02 March, 2026 02:56 PM IST | Mumbai | Gujarati Mid-day Correspondent
પ્રતીકાત્મક તસવીર
તડકામાં કલાકો સુધી રંગોથી રમતી વખતે શરીરમાંથી પરસેવા વાટે પાણી નીકળે છે પણ રમતની મસ્તીમાં આપણે પાણી પીવાનું ભૂલી જઈએ છીએ, જેને લીધે ડીહાઇડ્રેશન થાય છે. ત્યારે ધુળેટીની ઉજવણી સેફ રીતે થાય એ માટે સ્વાસ્થ્યની કાળજી રાખવી જરૂરી છે.
તડકામાં બહાર નીકળતાં પહેલાં અને ધુળેટી રમતી વખતે દર અડધા કલાકે પાણી પીવાની આદત રાખો. માત્ર તરસ લાગે ત્યારે જ પાણી પીવું શરીર માટે પૂરતું નથી. લીંબુશરબત ઉપરાંત વરિયાળી શરીરને ઠંડક આપે છે અને પાચનમાં પણ મદદ કરે છે. આ ઉપરાંત મીઠું અને જીરું નાખેલી છાશ બૉડીમાં ઇલેક્ટ્રોલાઇટ્સનું બૅલૅન્સ જાળવી રાખે છે, જેને લીધે બૉડી ડીહાઇડ્રેટ નથી થતી અને એનર્જી પણ જળવાઈ રહે છે.
હોળીમાં બનતી તળેલી આઇટમ્સ અને પચવામાં ભારે હોય એવો ખોરાક ખાવાને બદલે હળવો ખોરાક પસંદ કરો. તરબૂચ અને શક્કરટેટી જેવાં ફળોમાં ૯૦ ટકાથી વધુ પાણી હોય છે, જે શરીરને કુદરતી રીતે હાઇડ્રેટ કરે છે. ખિસ્સામાં કે નાસ્તામાં કાકડી નાખો. એ શરીરને ઠંડક આપવાની સાથે-સાથે ગરમીથી રક્ષણ પણ આપશે.
બને ત્યાં સુધી સવારે ૧૧થી બપોરે ૪ વાગ્યા સુધીના સમય દરમિયાન તડકામાં હોળી રમવાનું ટાળો. એ સમયે સૂર્યનાં અલ્ટ્રાવાયલેટ કિરણો અને ગરમી સૌથી વધુ હોય છે જે સ્વાસ્થ્ય માટે હાનિકારક છે. ઘેરા રંગનાં કપડાં ગરમી શોષે છે, તેથી સફેદ કે આછા રંગનાં સુતરાઉ કપડાં પહેરો જે આખા શરીરને ઢાંકે. આથી કલર ત્વચાના ડાઇરેક્ટ સંપર્કમાં ઓછો આવશે અને તડકાથી પણ રક્ષણ મળશે.
હોળી રમવા જાઓ તો ચા-કૉફી જેવાં કૅફિનયુક્ત પીણાં પીવાનું ટાળવું, એ આપણા શરીરમાંથી વૉટર-લેવલ ઓછું કરવાનું કામ કરે છે. આ ઉપરાંત ઠંડાં પીણાં પણ ન પીવાં જોઈએ. એમાં ખાંડનું પ્રમાણ વધુ હોય છે, જે તાત્કાલિક એનર્જી આપે પણ લાંબા ગાળે ડીહાઇડ્રેશન વધારે છે. જો ચક્કર જેવું ફીલ થાય, માથું દુખે, ખૂબ પરસેવો વળીને બંધ થઈ જાય અથવા ગભરામણ થાય તો તરત જ છાંયડામાં બેસી જાઓ અને ORS પી લો.
