વૈશ્વિક પડકારો વચ્ચે પણ ભારત અડગ છે: GDPમાં ૮.૨ ટકાનો ધરખમ વધારો નોંધાયો

અમેરિકાની ટૅરિફની તંગદિલી વચ્ચે ભારતીય ઇકૉનૉમીનો અનુમાન કરતાં પણ સારો પર્ફોર્મન્સ, ચાલુ નાણાકીય વર્ષના બીજા ક્વૉર્ટરમાં છેલ્લાં છ ક્વૉર્ટરનો હાઇએસ્ટ વધારો

પ્રતીકાત્મક તસવીર (તસવીર સૌજન્યઃ એઆઇ)

ભારતની ઇકૉનૉમીએ ચાલુ નાણાકીય વર્ષના બીજા ક્વૉર્ટરમાં ઘણું સારું પ્રદર્શન કર્યું છે. જુલાઈથી સપ્ટેમ્બરના આ ક્વૉર્ટરમાં ભારતની વાસ્તવિક ગ્રોસ ડોમેસ્ટિક પ્રોડક્ટ (GDP) ૮.૨ ટકાના દરે વધી હતી જે છેલ્લા છ ક્વૉર્ટરમાં થયેલો હાઇએસ્ટ વધારો છે. આ પહેલાં ઑક્ટોબર-ડિસેમ્બર ૨૦૨૩ના કવૉર્ટરમાં ભારતે ૮.૬ ટકાના દરે વૃદ્ધિ કરી હતી.

ગયા વર્ષે આ સમયગાળામાં ભારતનો GDP ગ્રોથ ૫.૬ ટકા જ હતો. આ વૃદ્ધિદર સાથે ભારત વિશ્વનું સૌથી ઝડપથી વિકસતું મુખ્ય અર્થતંત્ર રહ્યું છે. દેશનો નૉમિનલ GDP પણ ૮.૭ ટકા વધ્યો છે.

સરકારી ડેટા અનુસાર GDPમાં આ ગ્રોથ મૅન્યુફૅક્ચરિંગ-પ્રોડક્શન સેક્ટરમાં ૮.૧ ટકાની વૃદ્ધિ અને સર્વિસ સેક્ટરમાં ૯.૨ ટકાની વૃદ્ધિને કારણે નોંધાયો હતો. સર્વિસિસ સેક્ટરમાં વેપાર, હોટેલ, ટ્રાન્સપોર્ટ, ટેલિકૉમ સર્વિસિસનો સમાવેશ થાય છે. જોકે ખેતી અને એની સાથે સંકળાયેલાં સેક્ટર્સમાં વૃદ્ધિદર ૩.૫ ટકા તથા વીજળી, ગૅસ, વૉટર-સપ્લાય અને અન્ય યુટિલિટી સર્વિસિસનો ગ્રોથરેટ ૪.૪ ટકા જેટલો મધ્યમ રહ્યો હતો. GDPમાં સારી વૃદ્ધિ મુખ્યત્વે રૂરલ ડિમાન્ડમાં વધારા અને સરકારે કરેલા ખર્ચને કારણે થઈ હતી. જોકે પ્રાઇવેટ કૉર્પોરેટ ઇન્વેસ્ટમેન્ટ થોડું ધીમું રહ્યું હતું.

કયાં કારણોને લીધે GDP ગ્રોથરેટ સારો રહ્યો?

અહેવાલો પ્રમાણે ભારતના આ GDP ગ્રોથનાં અનેક કારણો છે. પાછલા સમયમાં ભારતની લોકલ ડિમાન્ડ મજબૂત રહી છે, GST સ્ટ્રક્ચર સરળ થયું હોવાથી ઇકૉનૉમીને વેગ મળ્યો છે, નીતિનિયમોમાં સરકાર તરફથી સુધારાઓને લીધે કૉર્પોરેટ-બિઝનેસિસમાં ભારતીય અર્થતંત્રમાં વિશ્વાસ વધ્યો છે, સરકારની સાવચેતીભરી નીતિથી ફુગાવાને કાબૂમાં રાખવામાં આવ્યો છે. દેશની રિઝર્વ્સ મજબૂત છે. આ બધાં કારણોને લીધે ભારતની ઇકૉનૉમી બહારના આંચકાઓથી બચી શકી છે.