સ્ટૅન્ડ-અપ બનશે કરણ

ઍમેઝૉન પ્રાઇમ વિડિયોની ‘વન માઇક સ્ટૅન્ડ’ની બીજી સીઝનમાં તે દેખાશે

કરણ જોહર

કરણ જોહર હવે સ્ટૅન્ડ-અપ કોમિક તરીકે ડેબ્યુ કરવા જઈ રહ્યો છે. ઍમેઝૉન પ્રાઇમ વિડિયોની ‘વન માઇક સ્ટૅન્ડ’ની બીજી સીઝનમાં તે હવે જોવા મળશે. કરણ જોહરનું કહેવું છે કે તે જ્યારે પણ કૉમેડી ફિલ્મની સ્ક્રિપ્ટ વાંચે છે કે સાંભળે છે ત્યારે પણ તેને હસવું નથી આવતું. તે વ્યક્તિ હવે પોતે કૉમેડી કરવા જઈ રહ્યો છે. આ વિશે વાત કરતાં કરણે કહ્યું હતું કે ‘મેં સાચું કહું તો આ વિશે ક્યારેય વિચાર્યું નહોતું. મારું નેચર હસમુખું નથી. હું જોરજોરથી ક્યારેય નથી હસતો. હું જ્યારે કૉમેડીની સ્ક્રિપ્ટ સાંભળું છું ત્યારે પણ હું નથી હસી શકતો. હું હંમેશાં રાઇટર અને નરેટરને પહેલેથી એ વિશે જણાવી દઉં છું. જોકે મને હંમેશાં સ્ટૅન્ડ-અપમાં ઇન્ટરેટ્સ રહ્યો છે. સ્ટેજ પર બધાની સામે ઊભા રહીને તમે કૉમેડી કરી શકો છો એવું દેખાડવું કેવું હોય છે એ મારે જાણવું છે. જોકે જોક્સ લોકોને સમજ ન પડ્યા અથવા તો લોકોને ફની ન લાગ્યા તો શું? આથી મેં એને એક ચૅલેન્જ તરીકે લીધી છે. મને લાગે છે કે આજે કૉમેડી ધીમે-ધીમે ખૂબ જ ફેમસ થઈ રહી છે અને એ હવે પૉપ-કલ્ચરનો ભાગ બની રહી છે. એન્ટરટેઇનમેન્ટની દુનિયામાં સ્ટૅન્ડ-અપ કૉમેડી ખૂબ આગળ વધી રહી છે જેનો હું પહેલેથી પાર્ટ બનવા માગતો હતો. આથી જ હું આ શોનો પાર્ટ બનવા તૈયાર થયો છું.’