જો બાઇડનના મોટા ભાગના આદેશોને રદ કરવાની ડોનલ્ડ ટ્રમ્પની જાહેરાત

ટ્રમ્પનો દાવો છે કે બાઇડનના ઘણા આદેશો પર તેમની સંમતિ વિના, કોઈ બીજાના નિર્દેશ પર ઑટોપેન દ્વારા સહી કરવામાં આવી હતી

અમેરિકાના પ્રેસિડન્ટ ડોનલ્ડ ટ્રમ્પ, જો બાઇડન

અમેરિકાના પ્રેસિડન્ટ ડોનલ્ડ ટ્રમ્પે જાહેર કર્યું છે કે તેઓ અમેરિકાના પ્રેસિડન્ટ તરીકે તેમના પુરોગામી જો બાઇડન દ્વારા સહી કરાયેલા મોટા ભાગના એક્ઝિક્યુટિવ ઑર્ડર રદ કરવાનો ઇરાદો ધરાવે છે.

એક સોશ્યલ મીડિયા પોસ્ટમાં ટ્રમ્પે દાવો કર્યો હતો કે બાઇડને પોતે આદેશો પર સહી કરી નહોતી અને કહ્યું હતું કે બાઇડનને ઘેરી રહેલા કટ્ટરપંથી ડાબેરી પાગલોએ ઑટોપેનનો ઉપયોગ કરીને તેમના નામ પર સહી કરીને પ્રેસિડન્ટપદ તેમની પાસેથી છીનવી લીધું હતું. ટ્રમ્પે એવો પણ દાવો કર્યો હતો કે લગભગ ૯૨ ટકા ઑર્ડર ઑટોપેનનો ઉપયોગ કરીને સહી કરવામાં આવ્યા હતા.

ઑટોપેન શું છે?
ઑટોપેન એ ૧૮૦૩માં પેટન્ટ કરાયેલું રોબોટિક સિગ્નેચર મશીન છે. એ વ્યક્તિના વાસ્તવિક હસ્તાક્ષરની સચોટ નકલ કરી શકે છે. પ્રેસિડન્ટ અને ઉચ્ચ કક્ષાના અધિકારીઓ દાયકાઓથી મોટા દસ્તાવેજો પર સહી કરવા માટે એનો ઉપયોગ કરી રહ્યા છે. અમેરિકન ડિપાર્ટમેન્ટ ઑફ જસ્ટિસે ૨૦૦૫માં સ્પષ્ટપણે જણાવ્યું હતું કે પ્રેસિડન્ટ ઑટોપેનનો ઉપયોગ કરીને બિલ પર સહી કરી શકે છે, જેના માટે તેઓ જવાબદાર વ્યક્તિને પોતે સહી કરવાને બદલે એના પર સહી કરવાની સૂચના આપી શકે છે.

અગાઉ પણ ઉપયોગ?
ઑટોપેન નવી નથી. ૧૮૦૦ના દાયકાની શરૂઆતથી વાઇટ હાઉસમાં ઑટોપેનનો ઉપયોગ કરવામાં આવી રહ્યો છે, જેની શરૂઆત પ્રેસિડન્ટ થૉમસ જેફરસનથી થઈ હતી. ગેરાલ્ડ ફોર્ડ, લિન્ડન બી. જૉન્સન અને જૉન એફ. કેનેડીએ પણ એનો ઉપયોગ કર્યો હતો. બરાક ઓબામાએ તેમના વિદેશપ્રવાસો દરમ્યાન મહત્ત્વપૂર્ણ બિલ પર સહી કરવા માટે આ મશીનનો ઉપયોગ કર્યો હતો. ટ્રમ્પે પોતે સ્વીકાર્યું હતું કે તેઓ ઓછા મહત્ત્વપૂર્ણ કાગળો માટે પણ ઑટોપેનનો ઉપયોગ કરતા હતા. ઇતિહાસ દર્શાવે છે કે વાઇટ હાઉસમાં આ એક સામાન્ય અને સ્વીકૃત પ્રક્રિયા રહી છે.

હોબાળો કેમ થયો?
ટ્રમ્પ અને તેમના સમર્થકો સતત દાવો કરે છે કે બાઇડનના ઘણા આદેશો કોઈ બીજાના નિર્દેશ પર મશીન દ્વારા સહી કરાયેલા હતા. જોકે હજી સુધી કોઈ નક્કર પુરાવા બહાર આવ્યા નથી કે સહીઓ બાઇડનની સંમતિ વિના કરવામાં આવી હતી. રિપબ્લિકન-નેતૃત્વ હેઠળની સમિતિએ એક અહેવાલ જાહેર કર્યો હતો, પરંતુ એમાં કોઈ પુરાવા નથી કે બાઇડન પોતાની નીતિઓ અથવા આદેશોથી અજાણ હતા.