24 June, 2026 12:25 PM IST | Ahmedabad | Gujarati Mid-day Correspondent
ચૈતર વસાવા
ગુજરાતમાં વન વિભાગના કર્મચારીઓ પર હુમલો કરવાના કેસમાં ડેડિયાપાડાના આમ આદમી પાર્ટી (AAP)ના વિધાનસભ્ય ચૈતર વસાવાને નર્મદા જિલ્લાના ઍડિશનલ સેશન્સ જજ એ.વી. હીરપરાએ દોષી જાહેર કરીને ૭ વર્ષની સજા ફરમાવવાની સાથે ૨૫,૦૦૦ રૂપિયાનો દંડ કર્યો હતો. ચૈતર વસાવાની સાથે તેમનાં પત્ની શકુંતલા વસાવા સહિત કુલ ૯ આરોપીઓને પણ ૭ વર્ષની સજા અને ૨૫,૦૦૦ રૂપિયાનો દંડ કર્યો છે. કોર્ટના આ ચુકાદાના પગલે ચૈતર વસાવા તેમનું વિધાનસભ્ય પદ ગુમાવી શકે છે.
૨૦૨૩માં વન વિભાગના કર્મચારીઓએ વન વિભાગની જમીન પરથી ગેરકાયદેસર વાવેતર દૂર કર્યું હતું. આ મુદ્દે ચૈતર વસાવાએ કર્મચારીઓને પોતાના ઘરે બોલાવીને ધાકધમકી આપી હતી અને ધોલધપાટ કરી હતી.
ચૈતર વસાવાએ કહ્યું હતું કે ‘અમને ૭ વર્ષની સજા ફરમાવવામાં આવી છે. નામદાર કોર્ટની જે પણ સુનાવણી છે એનો આદર કરીએ છીએ.’
ચૈતર વસાવાનું વિધાનસભ્ય પદ રદ થઈ શકે
ચૈતર વસાવાને ૭ વર્ષની સજા થતાં વિધાનસભ્ય પદ રદ થાય એવા સંજોગો ઊભા થયા છે. જો કોઈ પણ વિધાનસભ્યને બે વર્ષથી વધુની સજા થાય તો વિધાનસભ્ય તરીકે મટી જાય છે, પરંતુ એ જાહેર કરવાની સત્તા વિધાનસભાના સ્પીકર પાસે છે. સ્પીકર પાસે આ કેસનો ચુકાદો રજૂ થાય એ પછી સ્પીકર નિર્ણય કરતા હોય છે.
