ખુરશી પર બેસીને ફ્લેક્સિબિલિટી પણ વધે ને વજન પણ ઘટે

ચૅર ભુજંગાસન
ખુરશીના પાછળના ભાગમાં ઊભા રહીને એના હૅન્ડલનો સપોર્ટ લઈને છાતીના ભાગને ઉપરની તરફ ખેંચો અને પેટના ભાગને નીચેની તરફ રાખો. શ્વસનતંત્રને મજબૂત બનાવે, શ્વસન બહેતર બને અને કરોડરજ્જુને હેલ્ધી બનાવે.

ચૅર જાનુ શીર્ષાસન
ખુરશી પર ટટ્ટાર બેસી ગયા પછી ડાબા પગને ઘૂંટણથી વાળીને જમણી સાથળ પર મૂકી દો. જમણા પગની એડીને ખેંચીને સહેજ બહારની તરફ રાખો. હવે બન્ને હાથને ઉપર લઈ જઈને જમણા પગના અંગૂઠાને ટચ કરતા હો એ રીતે આગળ ઝૂકો. પછી બીજી બાજુ અભ્યાસ કરો. કમર પાસેથી ચરબી ઘટે, પગના સ્નાયુઓ મજબૂત બને. જોકે જેમને સિવિયર બૅકપેઇન હોય તેમણે આ અભ્યાસ ન કરવો. 

ચૅર ઉથ્થિત પાર્શ્વકોણાસન 
બન્ને પગને ઓપન કરીને પગની એડી જમીન પર રહે એ રીતે રાખો. હવે આગળ ઝૂકીને ડાબા પગના અંગૂઠાને જમણા હાથથી સ્પર્શ કરવાનો પ્રયાસ કરો અને ડાબા હાથને ઉપરની તરફ ખેંચેલો રાખો. નજર પણ એ તરફ રાખો. આ અભ્યાસ પેટની ચરબી ઘટાડવામાં અને સ્પાઇનનું લચીલાપણું વધારવા માટે બેસ્ટ છે.

ચૅર ઉત્તાનાસન
ખુરશી પર ટટ્ટાર બેસી ગયા પછી બન્ને પગની એડીઓ જમીન પર રહે એ રીતે પગને ઘૂંટણથી સીધા કરો અને પછી કમરના હિસ્સાથી નીચે ઝૂકીને પગના અંગૂઠાને સ્પર્શ કરો. પેટની ચરબી ઘટાડવાથી લઈને માથા તરફ બ્લડ ફ્લો વધારે છે. સ્ટ્રેસ અને ટેન્શનને દૂર કરે છે. માથાનો દુખાવો મટે છે. સ્નાયુઓને લચીલા બનાવે છે. હાઈ બીપી અને પેટની સર્જરી થઈ હોય તેમણે અવૉઇડ કરવું. 

ચૅર વીરભદ્રાસન 
જમણા પગને નેવું ડિગ્રી બેન્ડ કરીને ચૅરની એક કિનારી પર રાખો અને ડાબા પગને ઘૂંટણથી સીધો ખુરશીની બીજી કિનારી પર રાખો. હવે બન્ને હાથને પહેલાં પગને પૅરેલલ અને પછી માથાની ઉપર નમસ્કાર મુદ્રામાં રાખો. હાથ, કરોડરજ્જુની ફ્લેક્સિબિલિટી માટે અને કમર તથા પેટની ચરબી ઘટાડવા માટે, પગના અને સાથળના સ્નાયુઓને મજબૂતી આપવા માટે આ ઉપયોગી છે.

ચૅર પવન મુક્તાસન
ટટ્ટાર બેઠા પછી ડાબા પગને ઘૂંટણથી વાળીને એને છાતી તરફ લાવીને બન્ને હાથથી ટાઇટલી પકડી લો. જમણા પગથી પણ સેમ અભ્યાસ કરો. ગૅસની સમસ્યા હોય, ઘૂંટણનો દુખાવો હોય તેમને આ અભ્યાસથી રાહત થશે. પેટની સર્જરી અને ઘૂંટણમાં ગંભીર ઈજા હોય તેમણે આ અભ્યાસ ન કરવો.