સ્નાન પછી ત્વચા રૂક્ષ લાગે છે? સાબુ પસંદ કરવાની રીત બદલો

સુગંધ, વધારે ફીણ કે ‘એન્ટિબૅક્ટેરિયલ’ દાવા જોઈને સાબુ ખરીદો છો? ત્વચાને અનુકૂળ સાબુ પસંદ કરતી વખતે કઈ બાબતો ધ્યાનમાં રાખવી તે જાણો.

પ્રતીકાત્મક તસવીર (એઆઇ)

ત્વચા પર ખંજવાળ આવે છે? સ્નાન પછી ત્વચા ખેંચાય છે? કદાચ તમારી રોજની પસંદગી પર ફરી નજર કરવાની જરૂર છે. દુકાનમાં સાબુ પસંદ કરતી વખતે આપણી નજર પહેલાં સુગંધ, પૅકેજિંગ કે ઓફર પર જાય છે. ઘરે વર્ષોથી જે સાબુ વપરાતો આવ્યો હોય, એ જ ફરી ખરીદી લઈએ છીએ. પરંતુ સ્નાન પછી ત્વચા કેવી લાગે છે, એ પ્રશ્ન ભાગ્યે જ પૂછીએ છીએ. આ મુદ્દે સંદીપ નાયક, ગ્લોબલ હેડ,  R&D,પર્સનલ કેર, ગોદરેજ કન્ઝ્યુમર પ્રોડક્ટ્સે ગુજરાતી મિડ-ડે ડૉટ કૉમ સાથે રસપ્રદ માહિતી શૅર કરી. સાબુનું પહેલું કામ ત્વચા સાફ કરવાનું છે. છતાં દરેક ક્લેન્ઝરની બનાવટ અને ત્વચા પર તેની અસર એકસરખી હોતી નથી. ખરીદી વખતે થતી આ ચાર સામાન્ય ભૂલો સમજશો તો પસંદગી સરળ બનશે.

‘સારી સુગંધ એટલે સારો સાબુ’ એવું માની લેવું

સુગંધ ગમે એ સ્વાભાવિક છે, પરંતુ તે સાબુ તમારી ત્વચાને અનુકૂળ છે કે નહીં, તેનો જવાબ આપતી નથી. ખાસ કરીને સંવેદનશીલ ત્વચા હોય અથવા કોઈ ઉત્પાદન વાપર્યા પછી ખંજવાળ અને બળતરા થતી હોય, તો સુગંધ વગરનું હળવું ક્લેન્ઝર અજમાવવું વધુ યોગ્ય થઈ શકે છે. ત્વચા નિષ્ણાતો શુષ્ક ત્વચા માટે પણ હળવું, સુગંધ વગરનું ક્લેન્ઝર સૂચવે છે. 
વધારે ફીણ એટલે વધારે સફાઈ એવું માનવું. સ્નાન પછી ત્વચા એકદમ ખેંચાતી કે રૂક્ષ લાગે, તો તેને ‘સારી રીતે સાફ થઈ ગઈ’ તેની નિશાની ન માનો. તમારા માટે એ ક્લેન્ઝર વધુ કડક હોઈ શકે છે. ખાસ કરીને શુષ્ક ત્વચા ધરાવતા લોકોએ સ્નાન માટે હળવું ક્લેન્ઝર પસંદ કરવું અને પછી ત્વચા પર મૉઇશ્ચરાઇઝર લગાવવું ઉપયોગી છે. 

‘એન્ટિબૅક્ટેરિયલ’ લખ્યું છે એટલે વધુ સારું હશે એવું માનવું

પૅક પરનો આ શબ્દ આકર્ષક લાગે છે. પરંતુ સામાન્ય ગ્રાહકો માટે એન્ટિબૅક્ટેરિયલ સાબુ સાદા સાબુ કરતાં બીમારી અટકાવવામાં વધુ અસરકારક છે, એવા પૂરતા પુરાવા નથી. રોજિંદી સ્વચ્છતા માટે સાદા સાબુ અને પાણીથી યોગ્ય રીતે ધોવું પૂરતું છે. વર્કઆઉટ પછી પરસેવો થયો હોય કે ગરમીમાં બહાર ફરીને આવ્યા હો, તો પણ માત્ર આ કારણથી ખાસ એન્ટિબૅક્ટેરિયલ સાબુ જરૂરી બની જતો નથી. 

આખું વર્ષ એક જ સાબુ વાપરવો

ઋતુ બદલાય ત્યારે ત્વચા પર તેની અસર પણ બદલાઈ શકે છે. ઠંડી કે શુષ્ક હવામાં ત્વચા વધુ રૂક્ષ લાગતી હોય, તો હળવા ક્લેન્ઝર સાથે મૉઇશ્ચરાઇઝરની જરૂર પડી શકે. નિર્ણય કૅલેન્ડર જોઈને નહીં, તમારી ત્વચા કેવી લાગે છે તે જોઈને લો. સાબુ બદલ્યા પછી પણ ખંજવાળ, બળતરા કે વધુ શુષ્કતા ચાલુ રહે, તો ત્વચા નિષ્ણાતની સલાહ લો.  ખરીદતાં પહેલાં આટલું તપાસો:  પૅક પર શું લખ્યું છે, ઉત્પાદન વાપર્યા પછી ત્વચા કેવી લાગે છે અને તમને ખરેખર કઈ સમસ્યા થાય છે, આ ત્રણ બાબતો પર ધ્યાન આપો. સારી પસંદગી એ છે જે તમારી ત્વચાને અનુકૂળ આવે; સૌથી મોટો દાવો કરતી હોય એ જરૂરી નથી.