ગ્રાહકે ફરિયાદ કરતાં ટોલપ્લાઝાને ૪૫,૦૦૦ રૂપિયાનો દંડ થયો
પ્રતીકાત્મક તસવીર (તસવીર સૌજન્યઃ એઆઇ)
જયપુરના અશોક સૈની નામના ભાઈની કાર ઘરની બહાર જ પાર્ક હતી અને છતાં તેમને દૌલતપુરા ટોલપ્લાઝા પર હાઇવે ક્રૉસ કર્યો હોવાની ફીરૂપે ફાસ્ટૅગમાંથી પંચાવન રૂપિયા કપાઈ ગયા. આમ તો ઘટના ૨૦૨૨ની ૨૦ ઑગસ્ટની છે. અશોક સૈનીને સવારે ૧૧ વાગ્યે મોબાઇલ પર મેસેજ મળ્યો હતો કે તેમની કાર પર લાગેલા ફાસ્ટૅગમાંથી પંચાવન રૂપિયા કપાયા છે. એમાં કારે સવારે ૯.૪૨ વાગ્યે દોલતપુરા ટોલપ્લાઝા પાર કર્યું હોવાનું કહેવાયું હતું. અશોકભાઈનું કહેવું હતું કે આ સમયે તેમની કાર ઘરના પાર્કિંગમાં ઊભી હતી એટલે કોઈ ટોલપ્લાઝા ક્રૉસ થયો હોય એ વાતનો સવાલ જ પેદા નથી થતો. તેમણે ટોલપ્લાઝા વિરુદ્ધ ફરિયાદ કરી. મામલો ૩ વર્ષ ચાલ્યો. અશોકભાઈએ પુરવાર કર્યું કે ટોલપ્લાઝાએ હકીકતમાં કોઈ એન્ટ્રી વિના જ કારના ફાસ્ટૅૅગમાંથી ખોટી રીતે ટોલ વસૂલ્યો હતો. આ ફ્રૉડ કરવા બદલ ટોલપ્લાઝાને ૪૫,૦૦૦ રૂપિયાનો દંડ અને પંચાવન રૂપિયાની રકમ વ્યાજ સાથે પાછી આપવાનો ચુકાદો મળ્યો હતો.
