હોલસેલ પ્રાઇસ ઇન્ડેક્સમાં ઉછાળો, મેમાં ૯.૬૮ ટકા થયો

સરકારી આંકડા મુજબ મે મહિનામાં જથ્થાબંધ ફુગાવો વધીને ૯.૬૮ ટકા થયો હતો, જે એપ્રિલમાં ૮.૨૬ ટકા હતો

પ્રતીકાત્મક તસવીર

મે મહિનામાં હોલસેલ પ્રાઇસ ઇન્ડેક્સ (WPI)માં વધારો જોવા મળ્યો છે. સરકારી આંકડા મુજબ મે મહિનામાં જથ્થાબંધ ફુગાવો વધીને ૯.૬૮ ટકા થયો હતો, જે એપ્રિલમાં ૮.૨૬ ટકા હતો. આ મુખ્યત્વે ઈંધણ અને વીજળી, ઉત્પાદનો અને ખાદ્ય ચીજોના ભાવમાં તીવ્ર વધારો થવાને કારણે હતો. વાણિજ્ય અને ઉદ્યોગ મંત્રાલયે ૨૦૧૧-’૧૨થી ૨૦૨૨-’૨૩ સુધીના આધાર વર્ષને સુધાર્યા પછી ગઈ કાલે WPI આધારિત ફુગાવાના ડેટા જાહેર કર્યા હતા. 

મે મહિનામાં ઈંધણ અને વીજળી શ્રેણીમાં જથ્થાબંધ ફુગાવો વધીને ૩૦.૩૩ ટકા થયો હતો, જે એપ્રિલમાં ૨૪.૮૯ ટકા હતો. ક્રૂડ પેટ્રોલિયમ ફુગાવો મે મહિનામાં વધીને ૬૧.૫૧ ટકા થયો હતો, જે એપ્રિલમાં ૫૬.૩૧ ટકા હતો. જથ્થાબંધ ફુગાવામાં આ તીવ્ર વધારો પશ્ચિમ એશિયાની કટોકટી અને હોર્મુઝ સ્ટ્રેટના અસરકારક અવરોધને કારણે થયો હતો, જ્યાંથી ભારત એના મોટા ભાગના ક્રૂડ તેલની આયાત કરે છે. આનાથી ખાદ્ય પદાર્થોના ભાવ પર પણ અસર પડી હતી.

મે મહિનામાં ખાદ્ય પદાર્થોનો ફુગાવો ૩.૬૦ ટકા રહ્યો હતો, જે એપ્રિલમાં ૨.૪૩ ટકા હતો. ઉત્પાદિત ઉત્પાદનોનો ફુગાવો એપ્રિલમાં ૬.૬૮ ટકાથી વધીને ૭.૪૮ ટકા થયો હતો. રીટેલ અથવા કન્ઝ્યુમર પ્રાઇસ ઇન્ડેક્સ (CPI) ફુગાવો પણ મે મહિનામાં ૧૬ મહિનાની ઊંચી સપાટી ૩.૯૩ ટકા પર પહોંચ્યો હતો, જે એપ્રિલમાં ૩.૪૮ ટકા હતો.

રિઝર્વ બૅન્ક ઑફ ઇન્ડિયા (RBI) નાણાકીય નીતિ નક્કી કરતી વખતે મુખ્યત્વે છૂટક ફુગાવાને ધ્યાનમાં લે છે. સરકારે એકંદર ફુગાવો ૪ ટકા પર જાળવવાનો લક્ષ્યાંક નક્કી કર્યો છે, જેમાં બન્ને બાજુ બે ટકાનું માર્જિન રહેશે. આ મહિનાની શરૂઆતમાં RBIએ ચાલુ નાણાકીય વર્ષ ૨૦૨૬-’૨૭ માટે ફુગાવાનો અંદાજ ૪.૬ ટકાથી વધારીને ૫.૧ ટકા કર્યો હતો.

મે મહિનામાં છૂટક ફુગાવો કેટલો હતો?
રીટેલ ફુગાવો મે ૨૦૨૬માં વધીને ૩.૯૩ ટકા થયો હતો, જે એપ્રિલમાં ૩.૪૮ ટકા હતો. છેલ્લા પાંચ મહિનામાં આ પ્રથમ વખત છે જ્યારે રીટેલ ફુગાવો RBIના ૪ ટકાના લક્ષ્યાંકની ખૂબ નજીક આવી ગયો છે.