14 May, 2026 04:43 PM IST | Mumbai | Gujarati Mid-day Online Correspondent
‘મોસ્ટલી બીથોવન’ના બે વિશેષ કોન્સર્ટ એનસીપીએના એક્સપેરિમેન્ટલ થિયેટરમાં 20 મે અને 24 મે 2026ના રોજ સાંજે 7 વાગ્યે યોજાશે.
નેશનલ સેન્ટર ફોર ધ પરફોર્મિંગ આર્ટ્સ (NCPA) આર્ટીઝ ફેસ્ટિવલ ઈન્ડિયાની 30મી આવૃત્તિ રજૂ કરી રહ્યું છે. આ વાર્ષિક ચેમ્બર મ્યુઝિક ફેસ્ટિવલ તેની અનોખી વેસ્ટર્ન ક્લાસિકલ મ્યુઝિક પ્રસ્તુતિઓ અને આંતરરાષ્ટ્રીય સહયોગ માટે જાણીતું છે. 2008માં મુંબઈ ખાતે એનસીપીએમાં શરૂ થયેલું આર્ટીઝ ફેસ્ટિવલ ત્યારથી ગલ્ફ, દક્ષિણપૂર્વ એશિયા અને યુરોપ સુધી પહોંચ્યું છે.
પ્રસિદ્ધ સેલિસ્ટ ગોથિયેર હર્માન અને એનસીપીએના ચેરમેન તથા SOIના સહસ્થાપક ખુશરૂ એન. સન્તૂક દ્વારા ક્યુરેટ થયેલું આ ફેસ્ટિવલ વર્ષોથી ચેમ્બર મ્યુઝિકની સમૃદ્ધ અને વૈવિધ્યસભર રજૂઆતો માટે સમર્પિત રહ્યું છે. દિગ્ગજ સંગીતકાર લુડવિગ વાન બીથોવનની 200મી પુણ્યતિથિ પહેલાં એનસીપીએ ‘મોસ્ટલી બીથોવન’ નામની ખાસ શ્રેણી લઈને આવી રહ્યું છે, જેમાં બીથોવનના તમામ સ્ટ્રિંગ ક્વાર્ટેટ્સ રજૂ થશે. આ ફેસ્ટિવલ ચાર મહિનાની અવધિમાં 2026 અને 2027 દરમિયાન યોજાશે. મે મહિનાથી શરૂ થતી આ શ્રેણી ડિસેમ્બરમાં ફરી યોજાશે અને ત્યારબાદ આગામી વર્ષના જૂન અને નવેમ્બરમાં પણ પરત ફરશે.
જોકે દરેક કોન્સર્ટમાં બીથોવનના સ્ટ્રિંગ ક્વાર્ટેટ્સ મુખ્ય રહેશે, તેમ છતાં કાર્યક્રમ માત્ર જર્મન સંગીતકાર પૂરતો મર્યાદિત નહીં રહે. ઉદાહરણ તરીકે, આ મે મહિનાની આવૃત્તિમાં યુવા ક્લારિનેટવાદક જોએ ક્રિસ્ટોફે મોઝાર્ટના ક્લારિનેટ ક્વિન્ટેટનું પરફોર્મન્સ આપશે. આગામી મહિનાઓમાં અન્ય સંગીતકારો પણ જોડાઈ શકે છે.આ નવી ‘મોસ્ટલી બીથોવન’ શ્રેણી બીથોવનના સ્ટ્રિંગ ક્વાર્ટેટ્સની વિશાળ સંગીતયાત્રા રજૂ કરશે. વાયોલિન પર નાથન મિઅર્ડલ અને એમા ગિબૂ, વિયોલા પર વિયોલેન ડેસ્પેરોક્સ, સેલો પર ગોથિયેર હર્માન અને બીજા કોન્સર્ટ માટે ક્લારિનેટ પર જોએ ક્રિસ્ટોફે જોડાશે. આ શ્રેણીમાં સ્ટ્રિંગ ક્વાર્ટેટ્સને સમયક્રમ પ્રમાણે રજૂ કરવાની જગ્યાએ બીથોવનના વિવિધ સમયગાળાની રચનાઓને મિક્સ કરીને રજૂ કરવામાં આવશે, જેથી શ્રોતાઓને તેમના સમગ્ર સંગીત સર્જનની વિશાળ ઝલક મળી શકે. એનસીપીએમાં આ બીથોવનની અત્યાર સુધીની સૌથી વ્યાપક ઉજવણી માનવામાં આવી રહી છે. સાથે જ, ભારતમાં ધીમે ધીમે વધતી ચેમ્બર મ્યુઝિકની લોકપ્રિયતા માટે પણ આ એક મહત્વપૂર્ણ ક્ષણ ગણાય છે.
વર્ષો દરમિયાન આર્ટીઝ ઓન્સોમ્બલ ભારતભરમાં શાળાઓ, અનાથાશ્રમો અને ધારાવીની ઝૂંપડપટ્ટીઓ સુધી પહોંચ્યું છે અને વિવિધ વર્ગના લોકો સુધી વેસ્ટર્ન ક્લાસિકલ મ્યુઝિક પહોંચાડ્યું છે. આ ફેસ્ટિવલ સંગીતપ્રેમી તેમજ નવા શ્રોતાઓ સૌને ઉત્તમ સંગીતનો અનુભવ કરાવવા આમંત્રિત કરે છે. ‘મોસ્ટલી બીથોવન’ના બે વિશેષ કોન્સર્ટ એનસીપીએના એક્સપેરિમેન્ટલ થિયેટરમાં 20 મે અને 24 મે 2026ના રોજ સાંજે 7 વાગ્યે યોજાશે. બંને કાર્યક્રમોનો સમયગાળો અંદાજે બે કલાકનો રહેશે. ટિકિટના દર સભ્યો માટે ₹900 અને ₹720 જ્યારે નોન મેમ્બર્સ માટે ₹1000 અને ₹800 રાખવામાં આવ્યા છે. 24 મેના કાર્યક્રમ માટે 6 વર્ષથી વધુ ઉંમરના દર્શકોને જ પ્રવેશ મળશે અને મોડો પ્રવેશ મંજૂર નહીં હોય. નોંધનીય છે કે આ કોન્સર્ટમાં SOI પરફોર્મ નહીં કરે. બૉક્સ ઓફિસ બુકિંગ સભ્યો માટે 26 એપ્રિલથી અને સામાન્ય જનતા માટે 29 એપ્રિલથી શરૂ થશે.
