કોલંબોમાં ૩૦૦ ભારતીયો ફસાયા

૧૫૩નાં મૃત્યુ, ૧૫,૦૦૦ ઘરો નષ્ટ, અનેક શહેરો મુખ્ય માર્ગોથી વિખૂટાં- દિતવાહ વાવાઝોડાએ શ્રીલંકામાં દૈત્ય સ્વરૂપ ધારણ કર્યું, ઇમર્જન્સી જાહેર

શ્રીલંકાના કોલંબોની આસપાસનો જળમગ્ન વિસ્તાર.

બંગાળની ખાડીમાં ઊઠેલા ચક્રવાત દિતવાહને કારણે શ્રીલંકામાં મચેલી તબાહીને પગલે ગઈ કાલે શ્રીલંકાના રાષ્ટ્રપતિ અનુરાકુમાર દિસાનાયકે ઇમર્જન્સી જાહેર કરી હતી. શ્રીલંકામાં શનિવારે વરસાદ અને ભારે પવન ન અટકતાં પ્રાકૃતિક આપદાને કારણે ૧૫૩ લોકોનાં મૃત્યુ થયાં હતાં. હજી ૧૭૬ લોકો ગુમ છે. શ્રીલંકાના અલગ-અલગ વિસ્તારોમાંથી કુલ ૧૫,૦૦૦ ઘરો પૂરી રીતે નષ્ટ થઈ ચૂક્યાં છે. ૭૮,૦૦૦થી વધુ લોકોએ રાહતશિબિરોમાં શરણ લેવું પડ્યું હતું. દેશના લગભગ ત્રીજા ભાગના વિસ્તારોમાં વીજળી અને પાણીનો પુરવઠો ઠપ થઈ ગયો હતો. દેશની ત્રણેય આર્મીના જવાનો બચાવકાર્યમાં લાગી ગયા છે. તોફાન રવિવારે સાંજ સુધીમાં શ્રીલંકાના દક્ષિણ તટ તરફ વધશે એવી સંભાવના છે. 

પૂરની સ્થિતિ એટલી વિકરાળ છે કે અનેક વિસ્તારો સાવ વિખૂટા પડી ગયા છે. વિખૂટા પડેલા વિસ્તારોની શું સ્થિતિ છે એનો ક્યાસ કાઢવો પણ મુશ્કેલ થઈ ગયો છે. કેટલીક જગ્યાએ ભૂસ્ખલનને કારણે આખેઆખા રહેણાક વિસ્તારો દબાઈ ગયા છે.

૩૦૦ ભારતીયો ફસાયા 
અનેક ફ્લાઇટ્સ કૅન્સલ થઈ ગઈ હોવાથી ૩૦૦ ભારતીયો ત્રણ દિવસથી કોલંબોના ઍરપોર્ટ પર ફસાયેલા છે. ઍરપોર્ટ પર પણ ખોરાક અને પાણીની અછત સર્જાઈ ગઈ છે. 

આજે તામિલનાડુના તટ પર પહોંચશે દિતવાહ 

શ્રીલંકામાં તબાહી મચાવ્યા પછી હવે દિતવાહ વાવાઝોડું ભારત તરફ આવી રહ્યું છે. આજે સવાર સુધીમાં તામિલનાડુના કિનારાના વિસ્તારો તરફ આગળ વધી રહ્યું છે. ગઈ કાલે જ ભારતીય મોસમ વિભાગે તામિલનાડુ, કેરલા, કર્ણાટક, તેલંગણ અને આંધ્ર પ્રદેશનમાં હાઈ અલર્ટ જાહેર કરી છે. ઑલરેડી તામિલનાડુમાં શનિવારે સવારથી જ ભારે વરસાદની શરૂઆત થઈ ચૂકી છે. ૧૦૦ કિલોમીટર પ્રતિ કલાકની ઝડપે પવન ફૂંકાઈ રહ્યો છે અને મોસમ વિભાગની ચેતવણીના પગલે આજે કિનારાના વિસ્તારોમાં સ્કૂલ, ટ્રેન, ફ્લાઇટ અને તમામ ટ્રાન્સપોર્ટ-વ્યવસ્થા બંધ કરી દીધી છે. તામિલનાડુમાં નૅશનલ ડિઝૅસ્ટર રિસ્પૉન્સ ફોર્સ અને સ્ટેટ ડિઝૅસ્ટર રિસ્પૉન્સ ફોર્સની ૨૮ ટીમોએ ઠેર-ઠેર ૬૦૦૦ રાહતશિબિરો તૈયાર કરી છે.