ઑસ્ટ્રેલિયાના ૬૨ વર્ષના વડા પ્રધાને ૧૬ વર્ષ નાની પાર્ટનર સાથે લગ્ન કર્યાં

કુંવારી માના દીકરા ઍન્થની ઍલ્બનીઝનાં આ બીજાં લગ્ન છેઃ વડા પ્રધાનપદે રહીને લગ્ન કરનાર ઑસ્ટ્રેલિયાના પહેલા નેતા

ઍન્થની ઍલ્બનીઝે તેમનાથી ૧૬ વર્ષ નાની ૪૬ વર્ષની પાર્ટનર જોડી હેડન સાથે ગઈ કાલે લગ્ન કર્યાં

ઑસ્ટ્રેલિયાના ૬૨ વર્ષના વડા પ્રધાન ઍન્થની ઍલ્બનીઝે તેમનાથી ૧૬ વર્ષ નાની ૪૬ વર્ષની પાર્ટનર જોડી હેડન સાથે ગઈ કાલે લગ્ન કર્યાં હતાં. વડા પ્રધાનપદ પર રહીને લગ્ન કરનારા તેઓ પ્રથમ ઑસ્ટ્રેલિયન નેતા બન્યા છે. આ લગ્ન કૅનબેરામાં વડા પ્રધાનના નિવાસસ્થાન ધ લૉજ ખાતે એક ખાનગી અને ભાવનાત્મક સમારોહમાં થયાં હતાં, જેમાં ફક્ત પરિવારના સભ્યો અને નજીકના મિત્રો જ હાજર રહ્યા હતા.

જોડી હેડન ફાઇનૅન્શિયલ સર્વિસમાં કામ કરે છે. ઍન્થની ઍલ્બનીઝે ફેબ્રુઆરી ૨૦૨૪માં જોડી હેડન સાથે સગાઈ કરી હતી. ઍલ્બનીઝ અને હેડન સોમવારથી શુક્રવાર સુધી ઑસ્ટ્રેલિયામાં હનીમૂન મનાવશે, એનો સંપૂર્ણ ખર્ચ પોતાના ખિસ્સામાંથી ચૂકવશે એટલે કે તેમને કોઈ સરકારી સહાય મળશે નહીં. ઍલ્બનીઝનાં આ બીજાં લગ્ન છે. તેમણે ૨૦૧૯માં પહેલી પત્ની કાર્મેલ ટેબટથી છૂટાછેડા લીધા હતા. પહેલાં લગ્ન ૧૯ વર્ષ ચાલ્યાં હતાં અને તેમને એક દીકરો પણ છે. ઍલ્બનીઝ પોતે એક કુંવારી માતાના દીકરા છે અને તેમના પિતા ઇટાલિયન મૂળનાં હોવાનું મનાય છે.