27 December, 2025 10:00 AM IST | Mumbai | Dr. Rishita Bochia Joshi
તસવીર ડિઝાઇનઃ કિશોર સોસા
સુંદર અને ટકાઉ ઘર બનાવવા મજબૂત પાયો, સારી અને યોગ્ય સામગ્રી તેમજ કુશળ કામદારોની જરૂર પડે છે તેમ આપણા શરીરનું સર્વાંગી સ્વાસ્થ્ય જળવાય તે માટે ખોરાક, કસરત અને મનની સ્વસ્થતા જરૂરી છે. ખોરાક આપણા શરીરને ઊર્જા આપે છે. નિયમિત કસરત શરીરને મજબૂત બનાવે છે, સાથે સાથે મનને તેજ અને તણાવમુક્ત રાખે છે. આમ સર્વાંગી સ્વાસ્થ્ય માટે તન અને મન બન્ને સ્વસ્થ હોવા ખૂબ જરુરી છે. સોશ્યલ મીડિયા જ્યારે આંગળીના ટેરવે છે ત્યારે સરળતાથી માહિતી મળી જાય કે, સર્વાંગી સ્વાસ્થ્ય માટે શું ખાવું જોઈએ? ડાયટિંગમાં કઈ બાબતોનું ધ્યાન રાખવું? કઈ કસરત કરવી જોઈએ? માનસિક શાંતિ માટે શું જરુરી છે? વગેરે વગેરે બધી જ માહિતી મળી જાય છે. પરંતુ વ્યક્તિ દીઠ દરેક બાબત જુદી-જુદી હોય છે. પણ સર્વાંગી સ્વાસ્થ્યને લગતી કેટલીક બાબતો બહુ કૉમન હોય છે. તમને મૂંઝવણ થતી હોય કે સુખાકારી અને સર્વાંગી સ્વાસ્થ્ય માટે શું કરવું તો ગુજરાતી મિડ-ડે ડોટ કોમ તમારી માટે લઈને આવ્યું છે – ‘હેલ્થ ફંડા’ (Health Funda). જેમાં દર શનિવારે ‘હેલ્થ એન ફૂડવિલા’ (Health n Foodvilla)નાં ડાયટિશન અને ફૂડ ન્યુટ્રિશનિસ્ટ, હોલિસ્ટિક ફંક્શનલ હેલ્થ કૉચ ડૉ. રિશિતા બોચિયા જોષી (Dr. Rishita Bochia Joshi) ખોરાક, શારિરીક સ્વાસ્થ્ય અને માનસિક સ્વાસ્થ્યને લગતા વિષયો પર આપણી સાથે વાત કરશે.
‘હેલ્થ ફંડા’ ના ગત એપિસોડમાં ડૉ. રિશિતા બોચિયા જોષીએ શિયાળામાં ડિહાઇડ્રેશનના ભય અને આ ઋતુમાં પણ પાણી પીવાનું કેટલું મહત્વ છે તે વિશે ચર્ચા કરી હતી હવે આજના ‘હેલ્થ ફંડા’ના એપિસોડમાં ડૉ. રિશિતા બોચિયા જોષી વાત કરે છે કે, ન્યુ યર સેલિબ્રેશન કે પાર્ટીને હેલ્ધી કઈ રીતે બનાવશો. ન્યુ યર પાર્ટી મેનુમાં હેલ્ધી પણ ટેસ્ટી રેસિપી શું બનાવવી તો ચોક્કસ આ આર્ટિકલ વાંચજો.
વર્ષ ૨૦૨૫ ને માત્ર હવે ગણતરીના દિવસો જ બાકી છે અને ન્યુ યર ૨૦૨૬ (New Year 2026) ની તૈયારીઓ લગભગ શરુ થઈ ગઈ છે. ન્યુ યર સેલિબ્રેશન સામાન્ય રીતે મોડી રાત સુધી પાર્ટી, ડિનર પાર્ટી, જાત-ભાતના ભોજન, તળેલા નાસ્તા અને ચીઝી વાનગીઓ સાથે થાય છે. ન્યુ યર પાર્ટીઓમાં મોટેભાગે જંક ફૂડ અને દારુ હોય જ છે. પાર્ટીમાં દારુ અને ભોજનનો આનંદ માણ્યા બાદ કે ઓવર ઇટીંગ કર્યા બાદ બ્લોટેડ ફીલ થાય છે અને પછી બીજા દિવસે ગિલ્ટ ટ્રીપ પર પહોંચી જવાય છે.
પરંતુ જો આ વખતે આપણે તે અભિગમ બદલીએ તો શું? જો આપણે આ નવા વર્ષમાં મહેમાનો માટે સ્વસ્થ પાર્ટી મેનુનું આયોજન કરીએ - જે ઉત્સવપૂર્ણ લાગે, સ્વાદિષ્ટ પણ હોય અને છતાં પણ દરેકને હળવાશ અને તાજગી અનુભવવા દે?
જ્યારે લોકો "હેલ્ધી ફૂડ મેનુ" આ શબ્દ સાંભળે છે ત્યારે ધારી લે છે કે, આ મેનુમાં કંટાળાજનક સલાડ, સૂકા નાસ્તા અને સ્મૂધી હશે. આ મેનુ તો ઉજવણી કરતાં વધુ ડાયેટ ફૂડ જેવું લાગે છે. પરંતુ ભારતીયોના રસોડામાં બનતા ફૂડની વાત કરીએ તો અહીં અનેક રંગબેરંગી મસલા ઉપલબ્ધ હોય છે જેને કારણે "હેલ્ધી ફૂડ મેનુ" જરાય બોરિંગ નથી લાગતું. આપણા રસોડામાં જ નજર કરીએ તો, રંગીન, સ્વાદિષ્ટ અને ઉત્સવપૂર્ણ પણ પોષણથી ભરપુર મેનુ આરામથી તૈયાર કરી શકીએ છીએ.
