આ દાદાની નજરે પંખીઓને જોશો તો મન મોહી પડશે

નાનપણના શોખને મોટી ઉંમરે જીવંત કરીને ૭૪ વર્ષના ઘાટકોપર (વેસ્ટ)ના કપોળ મિત્ર મંડળ અને કપોળ સમાજના અગ્રણી કાર્યકર રજનીકાંત વામનરાય પારેખે કુદરતી દૃશ્યોને નિહાળીને એને કાગળ પર કંડારવામાં જબરી મહારત હાંસલ કરી લીધી છે. એમાંય લૉકડાઉનના સમયનો સદ્દુપયોગ કરીને તેમણે કુદરતી સૌદર્યનાં ૩૦થી વધુ આકર્ષક પેઇન્ટિંગ્સ કર્યાં છે. જીવનને સ્ટ્રેસમાં જીવવા કરતાં સંગીત અને પેઇન્ટિંગના માધ્યમથી હસીન બનાવવાનો જીવનમંત્ર આજે ૭૪ વર્ષની વયે પણ રજનીકાંતભાઈને તંદુરસ્ત રાખે છે. રજનીકાંત પારેખને પેઇન્ટિંગનો શોખ નાનપણથી હતો, પરંતુ એ શોખને તેઓ ત્યારે પૂરો કરી શક્યા નહોતા. જોકે ૨૦૧૧માં તેમનો પુત્ર અમેરિકાથી તેમના માટે ડ્રૉઇંગબુક, વૉટર કલર્સ અને પેઇન્ટિંગ બ્રશો લઈને આવ્યો હતો. એનો સદુપયોગ એ વખતે જેટલો ન થયો એટલો ૨૦૨૦-’૨૧ના લૉકડાઉનમાં થયો. રજનીકાંત પારેખે કહે છે, ‘હું ૨૦૧૮માં બિઝનેસમાંથી સંપૂર્ણ નિવૃત્ત થઈ ગયો. ત્યાર પછી જીવનને રંગબેરંગી બનાવવા માટે વૉટર કલર્સ અને પીંછી હાથમાં લીધાં. હું વધારે પડતાં પક્ષીઓનાં ડ્રૉઇંગ્સ અને પેઇન્ટિંગ્સ કરું છું, કેમ કે મને પક્ષીઓનાં કદ, આકાર અને સૌથી વધારે કલર બહુ ગમે છે. ઈશ્વરે પોતાની આકર્ષક કળા વનસ્પતિ, ફૂલો અને પક્ષીઓમાં રંગ પૂરીને વેરી છે જે બીજામાં બહુ ઓછી જોવા મળે છે. મને વૉટર કલર્સનો ઉપયોગ કરવો વધારે ગમે છે. એને મિક્સ કરીને અનેક રંગોને નિખારી શકાય. એ પેઇન્ટિંગને એકદમ જીવંત બનાવી દે છે. કલરફુલ પેઇન્ટિંગ કરવા માટે પહેલાં પેન્સિલ ડ્રૉઇંગ પર્ફેક્ટ હોવું બહુ જરૂરી છે. પક્ષીઓ પછી મને પહાડો અને સુંદર ઝરણાં-વનરાઈઓનાં લૅન્કસ્કૅપ બનાવવા ગમે છે, કારણ કે એ બધું કુદરતની બહુ સમીપ છે.’

કોઈ પણ કળાને જો પ્રેમથી આત્મસાત્ કરીએ તો એ આપણા જીવનનું અવિભાજ્ય અંગ બની રહે છે જે તમને જીવનમાં એક મુકામ સુધી લઈ જાય છે એમ જણાવીને રજનીકાંત પારેખ કહે છે, ‘કોઈ પણ સુંદર દૃશ્ય નજરે પડે તો એને પીંછીમાં ઉતારવા મન વ્યાકુળ બની જાય છે. પછી એ સુંદર ફૂલો હોય, રંગબેરંગી પક્ષીઓ હોય, સુંદર સંધ્યા ખીલી હોય કે સમુદ્રકિનારે સનસેટ હોય. લૉકડાઉનમાં લોકોનો સમય પસાર થતો નથી અને મને બિલકુલ ફુરસદ નથી. મને સંગીતનો શોખ પણ છે. સોસાયટીના લોકો પહેલાં મને સિંગર તરીકે ઓળખતા હતા જે હવે મને પેઇન્ટર તરીકે પણ ઓળખવા લાગ્યા છે.’