26 January, 2026 08:37 AM IST | Mumbai | Gujarati Mid-day Correspondent
રાજેશ ઉનરકટ પ્રાઇવેટ ફર્મના CFO હોવાની સાથે બૌદ્ધિક રીતે અક્ષમ હોય એવા પુખ્ત વયના લોકોની સંભાળ રાખવાનું કામ કરતી આધાર સંસ્થા સાથે છેલ્લાં છથી વધુ વર્ષથી કામ કરી રહ્યા છે.
છેલ્લાં દસેક વર્ષમાં ગુજરાતી ફિલ્મ-ઇન્ડસ્ટ્રીએ નોંધપાત્ર અને પ્રશંસનીય પ્રગતિ કરી છે. એક સમય હતો જ્યારે ગુજરાતી ફિલ્મો માત્ર મર્યાદિત દર્શકો સુધી જ સીમિત રહેતી, પરંતુ આજે સ્થિતિ બદલાઈ ગઈ છે. નવી વિચારધારાઓ, સમાજને સ્પર્શતા વિષયો, પ્રતિભાશાળી કલાકારો અને તકનીકી ગુણવત્તામાં સુધારાની સાથે ગુજરાતી સિનેમાએ પોતાનું આગવું સ્થાન બનાવ્યું છે. ગુજરાતી ભાષા અને સંસ્કૃતિને ગૌરવ આપતી આવી સફળતાઓ દરેક ગુજરાતી માટે ગર્વની બાબત છે.
આ ઉજવણીની વચ્ચે એક મહત્ત્વપૂર્ણ મુદ્દા પર ધ્યાન આપવું પણ જરૂરી છે. ગુજરાત રાજ્યમાં દારૂનું ઉત્પાદન, વેચાણ, ખરીદી, સેવન અને સંગ્રહ કાયદેસર રીતે પ્રતિબંધિત છે. ગુજરાતને વર્ષોથી ડ્રાય સ્ટેટ તરીકે ઓળખવામાં આવે છે. જોકે વાસ્તવિકતા એ છે કે દારૂબંધી હોવા છતાં રાજ્યમાં ગેરકાયદે દારૂની હેરાફેરી અને વેચાણના કિસ્સાઓ અવારનવાર સામે આવતા રહે છે અને એના પર પોલીસ દ્વારા કાર્યવાહી પણ થાય છે.
આ બન્ને મુદ્દાઓ દેખાવમાં જુદા લાગતા હોવા છતાં આજની ગુજરાતી ફિલ્મોમાં જોવા મળતી એક સામાન્ય પ્રવૃત્તિ સાથે જોડાય છે. આજકાલની ઘણી ગુજરાતી ફિલ્મોમાં મુખ્ય પાત્રોને દારૂનું સેવન કરતાં દર્શાવવામાં આવે છે. અંદાજે ૭૦ ટકા જેટલી ફિલ્મોમાં દારૂ પીવાનું દૃશ્ય કોઈ ને કોઈ સ્વરૂપે આવતું જોવા મળે છે. કેટલીક ફિલ્મોમાં તો મુખ્ય અભિનેત્રીઓ પણ આવાં દૃશ્યોનો ભાગ બને છે. દારૂને સ્ટાઇલ, મજા અથવા સામાજિક સ્વીકાર્યતાના પ્રતીક તરીકે રજૂ કરવામાં આવે છે.
અહીં એક સ્વાભાવિક પ્રશ્ન ઊભો થાય છે કે શું ગુજરાતી ફિલ્મોની સફળતા માટે આવાં દૃશ્યો અનિવાર્ય છે? સિનેમા માત્ર મનોરંજનનું સાધન નથી. એ સમાજ પર ઊંડો પ્રભાવ પાડતું શક્તિશાળી માધ્યમ છે. ખાસ કરીને યુવા પેઢી પર ફિલ્મોમાં દર્શાવવામાં આવતાં દૃશ્યોનો પ્રભાવ સહેલાઈથી પડે છે ત્યારે આપણે આવનારી ગુજરાતી પેઢીને કયો સંદેશ આપી રહ્યા છીએ એ બાબતે વિચાર કરવો જરૂરી બની જાય છે.
દારૂ પીવો કે ન પીવો એ વ્યક્તિગત પસંદગીનો વિષય છે, પરંતુ પ્રશ્ન એ છે કે શું રાજ્યમાં કાયદેસર દારૂબંધી હોવા છતાં ફિલ્મોના પડદા પર એનું સતત અને આકર્ષક પ્રદર્શન કરવું યોગ્ય છે? ગુજરાતી સિનેમાની ઓળખ માત્ર બૉક્સ-ઑફિસની સફળતા સુધી મર્યાદિત ન હોવી જોઈએ. ભાષા, સંસ્કૃતિ, મૂલ્યો અને સામાજિક જવાબદારી આ બધું મળીને ગુજરાતી સિનેમાની સાચી ઓળખ ઘડે છે. પ્રગતિની સાથે-સાથે જો આત્મચિંતન પણ થાય તો ગુજરાતી ફિલ્મ-ઇન્ડસ્ટ્રી વધુ મજબૂત અને સશક્ત બની શકે.