થોડી ક્રિએટીવીટી સાથે, એવી વાનગીઓ બનાવીએ જે તહેવારનો આનંદ પીરસે, પાચનને ટેકો આપે છે અને મહેમાનોને ગિલ્ટ ફ્રી અને આરામદાયક લાગણી અનુભવવા દે છે.
બીટ હમ્મસ, ક્લાસિક ચણા અને શેકેલા લસણનું હમ્મસ. જે પ્રોટીન અને ફાઇબર આપે છે સાથે જ રંગબેરંગી ફીલ પણ આપે છે.
દહીં, હળદર, કસુરી મેથી અને સરસવના તેલમાં મેરીનેટ કરેલ પનીર ટિક્કા બાઇટ્સ બનાવો. આ એકદમ ગિલ્ટ ફ્રી રેસિપી છે.
પરંપરાગત ખમણ ઢોકલા પનીરના ટુકડા અને ગાજર, કેપ્સિકમ જેવા કેટલાક બારીક સમારેલા શાકભાજીથી ભરીને લીલી ચટણી લગાડી સેન્ડવીચ બાઇટ્સ બનાવો.
કાકડીના ટુકડા પર દહીં લગાડી ઉપર ફુદીના અને કોથમીર ભભરાવી સેન્ડવિચ બાઇટ્સ બનાવી શકો છો.
સલાડ-ઓન-એ-સ્ટીક જેમાં અનાનસ, દ્રાક્ષ અને બદામ જેવા ફ્રુટ એન્ડ નટ મુકીને સ્કીવર્સ બનાવો.
ગાજર, કાકડી અને કોબી જેવા તાજા શાકભાજી, ચોખાના કાગળમાં લપેટીને, મસાલેદાર મસ્ટર્ડ ડીપ લગાડીને ઠંડું જ સર્વ કરો.
કોકોનટ મિલ્કમાં બનાવેલી રેડ કે ગ્રીન થાઇ કરી ફેટ્સ અને ફાઇબરથી ભરપૂર હોય છે. જેનાથી પોષણ પણ મળે છે અને પેટ પણ ભરાય છે. જે સ્ટીમ રાઇસ સાથે એકદમ ટેસ્ટી લાગે છે.
પરંપરાગત બિરયાનીમાં હેલ્ધી વળાંક આપવા માટે શક્કરિયા અને પનીર ઉમેરો. જે ગ્લાયકેમિક ઇન્ડેક્સ કોમ્પ્લેક્સ કાર્બ ફૂડ તરીકે કામ કરે છે અને ભરપૂર શાકભાજીની સાથે પ્રોટીન માટે પનીર છે.
ગુઆકામોલ, સાલસા અને હંગ કર્ડ સાર ક્રીમ સાથે ક્વિનોઆ શાકભાજીનો બાઉલ પણ એક ઉત્તમ અને પૌષ્ટિક ઓપ્શન છે.
ઓટ્સ, બદામ અને ખજૂરમાંથી બનાવેલા ટાર્ટ્સને, ઘરે બનાવેલા સ્ટ્રોબેરી-ચિયા સીડ્સનું મિશ્રણ કરીને બનાવો.
ફ્રૂટ કસ્ટર્ડનું હળવું સંસ્કરણ જેમાં મીઠાશવાળા કસ્ટર્ડ પાવડરને બદલે મધનો ઉપયોગ થાય છે. શેકેલા મખાના અને કાજુનો ઉપયોગ ફ્રૂટ કસ્ટર્ડને ઘટ્ટ કરવા માટે થાય છે.
છૂંદેલા રાસ્પબેરી અને ચિયા બીજના મણને ડાર્ક ચોકલેટમાં કોટિંગ કરીને બનાવવામાં આવતી પાંચ ઘટકોની ફ્રોઝન ટ્રીટ.
સોડા અને પેકેજ્ડ જ્યુસને બદલે હેલ્ધી ઓપ્શન્સ રાખી શકો.
- તાજો લીંબુનો રસ
- ફ્રેશ ફ્રુટ જ્યુસ
- ડિટોક્સ વોટર
આ પીણાં તાજગી આપનાર, હાઇડ્રેટિંગ અને પાચન માટે અનુકૂળ હોય છે.
એક સારી ન્યુ યર પાર્ટી મહેમાનોને અસ્વસ્થતા નહીં, પણ ખુશી આપે તેવું તમે કરો. યોગ્ય ઘટકો અને સરળ, સ્માર્ટ રસોઈ સાથે, તમારા ટેબલ પર એવો ખોરાક પીરસવામાં આવી શકે જે સ્વાદિષ્ટ પણ હોય અને સાથે જ પૌષ્ટિક પણ. તમારા ન્યુ યર સેલિબ્રેશનમાં હેલ્ધી ટચ એ જ તમાRi યુનિક ઓળખ બને તેવું કંઈક કરો. જેથી ગેસ્ટ પણ કહે, ‘હેલ્ધી છે અને ટેસ્ટી પણ!.’
હા, તો તમારી ન્યુ યર પાર્ટીમાં આ મેનુ ચોક્કસ ટ્રાય કરજો.
આપણે ફરી મળીશું નવા વર્ષે. બધાને હેલ્ધી અને હેપ્પી ન્યુ યર.
(શબ્દાંકનઃ રચના જોષી)