જસ્ટિન ગ્રીવ્સની પહેલી બેવડી સદીથી કૅરિબિયન ટીમે હારેલી બાજી ડ્રૉ કરી

શાઈ હોપની સદી અને કેમાર રોચની ફિફ્ટી પણ રહી મહત્ત્વની, ૫૩૧ રનના ટાર્ગેટ સામે પાંચમા દિવસના અંત સુધીમાં વેસ્ટ ઇન્ડીઝે ૬ વિકેટે ૪૫૭ રન કર્યા

બૅટિંગ ઑલરાઉન્ડર જસ્ટિન ગ્રીવ્સે ૩૮૮ બૉલમાં ૧૯ ફોરની મદદથી ૨૦૨ રનની નૉટઆઉટ ઇનિંગ્સ રમી હતી

ક્રાઇસ્ટચર્ચમાં રમાયેલી પહેલી ટેસ્ટ-મૅચ ડ્રૉ થતાં ૩ મૅચની સિરીઝની હાલમાં સ્કોર-લાઇન ૦-૦ રહી છે. યજમાન ન્યુ ઝીલૅન્ડે ૨૩૧/૧૦ અને ૪૬૬/૮ના સ્કોર સાથે ૫૩૧ રનનો વિશાળ ટાર્ગેટ ઊભો કર્યો હતો. પહેલી ઇનિંગ્સમાં ૧૬૭ રને ઑલઆઉટ થયેલી મહેમાન ટીમ વેસ્ટ ઇન્ડીઝે બીજી ઇનિંગ્સમાં એક ડબલ સેન્ચુરી, એક સદી અને એક ફિફ્ટીના આધારે ૧૬૩.૩ ઓવર સુધીની રમત રમીને અંતિમ દિવસે ૪૫૭/૬નો સ્કોર કર્યો હતો. કિવીઓને જ્યારે જીત માટે બાકીની ૪ વિકેટ અને કૅરિબિયન ટીમને ૭૪ જેટલા રનની જરૂર હતી ત્યારે પાંચમા દિવસની રમતનો સમય સમાપ્ત થતાં મૅચ ડ્રૉ રહી હતી. 

7
આટલામો પ્લેયર બન્યો જસ્ટિન ગ્રીવ્સ ચોથી ઇનિંગ્સમાં ડબલ સેન્ચુરી કરનાર. ન્યુ ઝીલૅન્ડની ધરતી પર આવું કરનાર પહેલો વિદેશી બૅટર બન્યો. 

ADVERTISEMENT

388
આટલા સૌથી વધુ બૉલ ચોથી ઇનિંગ્સમાં રમનાર કૅરિબિયન બૅટર બન્યો જસ્ટિન ગ્રીવ્સ. ૧૯૩૦નો જ્યૉર્જ હેડલીનો ૩૮૫ બૉલનો રેકૉર્ડ તોડ્યો. 

 ટેસ્ટ-મૅચ બચાવવા માટે વેસ્ટ ઇન્ડીઝનો કેટલો શાનદાર પ્રયાસ. ૧૬૪ ઓવર રમવા માટે મહાન ભાવના, હિંમત અને નિશ્ચય. ટેસ્ટ-ક્રિકેટ માટે યોગ્ય રણનીતિની જરૂર છે. - ભારતનો ભૂતપૂર્વ ઓપનર વીરેન્દર સેહવાગ 

પાંચમા દિવસે વેસ્ટ ઇન્ડીઝે ૨૧૨/૪ના સ્કોરથી ઇનિંગ્સને આગળ ધપાવી હતી. આંખમાં ઇન્ફેક્શનને કારણે ગૉગલ્સ પહેરીને રમી રહેલા શાઈ હોપની શાનદાર ઇનિંગ્સ ૨૩૪ બૉલમાં ૧૪૦ રન પર સમાપ્ત થઈ હતી. તેણે પોતાની ૨૫૦મી ઇન્ટરનૅશનલ મૅચની આ ઇનિંગ્સમાં ૧૫ ફોર અને બે સિક્સર ફટકારી હતી. તેણે જસ્ટિન ગ્રીવ્સ સાથે પાંચમી વિકેટની ૧૯૬ રનની ભાગીદારી કરી હતી. 
બૅટિંગ ઑલરાઉન્ડર જસ્ટિન ગ્રીવ્સે ૩૮૮ બૉલમાં ૧૯ ફોરની મદદથી ૨૦૨ રનની અણનમ ઇનિંગ્સ રમીને પહેલી ડબલ સેન્ચુરી ફટકારી હતી. ૧૨ ટેસ્ટ-મૅચમાં હમણાં સુધી તેણે એક ફિફ્ટી અને બે સદી કરી છે. ફાસ્ટ બોલર કેમાર રોચે ૨૩૩ બૉલમાં ૮ ફોરની મદદથી ૫૮ રનની ધીરજપૂર્વકની નૉટઆઉટ ઇનિંગ્સ રમી હતી. મૅચની ચોથી ઇનિંગ્સમાં ગ્રીવ્સ અને કેમાર વચ્ચે સાતમી વિકેટની રેકૉર્ડ ૧૮૦ રનની ભાગીદારી થઈ હતી. ફાસ્ટ બોલર જેકબ ડફી ૧૨૨ રન આપીને ૩ વિકેટ લઈને ન્યુ ઝીલૅન્ડ માટે સૌથી સફળ સાબિત થયો હતો. 

૨૧મી સદીના આ અનોખા રેકૉર્ડ પણ બન્યા

• વર્તમાન સદીમાં ચેઝ દરમ્યાન સૌથી મોટો ૪૫૭/૬નો સ્કોર કરવાનો રેકૉર્ડ વેસ્ટ ઇન્ડીઝે કર્યો. ૧૯૩૯માં ઇંગ્લૅન્ડે સાઉથ આફ્રિકા સામે રનચેઝ દરમ્યાન હાઇએસ્ટ ૬૫૪/૫નો સ્કોર કર્યો હતો. એ ટેસ્ટ-મૅચ પણ ડ્રૉ રહી હતી.
• ૨૧મી સદીમાં એક ટેસ્ટ-મૅચની છેલ્લી બે ઇનિંગ્સમાં હાઇએસ્ટ ૯૨૩ રનનો રેકૉર્ડ આ મૅચમાં બન્યો. આ લિસ્ટમાં ક્રાઇસ્ટચર્ચ ટેસ્ટ-મૅચ પહેલાં ૧૯૩૯ની એક મૅચના ૧૧૩૫ રન, ૧૯૬૯ની મૅચના ૯૫૫ રન અને ૧૯૨૧ની મૅચના ૯૫૨ રનનો રેકૉર્ડ ટૉપ-થ્રીમાં છે.
• ૨૧મી સદીમાં વેસ્ટ ઇન્ડીઝે ચોથી ઇનિંગ્સમાં હાઇએસ્ટ ૧૬૩.૩ ઓવર બૅટિંગ કરવાનો રેકૉર્ડ કર્યો છે. ૧૯૩૦માં કૅરિબિયન ટીમે જ ઇંગ્લૅન્ડ સામે રેકૉર્ડ ૧૬૪.૩ ઓવર સુધી ચોથી ઇનિંગ્સમા બૅટિંગ કરી હતી.