23 October, 2021 12:52 PM IST | Mumbai | Gujarati Mid-day Correspondent
તૂર્કી શૂટિંગ માટે નહીં, શૉપિંગ માટે ગયો હતો ઇમરાન હાશ્મી
ઇમરાન હાશ્મીએ જણાવ્યું કે હું ‘ટાઇગર 3’માં કામ નથી કરી રહ્યો. હું તો શૉપિંગ કરવા ટર્કી ગયો હતો. ઑસ્ટ્રિયા અને ટર્કીમાં આ ફિલ્મનું શૂટિંગ કરવામાં આવ્યું હતું અને સંયોગ એવો થયો કે એ જ વખતે ઇમરાન પણ ત્યાં હાજર હતો એથી ચર્ચા ચાલી રહી હતી કે તે ‘ટાઇગર 3’માં વિલનના રોલમાં દેખાશે. તેનું કહેવું છે કે આ ફિલ્મમાં હું કામ નથી કરી રહ્યો. જોકે એ કેટલું સાચું અને ખોટું છે એ તો સમય જ કહેશે. આ વિશે ઇમરાને કહ્યું હતું કે ‘હું તો ટર્કીમાં શૉપિંગ કરવા ગયો હતો. મેં ત્યાંથી નજર માટેનું રક્ષાકવચ ખરીદ્યું હતું. લોકો ભલે મારા વિશે જે ધારણા લગાવતા હોય. મને તો ગૉસિપ્સ પસંદ છે અને લોકોને પણ મારા કામમાં વધુ રસ છે. મેં કદી ફિલ્મમાં હોવાની સહમતી કે નકાર નથી દર્શાવ્યો. તમને કોણે કીધું કે મેં પહેલેથી જ શૂટિંગ કરી લીધું છે? લોકો કહે છે, પરંતુ મેં ફિલ્મનું શૂટિંગ નથી કર્યું. ખરું કહું તો હું આ ફિલ્મમાં નથી. ખબર નહીં લોકો શું કામ આવું કહે છે. મેં કદી એ વિશે નિવેદન નથી આપ્યું અથવા તો મેં એમ પણ નથી કહ્યું કે હું આ ફિલ્મમાં કામ કરી રહ્યો છું.’