21 April, 2026 11:12 AM IST | Washington | Gujarati Mid-day Correspondent
સોશ્યલ મીડિયા યુઝર્સે કહ્યું હતું કે તેઓ પોતાનું સંતુલન ગુમાવી રહ્યા હોય એવું જણાય છે.
અમેરિકાના પ્રેસિડન્ટ ડોનલ્ડ ટ્રમ્પ પત્રકારો સાથે વાતચીત કરતી વખતે ખભા કરતાં વધુ પહોળા પગ ફેલાવીને ઊભા રહ્યા હોવાથી ફરી એક વાર તેમના સ્વાસ્થ્ય અંગે શંકા-કુશંકાઓ થવા લાગી છે. સોશ્યલ મીડિયા યુઝર્સે કહ્યું હતું કે તેઓ પોતાનું સંતુલન ગુમાવી રહ્યા હોય એવું જણાય છે.
એક ફોટોગ્રાફમાં ૭૯ વર્ષના ટ્રમ્પ પગ પહોળા ફેલાવીને ઊભા છે, જેને ઘણા લોકો ઊંધા V-આકાર તરીકે વર્ણવે છે. આ ક્લિપ ફરી વાઇરલ થયાના થોડા સમય પછી આવી છે, જેમાં ટ્રમ્પ વિમાનમાંથી બહાર નીકળતી વખતે લંગડાતા દેખાતા હતા.
ઑનલાઇન પ્રતિક્રિયાઓમાં ઘણા લોકોએ ચિંતા વ્યક્ત કરી હતી કે આ રીતે ઊભા રહેવું સંતુલન અથવા સંકલન સમસ્યાઓ સાથે જોડાયેલું હોઈ શકે છે. તેઓ પડી જવાથી બચવા માટે આ રીતે ઊભા છે. ઘણા યુઝર્સે લખ્યું હતું કે તેઓ કોઈ પ્રકારના પગ/હિપ બ્રેસ પહેરતા હોય એવું લાગે છે.
એક કમેન્ટમાં સૂચવવામાં આવ્યું હતું કે આ રીતે ઊભા રહેવાથી પીડા ઓછી થાય છે. જોકે વાઇટ હાઉસે ટ્રમ્પના સ્વાસ્થ્ય પર પ્રશ્ન ઉઠાવતા દાવાઓનો સતત વિરોધ કર્યો છે અને કહ્યું છે કે પ્રેસિડન્ટની તબિયત એકદમ સારી છે.
