડન્ટ વ્લાદિમીર પુતિન ૨૩મા ભારત-રશિયા વાર્ષિક શિખર સંમેલન માટે ૪ અને પાંચ ડિસેમ્બરે ભારતની મુલાકાત લેશે. મુલાકાત દરમ્યાન પ્રેસિડન્ટ પુતિન વડા પ્રધાન નરેન્દ્ર મોદી સાથે વાટાઘાટો કરશે. પ્રેસિડન્ટ પુતિનનું તેઓ સ્વાગત પણ કરશે અને તેમના સન્માનમાં ભોજન-સમારંભનું આયોજન કરશે.’
ADVERTISEMENT
આ મુલાકાત ભારત અને રશિયાના નેતૃત્વને દ્વિપક્ષીય સંબંધોમાં પ્રગતિની સમીક્ષા કરવાની, વિશેષ અને વિશેષાધિકૃત વ્યૂહાત્મક ભાગીદારીને મજબૂત બનાવવા માટે દૃષ્ટિકોણ નક્કી કરવાની અને પરસ્પર હિતના પ્રાદેશિક અને વૈશ્વિક મુદ્દાઓ પર વિચારોનું આદાન-પ્રદાન કરવાની તક પૂરી પાડશે એમ નિવેદનમાં કહેવામાં આવ્યું છે.
પુતિન છેલ્લે ડિસેમ્બર ૨૦૨૧માં આ શિખર સંમેલનમાં ભાગ લેવા ભારત આવ્યા હતા. નરેન્દ્ર મોદીએ ગયા વર્ષે જુલાઈમાં મૉસ્કોમાં યોજાયેલા આ શિખર સંમેલનમાં હાજરી આપી હતી.
પુતિન-મોદી વચ્ચેની મુલાકાતના એજન્ડામાં કઈ બાબતો સામેલ?
S-400 ઍર-ડિફેન્સ સ્ક્વૉડ્રન : ભારત પાંચ વધારાની S-400 ટ્રાયમ્ફ ઍર-ડિફેન્સ સ્ક્વૉડ્રન ખરીદવાનો પ્રસ્તાવ રજૂ કરી શકે છે. આ સિવાય પહેલેથી જ સેવામાં રહેલી સિસ્ટમો માટે જમીનથી હવામાં પ્રહાર કરતી મિસાઇલોનો મોટો સ્ટૉક પણ રશિયા પાસેથી લેવા માગે છે. આ બે બાબતો બેઉ નેતાઓની શિખર બેઠક માટે એજન્ડાનો ભાગ હોવાની અપેક્ષા છે. ભારતે હજી સુધી રશિયાના પાંચમી પેઢીના સુખોઈ-57 ફાઇટરની બે કે ત્રણ સ્ક્વૉડ્રન ખરીદવાનો નિર્ણય લીધો નથી, જેને મૉસ્કો અમેરિકન F-35 લાઇટનિંગ II જેટના વિકલ્પ તરીકે આગળ ધપાવી રહ્યું છે.
યુક્રેન યુદ્ધ : બેઉ નેતાઓ વચ્ચે રશિયા-યુક્રેન યુદ્ધ વિશેની ચર્ચા થઈ શકે છે, જ્યાં નરેન્દ્ર મોદીએ ઘણી વખત શાંતિની હિમાયત કરી છે. તાજેતરમાં વિદેશપ્રધાન એસ. જયશંકરે યુક્રેનના વિદેશપ્રધાન ઍન્ડ્રી સિબિહા સાથે વાત કરી હતી અને યુક્રેન સંઘર્ષમાં તાજેતરના વિકાસ અંગે ચર્ચા કરી હતી.
